قازاقستان رەسپۋبليكاسىنىڭ «قوعامدىق سانانى جاڭعىرتۋ» باعدارلاماسى جانە قازاقستان مەن تۇركيا اراسىنداعى ديپلوماتيالىق قارىم-قاتىناستاردىڭ 25 جىلدىعى اياسىندا تۇركيادا اي سايىن شىعاتىن «كاردەش كالەملەر» (باۋىرلاس قالامدار) اتتى ادەبي جۋرنالدىڭ جاڭا سانى قازاقستاننىڭ حالىق جازۋشىسى شەرحان مۇرتازانىڭ شىعارماشىلىعىنا ارنالدى.
جۋرنالعا قازاقستاننىڭ تۇركياداعى ەلشىسى ابزال ساپاربەك ۇلىنىڭ «كلاسسيك جازۋشى», ەۋرازيا جازۋشىلار قاۋىمداستىعىنىڭ توراعاسى ياكۋب وماروعلىنىڭ «اناسىنا ەسكەرتكىش تۇرعىزعان جازۋشى», جازۋشى مارحابات بايعۇتتىڭ «شىڭداعى شەراعاڭ», جازۋشى نۇرعالي ورازدىڭ «قازاقتىڭ ۇلتتىق مانيفەستى», جۋرناليست تالعات ءسۇيىنبايدىڭ «شەراعاڭا سىر اقتارىپ قايتقاندا...», تۇرىك قالامگەرى ەمرۋللاح وزدەميردىڭ «تۇركىگە ورتاق تۋىندى» اتتى ماقالالارى, ش.مۇرتازانىڭ «اي مەن ايشا» رومانى جانە «قىزىل جەبە» رومان-ەپوپەياسىنىڭ ۇزىندىلەرى ەندى. ماتەريالداردى تۇرىك تىلىنە اۋدارىپ, باسپاعا دايىنداعان جازۋشى مالىك وتارباەۆ.
ەسكە سالا كەتەيىك, مەملەكەتتىك جانە قوعام قايراتكەرى شەرحان مۇرتازا بيىلعى جىلى «تۇركى الەمى ادەبيەتىنە قوسقان ۇلەسى ءۇشىن» ارنايى سىيلىعىمەن ماراپاتتالعان ەدى.
سونداي-اق, قازاقتىڭ بەلگىلى ادەبيەت سىنشىسى, كورنەكتى قالامگەرى ساعات اشىمباەۆتىڭ 70 جاسقا تولۋىنا وراي, جۋرنالدىڭ بۇل ارنايى سانىندا جازۋشى عابباس قابىش ۇلىنىڭ «اسىقپاي جۇرگەن ەمەس» اتتى ماقالاسى تۇرىك تىلىندە جارىق كوردى.
ميرا بايبەك,
«ەگەمەن قازاقستان»
الماتى