بۇگىن قر پرەمەر-ءمينيسترى باقىتجان ساعىنتاەۆ «ەىدۇ-نىڭ ەۋرازيا اپتالىعى – 2017» فورۋمىنىڭ اشىلۋ سالتاناتىنا قاتىسىپ, شارا قاتىسۋشىلارىنا العى ءسوزىن ارنادى. بۇل تۋرالى primeminister.kz حابارلادى.
قازاقستانننىڭ ەىدۇ-مەن ىنتىماقتاستىعى 2008 جىلدان باستاپ ەۋرازيالىق باسەكەگە قابىلەتتىلىك باعدارلاماسى (ەبب) اياسىندا جۇزەگە اسۋدا. باعدارلامانىڭ قاتىسۋشىلارى — كاۆكازدىڭ, شىعىس ەۋروپانىڭ جانە ورتالىق ازيانىڭ 13 ەلى.
ەبب اياسىنداعى ەىدۇ نەگىزگى شاراسى جىل سايىنعى قورىتىندى شارا — «ەۋرازيا اپتالىعى». وندا ەىدۇ-عا مۇشە 35 ەلدىڭ وكىلدەرى ەۋرازيالىق كونتينەنتتىڭ سەرىكتەس ەلدەرىمەن قارىم-قاتىناستى نىعايتۋ جولدارىن تالقىلاۋ ءۇشىن كەزدەسەدى. وتكەن جىلى پاريجدە وتكىزىلگەن «ەۋرازيا اپتالىعىنىڭ» قورىتىندىسى بويىنشا قازاقستان 2017 جىلى كوشپەلى وتىرىس وتكىزەتىن ەل رەتىندە تاڭدالدى.
بۇگىندە شاراعا ەىدۇ ەلدەرىنىڭ ەلشىلەرى مەن مينيسترلەرى, ەبب-نىڭ 13 ەلىنىڭ ۇكىمەتتەرى مەن مەملەكەتتىك ورگاندارىنىڭ مۇشەلەرى قاتىسۋدا. سونداي-اق, فورۋمعا قاتىسۋ ءۇشىن ەىدۇ باس حاتشىسى انحەل گۋرريا كەلدى. ول ۇيىمعا 2006 جىلدان باستاپ باسشىلىق ەتەدى, وتكەن جىلى 2021 جىلعا دەيىن ءۇشىنشى مەرزىمگە قايتا سايلاندى.
باقىتجان ساعىنتاەۆ فورۋمنىڭ اشىلۋ سالتاناتىنداعى سوزىندە قازاقستان ەۋرازيالىق كەڭىستىكتە ەكونوميكا مەن ساۋدانى دامىتۋ بويىنشا ينتەگراتسيالىق پروتسەستەرگە قولداۋ بىلدىرەتىنىن اتاپ ءوتتى. وسىعان وراي, رەسپۋبليكا ەۋرازياداعى الەۋمەتتىك جانە ەكونوميكالىق دامۋدىڭ تۇراقتىلىعىن ارتتىرۋعا, زاماناۋي ەكسپورتتىق ساياساتتى قۇرىپ, ەىدۇ-مەن تىكەلەي ىنتىماقتاستىق ورناتۋ كەزىندە يننوۆاتسيالىق كاسىپكەرلىك قىزمەتىن ىنتالاندىرۋعا ۇلەسىن قوسۋدى ودان ءارى جالعاستىرۋعا نيەتتى.
ەىدۇ — دەموكراتيا مەن ەركىن نارىقتىق ەكونوميكا قاعيدالارىنا سايكەس ءوزارا ارەكەت ەتۋشى, باسەكەگە اسا قابىلەتتى ەلدەردىڭ حالىقارالىق ەكونوميكالىق بىرلەستىگى. ن. نازارباەۆتىڭ تاپسىرماسىنا سايكەس, قازاقستان ەكونوميكاسىنىڭ ءۇشىنشى جاڭعىرۋى اياسىندا ىنتىماقتاستىقتىڭ ەلدىك باعدارلاماسىن ىسكە اسىرۋ قورىتىندىسى بويىنشا الىنعان ەىدۇ-نىڭ ۇسىنىستارى مەن ۇزدىك تاجىريبەلەرىن ەنگىزۋ ءۇشىن ۇلتتىق جول كارتاسىنىڭ جوباسى ازىرلەنىپ, بەكىتىلدى.
بيىل ەىدۇ ەلدىك باعدارلامانىڭ 2018 جىلدىڭ سوڭىنا دەيىن ارەكەت ەتۋىن ماقۇلدادى. ول مەملەكەتتىك ساتىپ الۋلار, بيۋدجەتتىك باسقارۋ, ءمجا, سىني تەگەۋرىندەر, بيزنەستى وڭىرلىك دامىتۋ, سالىق سالۋ جانە ت. ب. باعىتتار بويىنشا 13 جاڭا جوبانى ىسكە اسىرۋدى كوزدەيدى.