ەلوردالىق تەاترلار ەرتەڭنەن باستاپ ءوز كورەرمەندەرىمەن قايتا قاۋىشادى. وسىعان وراي استانا قالاسى اكىمدىگىنىڭ ءباسپاسوز ورتالىعىندا جاڭا تەاتر ماۋسىمىنىڭ اشىلۋىنا ارنالعان ءباسپاسوز ءماسليحاتى ءوتتى.
شاراعا ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ باسشىسى ايبولات سەكسەمباەۆ, م.گوركي اتىنداعى مەملەكەتتىك اكادەميالىق ورىس دراما تەاترىنىڭ باسشىسى ەركىن قاسەنوۆ جانە جاستار تەاترىنىڭ باسشىسى ەرنار جۇماتاەۆ قاتىستى. تەاتر باسشىلارى جاڭا ماۋسىمداعى جوسپارلارىمەن ءبولىسىپ, باق وكىلدەرىنىڭ ساۋالدارىنا جاۋاپ بەردى.
جيىن بارىسىندا م.گوركي اتىنداعى ورىس دراما تەاترى 117-ءشى تەاتر ماۋسىمىن ەرتەڭ, ياعني, 25 قازان كۇنى ا.س.پۋشكيننىڭ «ەۆگەني ونەگين» پرەمەرالىق قويىلىمىمەن اشاتىنى بەلگىلى بولدى. سونداي-اق, تەاتردىڭ جاڭا ماۋسىمى ەلىمىزدىڭ ورداسى – استانا قالاسىنىڭ 20 جىلدىعىنا ارنالماق. وسى ۋاقىتتا ۇجىم ف.دوستوەۆسكيدىڭ «اعايىندى كارامازوۆتار», ا.ەكزيۋپەريدىڭ «كىشكەنتاي حانزادا» تۋىندىلارىنىڭ جاڭا قويىلىمىن ساحنالاۋدى جوسپارلاپ وتىر.
ال, جاستار تەاترىنا كەلەر بولساق, جاسامپاز تەاترعا بيىل ون جىل. سونداي-اق ونىڭ كوركەمدىك جەتەكشىسى ءارى باس رەجيسسەرى نۇرقانات جاقىپباي 70 جاسقا كەلدى. وسىعان وراي 25 قازان مەن 1 قاراشا كۇندەرى ارالىعىندا «جانارىمداعى جالعىز اۋەن» اتتى جاستار تەاترىنىڭ ۇزدىك قويىلىمدار فەستيۆالى وتپەك. تەاتر باسشىسى فەستيۆال اياسىندا اكتەر شەبەرلىگى, ساحنا قوزعالىسى, ساحنا ءتىلى جانە ۆوكال باعىتى بويىنشا اكتەرلەردىڭ كاسىبي بىلىكتىلىگىن ارتتىرۋعا ارنالعان شەبەرلىك سىنىپتارى وتەتىنىن مالىمدەدى.
ايگۇل سەيىل, «ەگەمەن قازاقستان»