مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى «Centaurus Rustem Abdrashev production» كومپانياسىمەن بىرلەسە وتىرىپ «قازاق حاندىعى. التىن تاق» (شارتتى اتاۋى) اتتى تاريحي سەريالىنىڭ ەكىنشى ماۋسىمىن ءتۇسىرۋدى قولعا الدى.
– «قازاق حاندىعى» سەريالىنىڭ ءبىرىنشى ماۋسىمى وتانداستارىمىزدىڭ تاريحقا دەگەن قىزىعۋشىلىعىن وياتتى. رەجيسسەردىڭ جانە شىعارماشىلىق توپتىڭ اتىنا كوپتەگەن العىس حاتتار كەلىپ ءتۇستى, عالامتور جانە الەۋمەتتىك جەلىلەر ارقىلى جىلى لەبىزدەر الدىق. كوپتەگەن پىكىرتالاستار مەن سىندار دا بولدى. حالىق تاراپىنان «وسى جوبانىڭ جالعاسىن تۇسىرسە ەكەن» دەگەن تىلەگىن اڭعاردىق. بۇل ءبىز ءۇشىن وتە ماڭىزدى.
جاقىندا پرەزيدەنت ن.نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ايتىلعان «جاڭا تۇرپاتتى جاڭعىرۋدىڭ ەڭ باستى شارتى – ۇلتتىق مادەنيەتىڭدى, ۇلتتىق كودىڭدى ساقتاي ءبىلۋ. ولار ساقتالماسا, ەشقانداي جاڭعىرۋ بولمايدى» دەگەن ءسوزى, اسىرەسە كينو سالاسى ءۇشىن قاجەتتى قوزعاۋشى ءسوز. ەلباسىمىزدىڭ وسى باعىت-باعدارى ءفيلمنىڭ يدەياسىنا نەگىز بولدى. ەندى مىنە, ازداعان دەمالىستان كەيىن, جاساعان جۇمىسىڭا رەجيسسەر رەتىندە ەمەس, قاراپايىم كورەرمەن رەتىندە باعا بەرىپ, اتقارعان جۇمىستىڭ ءبارى دە بەكەر بولماعانىن ءتۇسىندىم. ءبىر تىنىستاپ الىپ, اۋقىمدى سەريالدىڭ ەكىنشى ماۋسىمىن ءتۇسىرۋدى قولعا الىپ وتىرمىز, – دەدى ءفيلمنىڭ رەجيسسەرى رۇستەم ءابدىراش.
ون بولىمنەن تۇراتىن جاڭا ماۋسىمنىڭ ستسەناري اۆتورلارى دا بۇرىنعى ستسەناريستەر بولماق.
– تاريحي تۋىندىنىڭ ءبىرىنشى ماۋسىمى كەرەيدىڭ حان تاعىنا وتىرۋىمەن اياقتالسا, ەكىنشى ماۋسىمدا قازاق مەملەكەتتىلىگىنىڭ قالىپتاسۋى مەن دامۋى, جانىبەكتىڭ تاققا وتىرۋى سۋرەتتەلەدى, – دەدى رەجيسسەر.
سونىمەن قاتار بۇل سەريالدا قازاق حاندارىنىڭ مادەني جانە ەكونوميكالىق ورداسى – سىعاناق قالاسى ءۇشىن كورشى مەملەكەتتەرمەن كۇرەسى سۋرەتتەلەدى.
ايتا كەتسەك, «قازاق حاندىعى. التىن تاق» سەريالى جاز ايىنان باستاپ دايىندىق كەزەڭدە بولدى. وسى ۋاقىت ارالىعىندا ستسەناري جازىلىپ, قوسالقى رولدەرگە كاستينگ وتكىزىلدى. سونىمەن قاتار نەگىزگى دەكوراتسيالار قايتا وڭدەلىپ, جاڭادان ەكى ينتەرەر تۇرعىزىلدى ء(رابيا مەن بايبىشەنىڭ بولمەلەرى). رەجيسسەردىڭ ايتۋىنشا, ءفيلمنىڭ ءبىرىنشى ماۋسىمىنداعى قاتەلىكتەرى مەن كەمشىلىكتەرى وسى جولى تولىقتاي ەسكەرىلگەن. جىلدىڭ سوڭىنا دەيىن سەريالدىڭ 40 پايىزىن ءتۇسىرۋ جوسپارلانىپ وتىر.
جوبا پروديۋسەرى ارمان اسەنوۆ تەلەحيكايانىڭ نەگىزگى ءتۇسىرىلىم جۇمىستارى «قازاقفيلم» اۋماعىندا تۇرعىزىلعان دەكوراتسيالاردا, سونىمەن قاتار, كينوستۋديانىڭ پاۆيلوندارىندا جۇرگىزىلەتىنىن ايتتى. تەلەسەريالدا اكتەرلەر قۇرامى وزگەرمەگەن, الايدا, جاڭا ماۋسىم جاڭا كەيىپكەرلەرمەن تولىعادى.
ايگۇل احانبايقىزى, «ەگەمەن قازاقستان»
الماتى