پارلامەنتارالىق بىرلەستىك جۇمىسىنا قاتىستى

تمد-عا قاتىسۋشى مەملەكەتتەردىڭ پارلامەنتارالىق اسسامبلەياسى كەڭەسىنىڭ وتىرىسىندا دوستاستىق مەملەكەتتەرىندەگى بيىلعى سايلاۋلاردى, ونىڭ ىشىندە قازاقستان رەسپۋبليكاسى پارلامەنتىنىڭ سەناتى سايلاۋىن بايقاۋدى ۇيىمداستىرۋعا بايلانىستى باياندامالار تىڭدالدى. سونىمەن قاتار, جيىنعا قاتىسۋشىلار ەكونوميكا جونىندەگى ساراپشىلار كەڭەسىن قۇرۋ ماسەلەسىن قاراپ, رەسەي فەدەراتسياسىنىڭ تمد-عا توراعالىق ەتۋ بارىسى تۋرالى اقپاراتتى تىڭدادى جانە تمد پاا جۇمىسىنىڭ 2018 جىلعا ارنالعان جوسپارىن تالقىلادى.

ۇقشۇ پارلامەنتتىك اسسامبلەياسىنىڭ ونىنشى وتىرىسى بارىسىندا  تەرروريزمگە جانە ترانسشەكارالىق قىلمىسقا قارسى ءىس-قيمىل سالاسىنداعى ۇلتتىق زاڭنامانى جاقىنداستىرۋ, قىلمىستىق ىستەر بويىنشا حالىقارالىق قۇقىقتىق كومەك كورسەتۋ, اقپارات سالاسىنداعى قۇقىق بۇزۋشىلىقپەن كۇرەس  ماسەلەلەرى تالقىلاندى. ۇقشۇ پا 13 ۇلگى زاڭدى قارادى.

قازاقستان سەناتىنىڭ وكىلدەرى «دىنارالىق جانە ۇلتارالىق ۇنقاتىسۋ ارقىلى مادەني الۋاندىق پەن بەيبىتشىلىكتى ىلگەرىلەتۋ» تاقىرىبىمەن وتكەن  پارلامەنتارالىق وداقتىڭ 137-ءشى اسسامبلەياسىنا (پاو) قاتىستى. 150 ەلدىڭ دەلەگاتسياسىن قابىلداعان پاو –173 مەملەكەتتىڭ زاڭ شىعارۋ ورگانى مەن 11 ۇيىمىن بىرىكتىرەتىن تاريحى باي حالىقارالىق ۇيىم.

پاو اسسامبلەياسىنىڭ قورىتىندى وتىرىسىندا «دەموكراتيا: ءبىزدىڭ ءار الۋاندىعىمىزدىڭ ورتاقتىعى تۋرالى جالپىعا بىردەي دەكلاراتسياسىنىڭ قابىلدانۋىنىڭ 20 جىلدىعىنا» قارارى قابىلداندى.

ايتا كەتەيىك, قازاقستان دەلەگاتسياسىنىڭ قۇرامىندا سەناتور سەرگەي ەرشوۆ پەن ەرىك سۇلتانوۆ تا بولدى.