جەكسەنبى كۇنى كاسىپقوي بوكستاعى جەڭىل سالماقتا WBA (Super) بەلبەۋىنىڭ يەگەرى جانات جاقيانوۆ سولتۇستىك يرلانديانىڭ بەلفەست قالاسىنداعى SSE Arena سپورت كەشەنىندە يرلانديالىق رايان بارنەتتپەن IBF جانە WBA بەلدىگىنىڭ الەم چەمپيونى اتاعى ءۇشىن جەكپە-جەك وتكىزەدى.
2013 جىلى جاقيانوۆتىڭ كارەراسىندا ەڭ ماڭىزدى وقيعا بولدى. ءدال سول جىلى ول كاسىپقوي بوكستا ءوز زامانىندا IBF, WBA, IBO بەلدىگى بويىنشا الەم چەمپيونى اتاعىن يەلەنگەن بريتاندىق ريككي حاتتونمەن كەلىسىمشارتقا وتىردى. بۇل ۋاقىتقا دەيىن وتانداسىمىز 21 جەكپە-جەك وتكىزىپ ۇلگەرگەن ەدى. 20 رەت قارسىلاسىنان باسىم تۇسسە, ءبىر رەت ۇپاي سانى بويىنشا جەڭىلگەن-تۇعىن. جاناتتىڭ 2008 جىلدىڭ قازان ايىندا رەسەيدە ۇيىمداستىرىلعان جەكپە-جەكتە تاجىكستاندىق ساحيب ۋساروۆتان جەڭىلىس تاپقان ەدى.
ريككي حاتتوننىڭ پروموۋتەرلىگىنە كەلگەن سوڭ ول ءار جەكپە-جەك سايىن چەمپيوندىق اتاققا ءبىر تابان جاقىنداي ءتۇستى. 2014 جىلدىڭ 26 ساۋىرىندە جاقيانوۆ فرانتسۋز بوكسشىسى كاريم گۋەرفتى بەسىنشى راۋندتا نوكاۋتپەن جەڭىپ, ەۋروپانىڭ EBU بەلدىگىن جەڭىپ الدى. ارادان بەس اي وتكەندە ول رينگ تورىنە قايتا كوتەرىلىپ, بەلورۋسسيادا گرۋزين بوكسشىسى گاگي ەديشەراشۆيليدى ءبىرىنشى راۋندتىڭ اياقتالار تۇسىندا بۇيىرىنەن سوققى جاساپ, شارشى الاڭدا سۇلاتىپ سالدى. ءسويتىپ, EBU چەمپيوندىعىنىڭ جانىنا WBC Eurasia Pacific Boxing Council بەلدىگىنىڭ قوسىپ قويدى. ال 2015 جىلدىڭ جەتىنشى قاراشاسىندا مونتە-كارلودا ۆەنەسۋەلا ەلىنىڭ بىلعارى قولعاپ شەبەرى يونفرەزا پارەحودان ايلاسىن اسىرىپ, جەڭىل سالماقتاعى WBA تيتۋلىنىڭ ۋاقىتشا الەم چەمپيونى اتاعىن يەلەندى. الەم چەمپيونى دەگەن اتاققا ساتى-ساتىسىمەن كوتەرىلگەن جانات جاقيانوۆ وسى جىلدىڭ اقپان ايىندا اقش-تا جەرگىلىكتى بوكسشى روشي ۋوررەنمەن جەكپە-جەك وتكىزىپ, بۇكىلالەمدىك بوكس ۇيىمىنىڭ WBA الەم چەمپيونى دەگەن بەلدىگىن جەڭىپ الدى. سول كەزدەسۋدىڭ العاشقى راۋندتارىندا جاقيانوۆ ەكى رەت نوكداۋنعا ءتۇسىپ قالسا دا, تورەشىلەرگە ەش كۇمان قالدىرماي, جەڭىستى ج ۇلىپ قالعان ەدى. بۇل قازاقستاندىق بوكسشىنىڭ اقش جەرىندە وتكىزگەن تۇڭعىش ايقاسى بولاتىن.
بۇل كەزدەسۋ وتانداسىمىز ءۇشىن ەكىنشى چەمپيوندىق كەزدەسۋ بولماق. قارسىلاسى دا وڭايلىقپەن جەڭىلەتىن بوكسشى ەمەس. IBF تۇجىرىم بويىنشا الەم چەمپيونى اتانعان رايان بارنەتت بۇگىنگە دەيىن 17 كەزدەسۋ وتكىزىپ, بارلىعىندا جەڭىسكە جەتكەن. سونداي-اق, توعىز قارسىلاسىن مەرزىمىنەن بۇرىن تىزە بۇكتىرگەن. الەم چەمپيونى اتاعىن يەلەنگەنگە دەيىن بريتاندىق بارنەتت مەكسيكالىق سيزار راميرەس, فرانتسۋز ەنتوني سەتتول جانە وتانداسى دجەيسون بۋت سەكىلدى تىسقاققان بوكسشىلاردى قوعاداي جاپىرعان. ال وسى جىلدىڭ ماۋسىم ايىندا IBF تۇجىرىم بويىنشا الەم چەمپيونى بەلدىگى بار تاعى ءبىر وتانداسى لي حاسكينسپەن شارشى الاڭدا ايقاسىپ, بەلدىگىن تارتىپ العان. ەندى ول اراعا ءتورت اي سالىپ, سۋ جاڭا بەلدىگىن وتانداسىمىز جانات جاقيانوۆقا قارسى قورعاماق.
رايان بارنەتت – وتە شاپشاڭ بوكسشى. رينگتە ەركىن قيمىلداپ, ۇنەمى ەكى قولىن تومەن ءتۇسىرىپ جۇدىرىقتاسقاندى ۇناتادى. شابۋىلعا شىققاندا ءارتۇرلى سوققىلار جاساپ كورەدى جانە ونىسىن كەلەسىدە قايتالاماۋعا تىرىسىپ باعادى. رينگ بۇرىشى مەن كاناتقا تىعىلۋ ارقىلى قارسىلاسىن وزىنە شاقىرىپ, سول ساتتە كوپ سوققى جۇمساپ قالۋعا ۇمتىلادى. سونىمەن قاتار, ەكى قولىمەن دە بىردەي جۇمىس ىستەپ, قارسى شابۋىلعا يەك ارتاتىنى دا بار.
شامامەن, ەكى بوكسشى رينگتە وسىلاي ويقاستايدى. دەگەنمەن, بوكستا ەڭ باستىسى – تاجىريبە. ال تاجىريبە جاعىنان باسىمدىلىق جاقيانوۆتىڭ ەنشىسىندە. وزىنە سوققى دارىتپاۋ جاعىنان دا وتانداسىمىز وق بويى وزىق تۇر. مۇنى ول ۋوررەنگە قارسى وتكەن كەزدەسۋدە كوپشىلىككە دالەلدەگەن. بىراق, بارنەتتىڭ سوققىسى امەريكالىققا قاراعاندا اۋىرلاۋ. جاقيانوۆ وسىنى ەسكەرۋى ءتيىس.
ءبىر قىزىعى, جاقيانوۆ پەن بارنەتت ەكى جىلعا جۋىق ريككي حاتتوننىڭ قول استىندا جاتتىققان. ءتىپتى, ەكەۋى ءبىر-بىرىنە سپاررينگ-سەرىكتەس تە بولعان. بىراق, 2015 جىلى رايان بارنەتت حاتتوننىڭ كومانداسىنان كەتىپ, ادام بۋتتىڭ قاراماعىندا جاتتىعا باستادى. بارنەتت اعىلشىندىق باسىلىمدارعا بەرگەن سۇحباتىندا جاقيانوۆپەن بولعان سپاررينگتە جەڭىلىپ قالعانىن ايتقان. «مەن ونىمەن ءبىر-ەكى رەت سپاررينگ وتكىزىپ, تاجىريبەسىزدىگىمنىڭ ارقاسىندا ەسە جىبەرگەنمىن. مەن ول كەزدە 19-20, ال جاقيانوۆ 27 جاستا بولاتىن ەدى. قازىر مەنىڭ تاجىريبەم تولىسىپ, جاسىم ۇلكەيدى. بۇل جولى مەن جەڭىسكە جەتەمىن».
ال ريككي حاتتون بارنەتتىڭ شاماسىن جاقسى بىلەتىنىن, ول جاقيانوۆتى جەڭە المايتىنىن ايتادى. «مەن ەكى جىلعا جۋىق راياندى جاتتىقتىردىم. ونىڭ مىقتى تۇستارىن بىلەمىن. ول وتە تالانتتى بوكسشى. بىراق, جاناتتى جەڭە الادى دەپ ويلامايمىن. ەگەر ول جاقيانوۆتى ءبىرىنشى راۋندتاردا سوققىنىڭ استىنا الماسا, ونى قيىن كەزدەسۋ كۇتىپ تۇر. ولار ءبىر كەزدەرى بىرگە سپاررينگ وتكىزگەن. بىراق قازىر ءبارى باسقاشا. رايان وسى ۋاقىتقا دەيىن جاقيانوۆ سەكىلدى مىقتى بوكسشىلارمەن كەزدەسىپ كورگەن جوق. شاكىرتىم كاريم گەرفي سەكىلدى ەۋروپا چەمپيونى, روۋشي ۋوررەن سياقتى الەم چەمپيوندارىنا قارسى جۇدىرىقتاستى. ال راياننىڭ ەڭ اتاقتى قارسىلاسى – لي حاسكينس بولدى. بىراق ونىڭ دەڭگەيى كەرەمەت ەمەس», − دەيدى حاتتون.
قورىتا ايتقاندا, بوكس سپورتى شاحمات سياقتى عوي. كىم اقىلدى ءجۇرىس جاسايدى, سول جەڭىسكە جەتەدى. جاقيانوۆ-بارنەتت كەزدەسۋىندە دە كىم دۇرىس تاكتيكا ۇستانسا, سول بوكسشى جەڭەدى. بوكس كەشى 21 قازان كۇنى 00:30-دا باستالسا, جاقيانوۆ-بارنەتت ايقاسى استانا ۋاقىتى بويىنشا 03:45-كە جوسپارلانعان.
ءالي بيتورە,
«ەگەمەن قازاقستان»