«بارىس» ءوز ايدىنىندا «ادميرالدى» ۇتتى

«Qazsport» تەلەارناسىنان تىكەلەي ەفيردە كورسەتكەنىندەي, ءبىرىنشى كەزەڭدە وسىعان دەيىن جاراقاتىنا بايلانىستى ايدىنعا شىعا الماي كەلگەن «بارىستىڭ» كاپيتانى نايدجەل دوۋس 7-مينۋتتا ەسەپ اشىپ, بيىلعى چەمپيوناتتاعى 19-ىنشى گولىن سوقتى. ايتسە دە ىلە-شالا ءتارتىپ بۇزعان انتون ساگادەەۆ ايدىننان قۋىلىپ, مۇنى قوناقتار ءساتتى پايدالانا ءبىلىپ, كانادالىق شابۋىلشى دجەيمس رايت تارازى باسىن تەڭەستىردى.

ەكىنشى كەزەڭدە 32-مينۋتتا «بارىستىڭ» قورعاۋشىسى ماكسيم سەمەنوۆ مەرگەندىك تانىتىپ, وسى بىرىنشىلىكتەگى العاشقى گولىن سوعىپ, كومانداسىن العا شىعاردى. سودان كەيىن تالعات جايلاۋوۆ 35-مينۋتتا ەسەپتى 3:1-گە جەتكىزدى, بۇل ونىڭ بيىلعى ماۋسىمداعى ءتورتىنشى گولى ەدى. «ادميرالدىڭ» قوس بىردەي حوككەيشىسى ايدىننان قۋىلعان ساتتە ن.دوۋس 39-مينۋتتا وسى ماتچتاعى ءوزىنىڭ ەكىنشى گولىن قارسىلاستار قاقپاسىنا ەنگىزدى.

ءۇشىنشى كەزەڭدە 47-مينۋتتا قوناقتار ساپىنداعى امەريكالىق قورعاۋشى دجوناتون بلۋمنىڭ الىستان باعىتتاعان شايباسىن «بارىستىڭ» قاقپاشىسى, شۆەتسيالىق لەگيونەر حەنريك لارسسون تويتارا المادى. ماتچ بىتۋگە ءۇش مينۋتتاي ۋاقىت قالعاندا, «ادميرالدان» سلوۆەنيالىق شابۋىلشى روبەرت سابوليچ ەسەپتى 4:3-كە دەيىن قىسقارتتى. بۇدان كەيىن قوناقتار قاقپاشىسىن اۋىستىرىپ,  ايدىنعا التىنشى ويىنشىسىن شىعارعانىمەن, ەشتەڭە بىتىرە المادى.

وسىلايشا, تارتىستى باسەكەدە «ادميرالدى» 4:3 ەسەبىمەن تىزە بۇكتىرگەن استانالىقتار 40 ۇپايمەن قحل-دىڭ شىعىس كونفەرەنتسياسىندا ءۇشىنشى ورىنعا كوتەرىلدى. ءوز ايدىنىنداعى ويىنداردى ونشا ءساتتى وتكىزبەي جۇرگەن «بارىس» مۇنىڭ الدىندا «امۋر» (حاباروۆسك) كومانداسىنا 1:3 ەسەبىمەن ەسە جىبەرگەن بولاتىن. ەۆگەني كورەشكوۆتىڭ شاكىرتتەرى الداعى ءتورت بىردەي كەزدەسۋىن سىرت ايدىندا وتكىزىپ, سونىڭ العاشقىسىندا 21 قازان كۇنى نيجني نوۆگورود قالاسىندا جەرگىلىكتى «تورپەدو» كومانداسىمەن شەبەرلىك بايقاسادى.