وڭتۇستىك قازاقستان وبلىسى سايرام اۋدانى ايماعىنداعى ءسىبىر جاراسى وشاعى كومىندىسىن بەتونداۋ جۇمىستارىنا وبلىستىق بيۋدجەت ەسەبىنەن 101 ملن تەڭگە ءبولىندى. بۇل تۋرالى وقو وڭىرلىك كوممۋنيكاتسيالار قىزمەتىندە وبلىستىق توتەنشە جاعدايلار دەپارتامەنتى باسشىسىنىڭ ورىنباسارى باتىرعالي سوپبەكوۆ پەن وبلىس اكىمى اپپاراتىنىڭ قۇقىق ءبولىمىنىڭ باس مامانى مەيىركۇل باتىربەكوۆا وتكىزگەن ءباسپاسوز ءماسليحاتىندا ءمالىم بولدى.
ايتا كەتەيىك, سايرام اۋدانى قارامۇرت اۋىل وكرۋگى جارتوبە اۋماعىنداعى اقسۋ وزەنىنىڭ جاعالاۋىندا 1987 جىلى ءسىبىر جاراسىن جۇقتىرعان بىرنەشە قارا مال كومىلگەن بولاتىن. الايدا ۋاقىت وتە كەلە اقسۋ وزەنىنىڭ ارناسى كەڭىپ, كومىندىگە قاۋىپ ءتونۋ فاكتىسى انىقتالعان. ناقتىراق ايتساق, كوكتەمگى سۋ تاسقىنى كەزىندە اقسۋ وزەنى سۋى تاسىپ, وزەن ارناسىن قورعاۋ ماقساتىندا سالىنعان ۇزىندىعى 200 مەتر, بيىكتىگى 2 مەتردەي بەتون پليتالارى بۇزىلعان. سونداي اق, وزەن ارناسىنان زاڭسىز شاعال تاس ماتەريالدارىن الۋ سالدارىنان ءسىبىر جاراسى وشاعى كومىندىسىنىڭ اشىلىپ كەتۋ قاۋپى تۋىنداعان. وسىعان بايلانىستى تاياۋدا توتەنشە جاعدايلاردىڭ الدىن الۋ جانە جويۋ جونىندەگى ارنايى كوميسسيا قۇرىلىپ, اتالعان ءسىبىر جاراسى وشاعى كومىندىسىنىڭ بۇگىنگى احۋالىن قاناعاتتانارلىقسىز دەپ تاپتى.
ء«بىزدىڭ دەپارتامەنت تاراپىنان سايرام اۋدانىنىڭ اكىمىنە ءتيىستى ءىس-شارالاردى شۇعىل تۇردە اتقارۋ ماقساتىندا اقسۋ وزەن ارناسىنىڭ بويىندا زاڭسىز جۇمىس جۇرگىزىپ جاتقان كارەر جۇمىستارىن توقتاتۋ تۋرالى ۇسىنىس جولداندى. سونىمەن قاتار مال ولەكسەسى كومىلگەن اۋماقتا ارنا تۇزەۋ جانە جاعا بەكىتۋ جۇمىستارىن جۇرگىزۋ تۋرالى ءتيىستى باسقارمالارعا ناقتى شارالار قابىلداۋ قاجەتتىگى تۋرالى تاپسىرمالار بەرىلدى», - دەدى باتىرعالي سارسەنبەك ۇلى.
قازىرگى تاڭدا سايرام اۋدان اكىمدىگىمەن توتەنشە جاعدايدى جاريالاۋ تۋرالى شەشىم قابىلدانىپ, اۋدان اكىمى تاراپىنان مەردىگەر تارتىلىپ, ءتيىستى جۇمىستار جۇرگىزىلۋدە.