وڭتۇستىك قازاقستان وبلىسىندا كاداسترلىق قۇنى 603 814 600 تەڭگەنى قۇرايتىن 364,4 مىڭ گەكتار جەر مەملەكەت مەنشىگىنە قايتارىلدى. بۇعان جەر ۋچاسكەلەرىنە جۇرگىزىلگەن تەكسەرۋ جۇمىستارىنىڭ ارقاسىندا قول جەتكىزىلىپ وتىر. بۇگىن بۇل تۋرالى وڭىرلىك كوممۋنيكاتسيالىق ورتالىعىندا وتكەن ءباسپاسوز ءماسليحاتىندا وبلىستىق جەر ينسپەكتسياسى باسقارما باسشىسىنىڭ ورىنباسارى التىنبەك مىرزاەۆ ءمالىم ەتتى.
بيىل باسقارماعا جەكە جانە زاڭدى تۇلعالاردان, مەملەكەتتىك, قۇقىق قورعاۋ جانە جەرگىلىكتى ورگاندارىنان 4708 ارىز-شاعىم كەلىپ تۇسكەن. ونىڭ 3797-ءى قارالىپ, 286-سىنا تەكسەرۋ تاعايىندالعان. ناتيجەسىندە جەر ۋچاسكەلەرىن ءوز ماقساتىنا ساي پايدالانباعان جانە جەر زاڭنامالارىن بۇزعان 218 جەر ۋچاسكەسىنە 8 871 000 تەنگە ايىپپۇل سالىنىپتى.
«بۇگىندە سالىنعان ايىپپۇلدىڭ 3 978 000 تەڭگەسى ءوندىرىلىپ, ولارعا زاڭ بۇزۋشىلىقتاردى جويۋ تۋرالى نۇسقامالار بەرىلدى. جەرگىلىكتى اتقارۋشى ورگاندار تاراپىنان زاڭسىز قابىلدانعان جانە جىلجىمايتىن م ۇلىكتى جاريا ەتۋ كوميسسياسىنىڭ جالعان شەشىمدەرىمەن 131 شەشىمدى جويۋ تۋرالى سوت ورگاندارىنا تالاپ-ارىز بەرىلىپ, ونىڭ 69-ى قاناعاتتاندىرىلىپ وتىر», - دەيدى التىنبەك ابدىقايىم ۇلى.
بۇدان بولەك, اۋىل شارۋاشىلىعى ماقساتىنداعى 1235 جەر يەلەرىنىڭ 45157 گەكتار جەرى انىقتالىپ, جەر زاڭدىلىعىنىڭ بۇزىلۋىن جويۋ جونىندە نۇسقامالار بەرىلگەن. سونداي-اق 1748 جەر يەسىنىڭ 83 300 گەكتار جەرىنە قايتا تەكسەرۋ جۇمىستارى جۇرگىزىلىپ, ناتيجەسىندە 4 جەر يەسى 244,6 گەكتاردى قۇرايتىن جەرىنەن ءوز ەركىمەن باس تارتىپتى. بۇگىندە بۇل جەرلەر مەملەكەت مەنشىگىنە قايتارىلسا, 5 جەر يەسىنىڭ 73,9 گەكتار جەرىن مەملەكەتكە ماجبۇرلەپ قايتارۋ تۋرالى سوتقا تالاپ-ارىز دايىندالۋدا.