قولتاڭبا

اۆتور مەن وقىرماننىڭ بەرىك بايلانىسىن ايقىندايتىن التىن ارقاۋ

قولتاڭبا اۆ­تور مەن وقىرمان­نىڭ بەرىك بايلانى­سىن, كوزقاراس مۇراتتا­رىن, ساباقتاستىق سىرلا­رىن ايقىندايتىن التىن ار­قاۋ ەكەنىن ءبارىمىز دە بىلەمىز.

ول كوبىندە قىسقا-نۇسقا ءۇل­گىدە بەرىلۋى مۇمكىن.

قولتاڭبا مۇراتى مەن تاعى­لى­مىنىڭ قايسىبىر تۇستارىن جازۋشى ەڭ­بەگى مەن شىعارماشىلىق ۇدەرىسى ءتوڭى­رە­گىندە وربىتۋگە ابدەن بولادى. وسى ورايدا, ءسوز جوق, جازۋشى ءا.نۇرشايىقوۆتىڭ شى­عار­­ماشىلىق شەبەرحاناسىنا ەنۋدىڭ پاي­داسى مول.

جۋرناليست-جازۋشى ءازىلحان نۇر­شا­يى­قوۆ­تىڭ شىعارماشىلىق مۇراسى قالىڭ كوپتىڭ قىزىعۋشىلىعى مەن قۇرمەتىنە ەرتە يە بولعانى بەلگىلى. تانىمال تۇلعانىڭ شىعارماشىلىق ءومىربايانىنا ءجىتى دەن قويساق, ويلى وچەركتەن – پاراساتتى پرو­زانىڭ بەل-بەلەستەرىنە ەركىن كوتە­رىلىپ, ونىڭ بارشاسىندا – ادام الەمى, ءومىرى مەن ەڭبەگى, ادالدىق پەن ادىلەتتىلىك, كىسىلىك پەن كىشىلىك, يگىلىك پەن ىزگىلىك سىندى سىر-سيپاتى جوعارى قا­سيەت­تەر شىندىق قال­پىندا كورسەتىلىپ, ۋاقىت تىنىسى كەڭ كولەمدە كورىنىس بەرەدى.

كورنەكتى قالامگەردىڭ زامانداستارى مەن تۇستاستارى سەكىلدى ءوز كەزەگىمدە كەش-كەزدەسۋ, سۇحباتتاردا بىرگە بولعان, قاتار جۇرگەندەگى جارقىن جۇزدەسۋ مەن ساۋلەلى ساتتەردىڭ, نۇرلى بەينەنىڭ اسەر-ىقپالى مول بولدى. اسىرەسە, جازۋشى شىعارما­شىلىعىنا قاتىستى جۇزدەسۋ-سۇحباتتار, جەكەلەگەن كەيىپكەرلەر حاقىنداعى كوزقا­راستار (مىسالى, پروفەسسور اۋەنوۆ –  م.اۋە­زوۆ, كەربەز – ب.شالاباەۆ, مەڭتاي – ن.نۇربوسىنوۆا, جومارتبەك – م.ءدۇي­سەنوۆ, زايكۇل- كۇلزاي سماعۇلوۆا, تانا – تۇر­سىن سەرىكباەۆا ت.ب.) ادەبي-كوركەم قىر­لارى­مەن, اقيقات جايتتار مەن شىندىققا سى­يىم­دى سيپاتتارىمەن تارتىمدى, بەرەر دەرەگىمەن ءماندى, تاعىلىمدى تۇستارىمەن ماڭىزدى ەدى. كەزىندە جازۋشىمەن جۇزدە­سۋلەردى سىرلى سۇحباتقا اينالدىردىق. ورتا جانە جوعارى مەكتەپ باعدار­لاما­سىنا سايكەستەندىرىپ, وقۋ قۇرالدارىن دا­يىن­دادىق (مىسالى, «ءازىلحان نۇرشا­يىقوۆ». ءومىرى مەن شىعارماشىلىعى. وقۋ-ادىستە­مەلىك قۇرال. – استانا: ەۇۋ, 2007; «ءازىل­حان نۇرشايىقوۆتىڭ شىعار­ما­شىلىق مۇراسى». وقۋ قۇرالى. – ال­ماتى: قازاق ۋنيۆەرسيتەتى, 2005).

ايرىقشا اتاپ وتەر جايت: جازۋشىنىڭ جەكە مۇراعاتىندا, ورتالىق مەملەكەتتىك مۇراعاتتا – قولجازبادان كىتاپقا دەيىنگى ءار الۋان دەرەك كوزدەرى, قوسىمشا ماتەريالدار, الدەنەشە جوبا-نۇسقالار, حات-جازبا­لاردان كۇندەلىككە دەيىنگى مىڭ سان ۇلگى-ورنەكتەر, جۋرناليستىك ساپاردان-جازۋشى ەڭبەگىنە دەيىنگى ارالىقتاعى ىزدەنىس پەن كوزقاراستار, كوركەمدىك قۇپيا­سىنا قاتىستى ويلار مەن تولعانىستار, ءتۇيىن-تۇجىرىم­دار, قىسقاسى شىعارما­شى­لىق ۇدەرىس تابيعاتى مەن تاعىلىمىنا بايلا­نىستى الۋان تاقىرىپتار, جوبا-جوسپارلار, قانات­تى سوزدەر مەرزىم-ۋاقىتى, رەت-جۇيەسىنە سايكەس ورىن العان. دايىن­دالۋى مەن ساقتالۋى كوڭىلگە قونادى.

اقيقاتىندا, قالامگەردى قالىڭ كوپ­شىلىك پەن وقىرمان ورتاسىندا ءجيى كورەتىن ەدىك. ستۋدەنت جاستارمەن بولعان سىر-سۇحبات, كەش-كەزدەسۋلەردە جازۋشى ەڭبەگى مەن شىعارماشىلىق ۇدەرىس ماسە­لەسى كە­ڭىنەن قوزعالاتىن. سۇراق-جاۋاپ – سىر-سۇحبات­قا ۇلاساتىن. اتاپ وتەر جايت, جازۋ­شى قايسىبىر كەش-كەزدەسۋ, سۇحبات­تاسۋ تۇسىندا مىندەتتى تۇردە قولتاڭبا بەرۋ ءىسىن جۇزەگە اسىراتىن. ۋاقىتتىڭ باسىم بولىگىن وسى تۇسقا ارنايتىن-دى.

جازۋشى قولتاڭباسى ءجۇردىم-باردىم ورىندالمايتىن. قولتاڭبا الۋشىنىڭ نا­زارىن وزىنە اۋدارىپ, اتى-ءجونىن, جۇمىس ورنىن, كاسىپ-داعدىسىن, اجار-كوركىن, اقىل-پاراساتىن كورىپ-سەزىپ, ەستىپ-بىلگەن سوڭ عانا كوڭىل تولقىنىنان تەبىرەنىپ, تەربەلىپ شىققان اسەرلى, ءماندى تۇستاردى بايىپپەن, مارجانداي ءتىزىپ, جۇيەلى جەتكىزەتىن. قولتاڭبا الۋشىنىڭ قاي-قاي­سىسىنىڭ دا كوڭىلى ءوسىپ, ەرەكشە سەزىمگە بولەنىپ, مارقايىپ قالاتىن.

ايتا جۇرەر اسەر-ىقپالى مەن تا­عىلىمدى تۇستاردى ءبىز دە الدەنەشە رەت باستان وتكەردىك. جازۋشى ەڭبەگى مەن شى­عارماشىلىق مۇراسىنا قاتىستى ىزدەنىس-زەرتتەۋلەر تۇسىندا – ءا.نۇرشايى­قوۆپەن بىرنەشە رەت كەزدەسۋدىڭ ءساتى تۇسكەنى بار. جازۋشى ۇيىنە جولىم تۇسكەن ساتتەردە قولىمدا ۇنەمى ونىڭ كىتاپتارى بولاتىن («ماحاببات, قىزىق مول جىل­دار», «اقيقات پەن اڭىز», «ءومىر ورنەك­تەرى», «مەن – ءجۋرناليستپىن», «قالامگەر جانە ونىڭ دوستا­رى», «ماڭگىلىك ماحاببات جىرى», ت.ت.).

جەكە كىتاپحانامنان كورنەكتى ورىن العان سول جازۋشى ەڭبەكتەرىن قولعا العان­دا العاش كوزگە تۇسەتىنى, ءسوز جوق, ونىڭ قولتاڭباسى دەسەك, قالامگەردىڭ ءوز قولتاڭ­باسىنا كوڭىل تولقى­نىنىڭ بەدەرلى, ساۋلەلى تۇستارىن تۇسىرە­تىنى, جان-جۇرەكتەگى بەينەلى كورىنىس­تەردى لەبىز-تىلەك تۇرىندە جۇيەلى جەتكىزەتىنى نازار اۋدارتار ەدى.

ءيا, جازۋشى قولتاڭباسىنىڭ باستى بەلگىسى, جارقىن ۇلگىسى «... 9 جىل عاشىق بول­عان, 54 جىل بىرگە باقىتتى ءومىر ءسۇر­گەن جان جارى, ماڭگىلىك عاشىعى » (قالام­گەردىڭ ءوز ءسوزى) حاليماعا ارناعان, قالىڭ كوپشىلىككە ەتەنە تانىس جولداردان ايقىن اڭعارۋعا بولادى. ونىڭ باستى, ءارى العاش­قىسى, جازۋشى سوزىمەن ايتساق: «...وزىمە ەرەكشە ۇنايتىنى مىنا ءبىر شۋماق»:

حاليماعا

قاسيەتتەپ, قۇرمەتتەپ,

سەنىڭ ماحابباتىڭدى.

ۇرپاققا ۇلگى بولسىن دەپ,

الاشقا جايدىم اتىڭدى

(«ماڭگىلىك ءوز ءازىلحانىڭ. 03.04.03 ج.»).

P.S. بۇل حاليماعا قويىلعان قۇلپى­تاستاعى ەپيتافيا

بۇدان وزگە: «مەن پروزالىق «حاليمادان» باسقا «مۇڭدى ماقامدار» دەگەن اتپەن جان-جارىما ارنالعان ساعىنىش سا­رىن­دا­رىن-2000 جولدان اسا ولەڭ ەتىپ جاز­دىم», – دەگەنىنەن دە جازۋشى قولتاڭباسى, قۇرمەتى مەن تاعىلىمى تەرەڭ تانىلادى. قولتاڭبا مۇراتى, بەدەرى كورىنىس بەرەدى.

كەزەكتى تۇستا جازۋشى ءا.نۇرشايىقوۆقا تارتۋ ەتىلگەن كىتاپتارداعى قولتاڭبالارعا نازار اۋدارالىق. ادەبيەت زەرتتەۋشىسى م.دۇيسەنوۆ «عاسىرلار سىرى» كىتابىنىڭ العاشقى بەتىنە بىلاي دەپ قولتاڭبا قالدىرعان:

«قادىرلى ءازىلحان!

تابيعاتتىڭ سىرى بار اشىلماعان

دەرەكتەر كوپ ءالى دە باسىلماعان.

كەيدە ولاي جورىلعان, كەيدە بۇلاي,

ادامزاتتىڭ تاريحى عاسىرلاردان.

بىلسەم-داعى ءالجۋاز ءوز جايىمدى,

كوپ ىزدەدىم, تاۋىسىپ كوز مايىمدى.

«قۇدىق قازدىم ينەمەن» ەرىنبەدىم,

جاقىندىعىن بىلسەم دە «كۇز» ايىمنىڭ.

جازعانىم جوق تاريحتا قالايىن دەپ,

قالاماقى مولىراق الايىن دەپ.

ايامادىم جۇرەكتى, جارالادىم,

كادەسىنە جاستاردىڭ جارايىن دەپ.

ءوزىڭنىڭ مىرزابەگىڭ. 30.07.88. اۋرۋحانا».

داڭقتى اقىن و.سۇلەيمەنوۆ «از ي يا» كىتابىنا تومەندەگىدەي قولتاڭبا جازىپ قالدىرعان ەكەن: «ازەكەگە, سولداتقا-جازۋ­شىعا-ناعىز ادامعا.

قۇرمەتپەن, ولجاس ءىنىڭىز.

22.02.84 ج.».

«از ي يا» كىتابىنىڭ جاڭا باسىلىمىنا ارناعان ءسوزى:

«قۇرمەتتى, سۇيىكتى ازەكەمە. ولجاس,

4.09.92 ج.».

ا.بايتاناەۆ:

تۋىستىققا بەرگىسىز دوستىعىمىز ءاماندا جالعاسا بەرسىن.

(«جاڭعىرعان دالا», رومان, 1965).

م.الىمباەۆ:

اسىل ءسوزدىڭ عاشىعى, باعالى ويدىڭ عالىمى ءاز-اعاڭا!

(«مارجان ءسوز», 1978)

اسەت بەيسەۋوۆ:

قازاق حالقىنىڭ ارداقتى ۇلى, تاماشا جاس ارۋلاردىڭ جازۋشىسى, تالانتتى ازەكەڭە.

(12.10.1976).

م.ماقاتاەۆ:

ءاز اعاما!

مەنىڭ ادەبيەتتەگى كىندىك اتاما.

(1970)

ق.مىرزاليەۆ:

قۇرمەتتى ءاز اعا!

اسپانداي تازا اعا!

قىزىقتى كىتاپتى,

سىزدەي ەل جازا ما؟!

م.شاحانوۆ:

ونەردە كەڭ قانات, يىقتى,

قىرانداي اڭساعان بيىكتى.

تالانتىن جاستىق شاق قولداعان,

جاستىقتىڭ انىندەي سامعاعان.

ازامات اعاسىڭ سۇيىكتى...

جاستىقتاي قىمباتسىڭ سەن ماعان!

(1977)

جازۋشى ەڭبەگى دەگەندە ەسكە تۇسەدى, ول – قالامگەر قولتاڭباسى, ونداعى اۆتورلىق ۇستانىم مەن جان­جۇرەك جازباسىنىڭ كوڭىل تولقىنى ارقىلى قىسقا-­نۇسقالى ۇلگىدە بەرىلىپ, ونىڭ ءوزى وزگەشە قۇرمەت پەن قولداۋ, ەرەكشە ءمان­-ماڭىز بەرىلۋىمەن دە شىنايى سىيلاستىق پەن سۇيىسپەنشىلىكتى ايقىن اڭعار­تادى. بىزدىڭشە, جازۋشى ەڭبەگىندەگى ايرىقشا ءىز-­بەدەرى بار – قولتاڭبا تاريحى مەن تاعىلىمىنان, ءومىر شىندىعى مەن ۋا­قىت تىنىسىنان وزگە ادام مەن ونىڭ ومىرىنە قاتىستى كوزقاراس مۇراتتارى, قا­رىم-­قاتىناس ءھام سىيلاستىق يىرىمدەرى, كو­ڭىل نۇرى, مەيىرىم شۋاعى ءجىتى كورىنىس بەرەدى.

ەندى ءبىر ءسات اكادەميك س.قيراباەۆقا ۇسىنىلعان كىتاپتارعا جازىلعان قولتاڭ­باعا ءۇڭىلىپ كورەلىك.

«قىمباتتى ءاليا ء(الياش), سەرىك (سەكە)!

سىزدەرگە ءومىر بويى وتەي الماي كەلە جاتقان ءدام قارىزىم بار ەدى. سونىڭ ەسەسىنە وسى كىتاپتى ۇسىنامىن. قاعاز دا بولسا, قازى مەن قارتاداي كورىپ, قابىل الۋلا­رىڭىزدى سۇرايمىن. مۇنداعى ادامداردىڭ ءبارىنىڭ دە تولىمدى بەينەلەرى جاسالعان جوق. ويتكەنى, بۇل كوركەم رومان ەمەس, كوز كورگەندى بلوكنوتقا تۇرتكىلەي بەرگەننەن تۋعان دۇنيە عوي – ەپيستوليارلىق ەڭبەك. سوندىقتان بەينەمىز جارقىراپ كورىنبەپ­تى دەپ رەنجىمەڭىزدەر. جارقىراپ تۇرماسا دا, جاستىق شاعىمىزدىڭ ءبىر بەلگىسى عوي.

زور قۇرمەتپەن: اعالارىڭ − ۇرپاق­ۇرىم بۇتاعى مىڭ بولىپ وركەندەگىر ارداقتى رىمبالا اپانىڭ «كيىمشەڭ» ۇلدارىنىڭ ءبىرى

ءاز.نۇرشايىقوۆ.

28.VIII.2000 ج. الماتى.

«قىمباتتى كەلىنىم ءاليا!

بۇل كىتاپ - 2006 جىلى شىلدە ايىندا 40 جازۋشى, ءارتىس, عالىمدار «الاتاۋ» سانا­تو­ريىندە بىرگە دەمالعان, سىيلاس, سىر­لاس بولعان كۇندەردىڭ بەلگىسى بولسىن, قالقام.

اسا قادىرلى ءىنىم سەرىك ەكەۋىڭىزگە زور قۇرمەتپەن سىيلايمىن.

ءاز.نۇرشايىقوۆ.

17.07.2006 ج.

«الاتاۋ» ءساناتوريى.

پروفەسسور تۇرسىنبەك كاكىشەۆكە ار­نال­عان قولتاڭبادا بىلاي دەپ جازىلعان:

« كاكىشەۆ تۇرسىنبەككە!

جۇرەگى جالىندى, كوڭىلى داريا, ءسوزى التىن – ارداقتى كەلىنىم كۇبىراعا!

قايناعالىق كوڭىلمەن, ىقىلاسپەن, ريزا­لىقپەن!

ءاز.نۇرشايىقوۆ.

7.XII.1966 ج.»

«قىمباتتى ءىنىم, دوسىم, سىيلاسىم, سىرلاسىم تۇرسىنبەك پەن قادىرلى كەلىنىم – دوس باۋىرىم كۇبىراعا, اعالىق ىقىلاسپەن.

ءاز.نۇرشايىقوۆ.

23.II.1970 ج. »

« قۇرمەتتى تۇرسىنبەك!

ەلۋ جاسقا تولعان تويىڭمەن شىن جۇرەكتەن قۇتتىقتايمىز. ۇزاق ءومىر ءسۇرىپ, تىرشىلىگىڭنىڭ جەمىستى ءار جىلى ەلۋ جىلدىق ماڭگىلىك ومىرگە اينالسىن دەپ تىلەيمىز. ودان كەلىن ۇمىتسا, ۇرپاق كىنالى, سەن كىنالى ەمەسسىڭ.

حاليما, ءازىلحان نۇرشايىقوۆتار.

25.IX.1977 ج. الماتى».

قالامگەر ق.ءالىم ۇزاق ۋاقىت بويى     ءا.نۇرشايىقوۆپەن كەزدەسىپ ءھام سۇحبات­تاسىپ, ءتىپتى ءوزارا حات-جازبالار ارقىلى دا بەرىك بايلانىس ورناتقانى – «ماحاببات جىرشى­سى» (ەپيستوليارلىق حيكايات) اتتى ەڭبەگىنەن كەڭ ورىن العان ەكەن. ورايلى تۇستا ءا.نۇرشايىقوۆ قالامگەر ارىپتەسىنە ءبىرسى­پىرا كىتاپتارىن تارتۋ ەتىپتى. ارينە, كىتاپتاردىڭ العاشقى بەتىنە – قولتاڭبا قالدىرعان. وقىپ كورەلىك:

«قايسار الىمگە!

قىمباتتى قايسار ءىنىم! بۇل مەنىڭ ءوز ۇستازىم مۇقان يمانجانوۆ تۋرالى جازعان كىتابىم ەدى. ءسىز وتكەن اعالاردى «ءولتىر­مەي» – ۇمىتپاي ارداقتايتىن ابزال ازامات­تاردىڭ ءبىرىسىز عوي. ءسىزدىڭ سول اعالارعا دەگەن اسىل ىلتيفاتىڭىزعا, شەكسىز ءسۇيىس­پەن­شىلىگىڭىزگە دەگەن ريزاشىلى­عىم­­نىڭ بەلگىسى رەتىندە بۇل كىتابىمدى وزىڭىزگە ەرەكشە ىقىلاسپەن سىيلايمىن.

قابىل العايسىز.

كەلىن, بالالار ءبارىڭىزدىڭ باقىتتى بو­لۋلارىڭىزعا شىن جۇرەكتەن تىلەكتەسپىن.

 زور قۇرمەتپەن:

ءاز.نۇرشايىقوۆ.

20.IX.2001 ج. الماتى.

«قايسار جانە التىن الىمدەرگە!

قىمباتتى قايسار! اياۋلى التىن!

بۇل حاليما اپالارىڭ تۋرالى كىتاپ. جاقىندا ول كىسىنىڭ 80 جىلدىعىن وتكىز­دىم. سول تويدان تابارىك دەپ قابىلدا­عايسىزدار.

 وزدەرىڭىزگە دەگەن شەكسىز قۇرمەتپەن,

ءاز.نۇرشايىقوۆ.

 20.05.2005 ج.».

وقىپ, تانىسقان قولتاڭبا بەدەرىنەن قالامگەردىڭ ارىپتەسىنە دەگەن كوڭىلى كىرشىكسىز ەكەنى بىردەن كورىنىپ-اق تۇر. جالپى مۇنداي اقجولتاي لەبىز-تىلەكتەردەن اۆتور مەن وقىر­مان اراسىنداعى بايلانىس-ساباق­تاستىقتى, ءوزارا قۇرمەت پەن قول­داۋ­دى, ءار كەزەڭ, تۇستار­داعى سۇحباتتاردىڭ سىرلى سي­پات­تارىن, ەڭ نەگىزگىسى ادامي كوڭىلدىڭ قارا­پايىم قاعيدات­تارى مەن ۇلگى-ورنەك­تەرىن, ىزگىلىك يىرىمدەرىن تەرەڭ تانۋعا بولادى.

جازۋشى قولتاڭباسى جەكە كىتاپحا­نامداعى ەڭبەكتەردەن دە ورىن العان. ونىڭ دا بىرنەشەۋىن وقىپ كورەلىك:

«قىمباتتى راقىمجان ءىنىم!

سىزگە بۇل كىتابىمدى («ماحاببات, قى­زىق مول جىلدار» – ر.ت.) ءوزىڭىزدىڭ تانىم­دىق قۋاتى كۇشتى – «پارىز بەن پارا­سات» اتتى جاڭا كىتابىڭىزعا باي­عازى رەتىندە ۇسىنامىن.

ءسىزدىڭ مەنىڭ بۇل رومانىم تۋرالى عى­لىمي-زەرتتەۋ جۇمىسىن جازعانى­ڭىز­عا ءتانتىمىن...

ءوزىڭىزدىڭ عىلىمي, ادەبي شىعارما­شى­لىق قىزمەتتەرىڭىزدىڭ جىل سايىن جەمىستى بولا بەرۋىنە شىن جۇرەكتەن تىلەكتەسپىن.

زور قۇرمەتپەن – اعاڭىز ءاز.نۇر­شايىقوۆ.

20.12.2003 جىل»

«قىمباتتى ءىنى دوسىم! باۋىرىم! اۆتو­رىم! قادىرلى, اسا كىشىپەيىل راقا! سىزگە شىن جۇرەكتەن العىسىمنىڭ ءبىر بەلگىسى وسى كىتاپ («اقيقات پەن اڭىز» – ر.ت.), وسى قولتاڭبا بولسىن.

زور قۇرمەتپەن, ءاز.نۇرشايىقوۆ.

23.04.2005».

«استانا قالاسىنداعى ەۋرازيا ۋني­ۆەرسي­تەتىنىڭ پروفەسسورى ر.تۇرىس­بەككە! ارداقتى باۋىرىم راقىمجان!

سىزگە دەگەن سۇيىسپەنشىلىگىمدى قالاي اي­تىپ, نە دەپ جەتكىزەرىمدى بىلمەي وتىر­مىن. مەن تۋرالى تاماشا ماقالالار جازىپ, «دالا مەن قالا», «نۇر-استانا» گازەتتەرىندە جا­ريالادىڭىز. ەندى, مىنە, ماعان «ءازىلحان نۇرشايىقوۆتىڭ شىعار­ماشىلىق مۇرا­سى» دەگەن تاۋداي كىتاپ­تى تارتۋ ەتىپ وتىرسىز.

مۇنىڭىز باعا جەتپەس بايلىق, رۋحاني وشپەس مۇرا عوي, قالقام-اۋ!

زور قۇرمەتپەن باسىمدى يەمىن...

ءاز.نۇرشايىقوۆ.

26.10.2005.

بىزدىڭشە, جازۋشى قولتاڭباسى – جان-جۇرەك تىنىسى, كوڭىل تولقىنى عانا ەمەس, سونىمەن بىرگە كىتاپ يەسىنىڭ بەلگى-ەرەكشەلىكتەرىن تاپ باسىپ, سوعان كوزقاراسىن, لەبىزىن بىلدىرەدى. تىلەك قوسادى. جازۋشى كوز­قاراسى مەن قولتاڭباسى – جان-جۇرەك العىسىنان, كوڭىل قاناعاتىنان تۇرادى. العىسى مەن قۇرمەتى قاتار سەزىلەدى. ادام­دىق الەمى, ادامگەرشىلىك يىرىمدەرى, كوزقا­راس مۇراتتارى دا تانىلادى. قىس­قاسى, اۆتور مەن كىتاپ – جان جىلۋى مەن كوڭىل قۋاتىن تانىتۋىمەن بىرگە كوركەم­دىك-رۋحا­ني مۇرانىڭ قۇندىلىق قىرلا­رىن, تانىم­دىق-ەستەتيكالىق مۇراتىن, سەزىم مەن ءسۇيىس­پەنشىلىكتىڭ ماڭگىلىك سيپات­تارىن كەڭ كولەمدە كورسەتەدى.

تۇتاستاي العاندا, جۋرناليست-جازۋشى ءا.نۇرشايىقوۆتىڭ شىعارماشىلىق مۇ­را­سىندا – قولتاڭبا مادەنيەتى اقىل-پارا­ساتقا قۇرىلىپ, وزىندىك ورنەك, وزگەشە قىر­لارى­مەن ءماندى بولىپ تابىلادى. بۇل – ءبىر.

ەكىنشىدەن, جازۋشى ەڭبەگى مەن شىعار­ماشىلىق قىرلارىنا نازار اۋدارساق, ادام­دىق الەمى, جاسامپازدىق ءھام ىزگىلىكتى قادامدارى ايرىقشا تانىلىپ, جاناشىر­لىعى مەن جاۋاپكەرشىلىگى, قۇرمەتى ايقىن اڭعارىلادى.

ۇشىنشىدەن, قالامگەر قولتاڭباسى – ءومىر مەن ۋاقىت بەدەرى, اۆتور مەن وقىرمان ارا­سىن­داعى بايلانىستىڭ بەرىك ار­قاۋى, بۇگىن مەن بولاشاقتىڭ رۋحاني كوپى­رى, ەستەلىكتى ەسكەرتكىشتەردىڭ اسەرلى ءھام تاعى­لىمدى تۇستارىن ءجىتى تانىتاتىن ماڭىزدى دا ءماندى بەلگىلەردىڭ ءبىرى.

دەمەك, قولتاڭبا – جان-جۇرەك جاز­باسى. كوڭىلدىڭ ساۋلەسى مولىنان ءتۇسىرىل­گەن, ار­مان-اڭسارلار دا, جاقسىلىق-جەتىس­تىكتەر دە لەبىز-تىلەك تۇرىندە كورىنىس تابا­تىن, جۇيەلى جەتكىزىلەتىن اسىل ءسوزدىڭ قىسقا ۇلگىسى, نۇسقالى ءۇردىسى.

جارقىن جۇزدەسۋ, سىرلى سۇحباتتار تۇ­سىندا بىردە جازۋشىدان قولتاڭبا (( اۆتوگراف)) حاقىندا سۇراعانىمىز بار.

– مەن قولتاڭبا قالدىرۋ ارقىلى كوپ­شىلىككە ءھام وقىرمانعا سول ساتتەگى كوڭىلىمدى عانا بىلدىرۋمەن شەكتەلمەيمىن, – دەگەن ەدى قالامگەر. – سونىمەن بىرگە, قۇدىرەتتى قازىنا – كىتاپتىڭ تابيعاتى مەن مازمۇ­نىن اشامىن. كىتاپتىڭ رۋحاني قۋات-ءنارىن, كور­كەمدىك-ەستەتيكالىق اسەر-ىقپا­لىن دا نەگىزگى نازاردا ۇستايمىن. كىتاپ مادەنيەتىن, ونى وقىپ-ۇيرەنۋ مەن جيناۋ­دى, ءتالىم-تاعىلىم الۋدى دا ۇلگى ەتەمىن. سوعان باعىت-باعدار بەرەمىن.

قولتاڭبادا قالامگەر مۇراتى, ادام الەمى, اقىل-پاراسات دەڭگەيى, ءبىلىمي-ءما­دە­ني مۇمكىندىكتەرى, كوزقاراس ەۆوليۋ­تسيا­سى كورى­نىس بەرەدى. ءومىر ءورىسى, ۋاقىت بەدەرى بارى دا انىق. دەمەك, قولتاڭبا – لەبىز-تىلەكتىڭ توعىسى عانا ەمەس, ءبىلىم-بىلىكتىڭ, ءتالىم-تاربيەنىڭ دە تاعىلىمدى تۇستارىن تەرەڭ تانىتادى. ەندەشە, جۋرناليست-جازۋشى   ءا.نۇر­شايىقوۆتىڭ قولتاڭباسى رۋحاني بايلىقتىڭ قادىر-قاسيەتىن ءجىتى زەرتتەپ-زەردەلەۋدىڭ ۇزدىك ۇلگىسى, قالىڭ كوپشىلىكتىڭ قىمبات قازى­نا­عا كوزقاراسى مەن قۇشتار­لى­عىنىڭ بەدەرلى بەلگىسى, ەڭ نەگىزگىسى وقىر­مانعا بەرىك سەنىمى مەن شەكسىز سۇيىسپەن­شىلىگىنىڭ كوركەمدىك قاينارى, ماڭگىلىك ءمانى مەن سىرلى الەمى.

راقىمجان تۇرىسبەك, فيلولوگيا عىلىمدارىنىڭ دوكتورى, پروفەسسور.