20 قازان كۇنى حورەگرافيالىق جاۋھار تۋىندى – پ.ي. چايكوۆسكيدىڭ «ۇيقىداعى ارۋ» بالەتىمەن «استانا وپەرانىڭ» V مەرەيتويلىق تەاتر ماۋسىمىنىڭ شىمىلدىعى تۇرىلەدى. تەاتر جاڭا شىعارماشىلىق جىلى كورەرمەن قاۋىمعا بىرقاتار وپەرا جانە بالەت تۇساۋكەسەرلەرىن ۇسىنباق.
«مەرەيتويلىق ماۋسىمدى قازىرگى زاماننىڭ اتى اڭىزعا اينالعان حورەوگرافى يۋ.ن. گريگوروۆيچتىڭ قويىلىمىنداعى «ۇيقىداعى ارۋ» بالەتىمەن اشۋدى ءجون كوردىك. بۇل مەتردىڭ ءبىزدىڭ ساحنامىزدا قويعان العاشقى سپەكتاكلى بولاتىن, كورەرمەن شىنايى تۋىندىنىڭ جاڭا رەداكتسياسىن بىردەن جىلى قابىل الدى, سەبەبى مۋزىكا مەن حورەوگرافيا كەرەمەت ۇيلەسىم تاپقان ەدى. 17 جانە 18 قاراشا كۇندەرى ج.بيزەنىڭ «كارمەن» وپەراسىنىڭ العاشقى كورسەتىلىمى وتەدى», دەپ ءبولىستى «استانا وپەرا» تەاترىنىڭ ديرەكتورى عالىم احمەدياروۆ.
2018 جىلدىڭ ناۋرىز ايىندا ۇجىم جاڭا رەداكتسيادا, ستسەنوگرافيا مەن كوستيۋمدەردە م.تولەباەۆتىڭ ء«بىرجان-سارا» ۇلتتىق وپەراسىنىڭ تۇساۋكەسەرىن جوسپارلاۋدا. سونىمەن قاتار مەرەيتويلىق ماۋسىمدا ا.اداننىڭ «كورسار», ت.قاجىعاليەۆتىڭ «قوزى كورپەش – بايان سۇلۋ» بالەتتەرىنىڭ, دج.ءپۋچچينيدىڭ «تۋراندوت», دج. ءروسسينيدىڭ «سەۆيلدىك شاشتاراز» وپەرالارىنىڭ تۇساۋكەسەرلەرى كۇتىلۋدە.
قازىرگى تاڭدا تەاتردا سۇيىكتى كورەرمەنمەن قايتا قاۋىشۋدىڭ كەرەمەت اتموسفەراسى شارىقتاۋدا. دايىندىق زالدارى بالەت سپەكتاكلىنە قىزۋ ازىرلەنىپ جاتقان ارتىستەرگە لىق تولى. «استانا وپەرا» ساحناسىنداعى «ۇيقىداعى ارۋ» قويىلىمىن اتاقتى بالەتمەيستەر يۋري گريگوروۆيچ وزگە بالەتمەيستەرلەر ۇسىنعان بالالار ەرتەگىسى نە بولماسا ويىن-ساۋىق كورىنىسى رەتىندە ەمەس, چايكوۆسكيدىڭ مۋزىكاسىنا سايكەس كەلەتىن رۋحتى پوەما رەتىندە كورسەتپەك. 20 جانە 22 قازان كۇنى باستى پارتيالاردا جەتەكشى سوليستەر مەن تالانتتى ارتىستەر ونەر كورسەتەدى. نازىك اۆرورا ءرولىن ءمادينا باسباەۆا مەن ايگەرىم بەكەتاەۆا ۇسىنسا, دەزيرە حانزادا پارتياسىندا ەركىن راحماتوللاەۆ, تاير گاتاۋوۆ كورەرمەن الدىنا شىقپاق. بالەتتىڭ كەرەمەت مۋزىكالىق بەينەسى جاقسىلىق پەن جاماندىقتىڭ قاراما-قارسىلىعى سانالاتىن ەكى اۋەن – مامىرگۇل پەرىسى (اسەل شايكەنوۆا, انەل رۇستەموۆا) مەن كارابوس پەرىسى (يلدار شاكيرزيانوۆ) اراسىنداعى تاقىرىپتاردان ءوربيدى.