بۇگىنگى تابىس – سىندارلى مەملەكەتتىك ساياساتتىڭ ناتيجەسى

مەملەكەت باسشىسى نۇرسۇلتان نازارباەۆتىڭ قازاقستاننىڭ اۋىل شارۋاشىلىعى ەڭبەككەرلەرىنە ۇندەۋى قازاقستان تاۋەلسىزدىگىنىڭ 20 جىلدىعى مە­رە­كە­سىنىڭ قۇرمەتىنە قازاقستاندىق ديقاندار رە­كوردتىق استىق ءونىمىن جينادى. وتانى­مىز­دىڭ قامباسىنا 29 ميلليون توننادان استام ءداندى داقىل, سونىڭ ىشىندە 24 ميلليون توننا التىن ءدان قۇيىلدى. استىق جيناۋ ءالى دە جالعاسۋدا. قازىردىڭ وزىندە رەكوردتىق استىق ءتۇسىمى كەڭەس وداعى كەزەڭىندەگى كورسەتكىشتەن اسىپ ءتۇستى. ەگەر سول كەزدەرى استىقتىڭ ءتۇسىمى گەكتارىنا 15,4 تسەنتنەردەن اينالسا, بۇگىندە بۇل كورسەتكىش گەكتارىنا 18 تسەنتنەردەن جوعارى بولۋدا. رەكوردتىق استىق ونىمىنە ەلىمىزدىڭ باستى اس­تىق­تى وڭىرلەرىنىڭ ەڭبەككەرلەرى ۇلكەن ۇلەس قوستى: قوس­تاناي وبلىسىندا گەكتارىنا 20,2 تسەنتنەردەن 8,7 ملن. توننا, سولتۇستىك قازاق­ستان وبلىسىندا 8,7 ملن. توننا (گەكتارىنا 22,4 تس.,) جانە اقمولا وبلى­سىندا 7,1 ملن. توننا (گەكتارىنا 16,7 تس.,) استىق جينالدى. بۇل – تىڭ يگەرۋ كەزىنەن بەرگى استىق ونىمىندەگى ەڭ جوعارى رەكوردتىق كورسەتكىش. ەگىن وراعىنىڭ وبلىستاردىڭ ءوز كۇشتەرىمەن جۇرگىزىلۋى دە ەرەكشە ماڭىزدى ءجايت. استىقتىڭ 90 پايىزىنىڭ ساپاسى 1-3 سى­نىپ­تى دەڭگەيدەگى الەمدىك ستاندارتتار بوي­ىن­شا باعا­لا­نا­دى. بۇل قازاقستاننىڭ الەمدىك اس­تىق رىنوگىندا باسەكەگە قابىلەت­تىلىگىن ساقتاپ قالۋىنا مۇمكىندىكتەر بەرەدى. بۇگىنگى تابىسىمىز – قازاقستاندىق اۋىل شا­رۋاشىلىعى ەڭبەككەرلەرىنىڭ جانكەشتى ەڭبەگى مەن تاۋەلسىزدىك جىلدارىندا قازاقستان ەكونو­مي­كاسى­نىڭ نەگىزگى سالاسى – اۋىل شارۋا­شىلىعىن قولداۋعا باعىتتالعان سىندارلى مەملەكەتتىك ساياساتتىڭ ءنا­تيجەسى. رەكوردتىق استىق ءونىمىن الۋ قازاقستاندىق اگرارلىق سەكتوردىڭ دامۋىنىڭ جوعارى سەرپىنىن كورسەتەدى. سوڭعى 10 جىلدا بۇل سالاداعى جالپى ءونىم كولەمى 3,5 ەسە, اۋىل شارۋاشىلىعى ءونىم­دەرىنىڭ ەكسپورتى 3 ەسە ءوستى, ال ۇن ەكسپورتى بوي­ىن­شا قازاقستان بۇگىندە ءتورت جىل قا­تارىنان الەمدە كوشباسشىلىق ورىندى ۇستاپ كەلەدى. مەن قازاقستاندىق اۋىل شارۋاشىلىعى ەڭ­بەك­كەر­لەرىن ەڭبەكتەگى جاڭا جەڭىسىمەن شىن جۇرەكتەن قۇتتىقتايمىن! بارشاڭىزعا يگىلىك جانە وركەندەۋ تىلەيمىن! نۇرسۇلتان نازارباەۆ.