شقو-داعى بولاشاعى جوق اۋىلداردىڭ ماسەلەسى قارالدى

وبلىستىق قوعامدىق كەڭەستىڭ كەزەكتى وتىرىسىندا تەحنيكالىق جانە كاسىپتىك ءبىلىم بەرۋدىڭ مەملەكەتتىك تاپسىرىسىن بەكىتۋ, تۇرعىن ءۇي كومەگىن تاعايىنداۋ, كوكپەكتى اۋدانىنىڭ اكىمشىلىك-اۋماقتىق قۇرىلىسىنا وزگەرىستەر ەنگىزۋ مەن وزگە دە نورماتيۆتىك قۇقىقتىق اكتىلەردىڭ جوبالارى تالقىلاندى. وعان وبلىستىق قوعامدىق كەڭەستىڭ توراعاسى ۆلاديمير گولوۆاتيۋك پەن قوعامدىق كڭەستىڭ مۇشەلەرى قاتىستى.

كوكپەكتى اۋدانى 17 اۋىلدىق وكرۋگ پەن 56 ەلدى مەكەننەن تۇرادى. اۋداننىڭ ورنەك, كامەنكا, قىزىل جۇلدىز, قارعالى اۋىلدارىندا حالىق وتە از قونىستانعان. وسىعان وراي قوعامدىق كەڭەس وتىرىسىندا اۋدان اكىمدىگى وسى ەلدى مەكەندەردىڭ اكىمشىلىك-اۋماقتىق قۇرىلىمىنا وزگەرىستەر ەنگىزۋ جونىندەگى ۇسىنىسپەن شىقتى. كوكپەكتى اۋدانىنىڭ ەكونوميكا جانە قارجى ءبولىمى باسشىسىنىڭ مىندەتىن اتقارۋشى ازامات ماكەنوۆتىڭ ايتۋىنشا, تەرەكتى اۋىلدىق وكرۋگىنىڭ ورنەك اۋىلىندا نەبارى 22 ادام تۇرادى, ال كامەنكاداعا حالىق سانى بۇدان دا از. قىزىل جۇلدىزدا ون ءۇي عانا ءتۇتىن تۇتەتىپ وتىر. قارعالى اۋىلىنىڭ 21 تۇرعىنىنىڭ ۇشەۋى عانا ەكونوميكالىق بەلسەندى. اتالمىش ەلدى مەكەندەردە مال شارۋاشىلىعىمەن شۇعىلدانىپ وتىرعان بىرنەشە قوجالىقتار بار. اۋىل تۇرعىندارىنا قىزمەت كورسەتەتىن الەۋمەتتىك نىساندار جوق. بۇل ەلدى مەكەندەردە ءوندىرىستى دامىتۋ جوسپارلانباعاندىقتان بولاشاعى جوق دەپ تانىلىپ وتىر. كەڭەستە وسى اۋىلداردى تاراتۋ جونىندەگى ۇسىنىس ايتىلدى.

ەلىمىزدە تۇرعىن ءۇيدى ۇستاۋ جانە كوممۋنالدىق قىزمەتتەرگە اقى تولەۋ شىعىندارىنىڭ شەكتى دەڭگەيى وتباسىنىڭ جيىنتىق تابىسىنىڭ 7-20 پايىزى مولشەرىنەن اسىپ كەتكەن جانۇيالار تۇرعىن ءۇي كومەگىن الۋعا قۇقىعى بار ەكەندىگى بەلگىلى. بيىلعى جىلدىڭ ماۋسىم ايىندا زاڭناماعا بىرقاتار وزگەرىستەر ەنگىزىلىپ, سوعان وراي تۇرعىن ءۇي كومەگىن الۋعا ءوتىنىش بەرۋ مەن قۇزىرەتتى مەكەمەنىڭ ونى جۇزەگە اسىرۋ ءتارتىبى دە وزگەردى. جيىن بارىسىندا وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى ەلەنا ستارەنكوۆا ەنگىزىلگەن وزگەرتۋلەرمەن تانىستىردى.

ريددەر قالاسىنان 30 شاقىرىم جەردە ورنالاسقان «لەنينوگورسكي دەمالىس ءۇيىنىڭ» اتاۋى لەسنوە اۋىلى بولىپ وزگەرتىلدى. بۇل جونىندە وبلىستىق تىلدەردى دامىتۋ باسقارماسىنىڭ باسشىسى ايدىن شايماردانوۆ ءمالىم ەتتى. دەمالىس ءۇيىنىڭ جاڭا اتاۋىن بەكىتۋ جونىندەگى ۇسىنىس ءبىراۋىزدان قابىلداندى.

كەڭەس بارىسىندا قوعامدىق كەڭەس مۇشەلەرى تاراپىنان بايانداماشىلارعا سۇراقتار قويىلىپ, ۇسىنىستار ەنگىزىلدى.