قازاقستانداعى كورەي ۇلتىنىڭ 80 جىلدىعى جانە ماڭعىستاۋ وبلىسىنداعى ەتنومادەني بىرلەستىگىنىڭ قۇرىلعانىنا 25 جىل تولۋىنا وراي, وبلىستىق نۇرمۇحان ءجانتورين اتىنداعى مۋزىكالىق-دراما تەاترىندا سالتاناتتى شارا ءوتتى.
سونىمەن قاتار, جەرگىلىكتى سۋرەتشىلەردىڭ جۇمىستارىنان جاساقتالعان جانە ەتنومادەني بىرلەستىگىنىڭ قولدانبالى شىعارماشىلىق كورمەسى ۇيىمداستىرىلدى, دەپ حابارلادى ماڭعىستاۋ وبلىسى اكىمىنىڭ ءباسپاسوز قىزمەتى egemen.kz تىلشىسىنە.
1937 جىلدارى 100 مىڭداي قيىر شىعىس كارىستەرى ەلىمىزدىڭ ءار ايماعىنا جەر اۋدارىلعان بولاتىن. جولدان ابدەن قاجىپ, قالجىراعان كورەي ۇلتىن قازاقتار بولمىسىنا ساي قۇشاعىن ايقارا اشىپ, ەمىن-جارقىن كوڭىل كۇيمەن قارسى الدى.
قانشاما قايعى-قاسىرەت پەن قۋعىن-سۇرگىندى باسىنان وتكەرگەن قازاق حالقى تاعدىرلاس كورەي حالقىنىڭ جان باتپانىن تەرەڭىنەن ءتۇسىنىپ, باۋىرىنا باستى. بۇگىندە وبلىسىمىزدا 800-دەن استام كارىس ۇلتىنىڭ وكىلى تاتۋ-ءتاتتى ءومىر سۇرۋدە. بۇل - ەكى ەلدىڭ ءوزارا ىنتىماقتاستىعى مەن بىرلىگىنىڭ بەلگىسى.
كارىس ۇلتىنىڭ پەرزەنتتەرى ءوڭىردىڭ جانە ەلىمىزدىڭ الەۋمەتتىك-ەكونوميكالىق دامۋىنا ءار سالادا ولشەۋسىز ۇلەس قوسىپ كەلەدى. مىسالى, ماڭعىستاۋدا اقتاۋ قالاسىنىڭ قۇرمەتتى ازاماتى, قر ەڭبەك سىڭىرگەن قارجىگەرى, كارىس ەتنو-مادەني بىرلەستىگىنىڭ نەگىزىن قالاۋشىلاردىڭ ءبىرى پاك اندرەي ءپونديۋنوۆيچتى, العاشقى تانىمال مۇنايشى, بۇگىندە تەڭىز كەنورنىنان 10-15 شاقىرىم قاشىقتىقتاعى جاڭا كەنورنى «وگايسكوە» دەپ ەسىمىمەن اتالعان وگاي كيپوني حاكسەنيەۆيچتى, كۇنى كەشە ارامىزدان ماڭگىگە كەتكەن وبلىسىمىزداعى ەڭ ءبىلىمدى, بىلىكتى دارىگەر, ءوڭىر عانا ەمەس, قازاقستاننىڭ مەديتسينا سالاسىنىڭ دامۋىنا زور ۇلەس قوسقان چاگاي بوريس گيسەبوۆيچتى قۇرمەتپەن اتاي الامىز.
وتكەنگە كوز جۇگىرتسەك, 1989 جىلى اقتاۋ قالاسىندا تۇراتىن كارىستەردىڭ قۇرىلتاي سەزى ءوتىپ, وندا كارىس ۇلتتىق مادەني ورتالىعى قۇرىلعان بولاتىن. سودان بەرى ءوز جۇمىسىن توقتاتپاعان ەتنومادەني بىرلەستىك قازىرگى كۇنى وبلىسىمىزدىڭ بارلىق شارالارىنا بەلسەندى قاتىسىپ ءجۇر.
- بۇگىنگى تاڭدا ەلىمىزدەگى كارىس ۇلتىنىڭ وكىلدەرى قازاقستاننىڭ اجىراماس بولىگىنە اينالدى. پوستكەڭەستىك كەزەڭدەگى باسقا ەلگە قونىس اۋدارۋعا قاراماستان, كەيبىر ۇلتتار قازاقستاندا تۇراقتى ءومىر ءسۇرۋدى قالادى. قازاق ەلىن ولار ءوز ۇيىندەي سەزىندى. اقتاۋدىڭ قالا بولىپ قالىپتاسۋىنا ۇلەسىن قوسقان ءتۇرلى ۇلت وكىلدەرىنىڭ اراسىندا سىزدەردىڭ دە ورىندارىڭىز ءبىر توبە, - دەدى ماڭعىستاۋ وبلىسىنىڭ اكىمى ە.توعجانوۆ.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى