قاراكوزدەرىمىزدىڭ قاتارى سيرەك گلۋبوكوە اۋدانىندا ءتۇبى ءبىر تۇركى جۇرتىنىڭ اۋەزدى اۋەندەرى ەكى جىل قاتارىنان اۋەلەدى.
« ۇلى دالا سازى» اتتى تۇركى حالىقتارىنىڭ ايماقتىق ونەر فەستيۆالىنە بيىل وسكەمەن قالاسىنىڭ, كۇرشىم, تارباعاتاي, ۇلان جانە شەمونايحا اۋداندارىنىڭ ونەرپازدارى قاتىسىپ, ءتىلى ۇقساس, ءدىنى ورتاق باۋىرلاس ەلدەردىڭ قايتالانباس اندەرى مەن كۇيلەرىن, بيلەرىن جۇرتشىلىققا پاش ەتتى. ونەر باسەكەسىنە قاتىسۋشىلار «ۆوكال», «حورەوگرافيا», «اسپاپتىق اۋەن» اتالىمدارى بويىنشا باقتارىن سىناپ, سىبىزعىنى سىزىلتىپ, دومبىرانى كۇمبىرلەتىپ, قوبىزدى كۇڭىرەنتىپ, كورەرمەندەرگە وزگەشە كوڭىل-كۇي سىيلادى.
«دومبىرانىڭ قوڭىر ۇنىنە ەلىتىپ, ونەرپازدار ورىنداعان əندەردى قوسىلا شىرقاعان كورەرمەندەر گلۋبوكوە كەنتىن ءان قاناتىندا تەربەپ تۇرعانداي تاماشا اسەر قالدىردى. وسىنداي ادەمى دە اسەرلى كەشتەر جيىرەك وتكىزىلىپ تۇرسا عوي», – دەيدى قازىلار القاسىنىڭ توراعاسى, وبلىستىق «ەرتىس كونتسەرت» مەكەمەسىنىڭ مۋزىكالىق پروديۋسەرى نۇرساعيلا شامشيەۆا. گلۋبوكوە اۋدانىنىڭ اكىمى قاليحان بايعونىسوۆ ۇلتتىق اۋەندەرىمىزدى ۇلىقتاعان بۇل شارا ەلباسىنىڭ «رۋحاني جاڭعىرۋ» باعدارلاماسى اياسىندا ۇيىمداستىرىلىپ وتىرعانىن, كەلەشەكتە ءوز جالعاسىن تاباتىنىن ايتادى. فەستيۆال قورىتىندىسىندا اسەت نايمانباەۆ اتىنداعى رەسپۋبليكالىق ءداستۇرلى ءان ورىنداۋشىلار بايقاۋىنىڭ ەكى دۇركىن جۇلدەگەرى تارباعاتايلىق تولەگەن شاكارىموۆ «اسپاپتىق اۋەن» اتالىمىندا باس جۇلدەنى جەڭىپ السا, ءبىرىنشى جانە ەكىنشى ورىنداردى سايكەسىنشە عۇندار داۋىرىندەگى كۇي اڭىزىن ۇلتتىق مۋزىكالىق اسپاپتارمەن تاماشا جەتكىزە بىلگەن تارباعاتايلىق «بابالار سازى» ەتنو توبى مەن اتالعان توپتىڭ ءانشىسى قانات ابۋعازين قانجىعالارىنا بايلادى.
ال وسى اتالىمنىڭ ءۇشىنشى ورىنىن گلۋبوكوەلىق ەلدار قىزىربەكوۆ يەلەندى. بيشىلەر سايىسىندا وزبەك ءبيىن ناقىشىنا كەلتىرە ورىنداعان كۇرشىمدىك ينابات باقىتقانوۆا باس جۇلدەگە لايىق دەپ تانىلدى. «ۆوكال» اتالىمىندا رەسپۋبليكالىق اسكەري قىزمەتكەرلەر اراسىندا وتكەن بايقاۋدىڭ لاۋرەاتى, «ورالحاننىڭ كوكتەمى» اتتى حالىقارالىق ءان فەستيۆالىنىڭ ديپلومانتى ۇلاندىق باقىت قىدىرحانوۆا ءۇشىنشى ورىندى ەنشىلەدى. گلۋبوكوەلىق قوس ءانشى يۋليا يۋروچكينا مەن ءالينۇر سۇلتانعازين ءبىرىنشى جانە ەكىنشى ورىنداردى يەلەندى. حالىقارالىق, رەسپۋبليكالىق, وبلىستىق جانە قالالىق ۆوكالدىق بايقاۋلاردىڭ لاۋرەاتى اتانىپ جۇرگەن شەمونايحالىق ونەرپاز اندرەي مەدۆەدەۆ گران-ءپريدى جەڭىپ الدى.
ازامات قاسىم,
«ەگەمەن قازاقستان»
شىعىس قازاقستان وبلىسى, گلۋبوكوە اۋدانى