مەملەكەت باسشىسى ن.نازارباەۆتىڭ تاپسىرماسىن ورىنداۋ ماقساتىندا بۇگىن اقتاۋ قالاسىندا قازاقستانداعى ارنايى ەكونوميكالىق ايماقتاردىڭ ينۆەستيتسيالىق الەۋەتىنىڭ تانىستىرىلىمى ءوتتى.
حالىقارالىق فورۋمعا ماڭعىستاۋ وبلىسىنىڭ اكىمى ەرالى توعجانوۆ, «Kazakh Invest» اق باسقارما توراعاسىنىڭ ورىنباسارى ءبىرجان كانەشەۆ, 10-نان استام ەلدەن كەلگەن ينۆەستورلار, سونداي-اق ءازىربايجان, تۇركيا, يران, ليتۆا ەلدەرىنىڭ كونسۋلدارى قاتىستى.
مەملەكەت باسشىسىنىڭ جارلىعىمەن ەلىمىزدە ءارتۇرلى سالالىق باعىتتاعى 10 ارنايى ەكونوميكالىق ايماقتار قۇىرلعان ەدى. سونىڭ ءبىرى -
«اقتاۋ تەڭىز پورتى» ارنايى ەكونوميكالىق ايماعى. اەا ىسكە قوسىلعاننان بەرى 88 ملرد.تەڭگە ينۆەستيتسيا تارتىلىپ, 241 ملرد.تەڭگەنىڭ ءونىمى ءوندىرىلدى. ايماقتا 15 مەكەمە قارقىندى جۇمىس جۇرگىزىپ جاتسا, 1 144 جاڭا جۇمىس ورنى قۇرىلدى جانە بيۋدجەتكە 21 ملرد.تەڭگە كولەمىندە سالىقتار تولەندى.
فورۋمدا اقتاۋ, اتىراۋ, شىمكەنت, الماتى, تاراز, پاۆلودار قالالارىنىڭ ارنايى ەكونوميكالىق ايماقتارى (اەا) تانىستىرىلدى.
بايانداماشىلار ارنايى ەكونوميكالىق ايماقتاردىڭ ەرەكشە جاعدايىمەن تانىستىرىپ, جۇزەگە اسقان جوبالارىن ورتاعا سالدى. جوبالاردىڭ دامۋ تاجىريبەسى مەن بولاشاق جوسپارلارى تۋرالى ايتىپ بەردى.
- ماڭعىستاۋ وبلىسى - وندىرىسىمەن قاتار, سان سالاسى جەدەل دامۋ ۇستىندەگى بىردەن-ءبىر ايماق. قازاقستاننىڭ ەكونوميكاسىن نىعايتۋعا وبلىسىمىزدىڭ قوسقان ۇلەسى دە زور, قول جەتكىزگەن تابىستارى دا, جەتىستىكتەرى دە از ەمەس. قازىنالى ءوڭىردىڭ كەلەشەك ءۇشىن بەرگەنىنەن ءالى بەرەرى مول. وسى فورۋم قازاقستاننىڭ جاڭا ينۆەستيتسيالىق مۇمكىندىكتەرىن سىزدەرمەن بىرلەسە سارالاۋعا جول اشادى دەپ سەنەمىن, - دەدى ماڭعىستاۋ وبلىسىنىڭ اكىمى ە.توعجانوۆ.
تۇركيا, ساۋد ارابياسى, مالايزيا, اقش, ۆەنگريا جانە باسقا ەلدەردەن كەلگەن قوناقتار وتاندىق كومپانيالارمەن ىسكەرلىك قارىم-قاتىناس ورناتۋعا قىزىعۋشىلىق تانىتتى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى