ۇستازدار ۇلىقتالدى

وسى بەسىكتى تەربەتىپ, اقىلىن ايامايتىن, شاكىرتىن ايالايتىن ۇستازدار دەسەك جالعان بولماس. كۇنى كەشە ەلوردانىڭ تورىندە ەڭبەگى ەلەنگەن ۇزدىك ۇستازداردى ءبىلىم جانە عىلىم ءمينيسترى ەرلان ساعاديەۆ ماراپاتتادى. 

ۇلتقا ماقتانىش, ۇجىمعا سىيلى بولىپ, ۇلاعاتتى ۇرپاق تاربيەلەۋدە تالماي تالپىنىپ جۇرگەن ۇستازدار قاۋىمىن ماراپاتتاۋ راسىمىندە ءمينيستردىڭ ءوزى دە اقتارىلا سويلەپ, اعىنان جارىلدى. 

«قاي زاماندا بولسىن, ۇستازدارعا قۇرمەت جوعارى بولعان. ۇستازعا قۇرمەت كورسەتۋ – بىلىمگە قۇرمەت كور­سەت­ۋ. جاقسى ۇستازعا كەزىگىپ, ءتالىم-تاربيە العان شاكىرت ءومىر مايدانىندا مويىماي كۇرەسىپ, بولاشاق جولداردا با­عىتىنان تايماسى انىق. ءبىز قازىرگى ۋاقىتتا جاڭار­تىل­عان ءبىلىم مازمۇنىنا كەزەڭ-كەزەڭمەن كوشۋدەمىز. بۇل وراي­دا مۇعالىمدەردىڭ اتقارار ءرولى وراسان زور. سوندىقتان سىز­دەرگە سارقىلماس كۇش-جىگەر تىلەيمىن», دەدى ەرلان ساعاديەۆ.

ايتا كەتەتىن تاعى ءبىر جايت, ءبىلىم جانە عىلىم ميني­سترلىگى اعىمداعى جىلعى 26 قىركۇيەك-4 قازان ارا­لىعىندا مۇعالىمنىڭ قوعامداعى ءيميدجىن قالىپتاستىرۋ, پەداگوگ مارتەبەسىن ارتتىرۋ, مورالدىق-ماتەريالدىق ىنتالاندىرۋ ماقساتىندا ءبىلىم بەرۋ ۇيىمدارىندا, اۋداندىق ءبى­لىم بولىمدەرىندە, وبلىستىق ءبىلىم باسقارمالارىندا ءتۇر­لى شارالار ۇيىمداستىرعان. سونىڭ ناتيجەسىندە جىل ساي­ىنعى «ۇزدىك پەداگوگ» رەسپۋبليكالىق كونكۋرسى جە­ڭىم­­پازدارى انىقتالعان. اتالعان كونكۋرس 2012 جىلدان باس­تاپ وتكىزىلىپ كەلە جاتىر.

ەلىمىزدىڭ ەڭ ۇزدىك پەداگوگتەرىن انىقتاعان كونكۋرسقا رەسپۋبليكامىزدىڭ بارلىق وڭىرلەرىنەن مەكتەپكە دەيىنگى جانە ورتا ءبىلىم سالاسىندا قىزمەت ەتىپ جۇرگەن 112 ۇستاز, سونداي-اق تەحنيكالىق جانە كاسىپتىك ءبىلىم سالاسىنىڭ 44 ينجەنەرلىك-پەداگوگيكالىق مامانى قاتىسقان. ال كەشەگى سالتاناتتى مەرەكەدە 64 جەڭىمپازعا «2017 جىلدىڭ ۇزدىك پەداگوگى» ءتوس بەلگىسى, كۋالىك جانە 1000 اەك مولشەرىندە سىياقى تابىس ەتىلدى.

سونىمەن قاتار ءبىلىم سالاسىنىڭ دامۋىنا زور ۇلەس قوسقان ەلىمىزدىڭ 20 ۇستازى ارنايى العىس حاتتارمەن ماراپاتتالدى.

راۋان قايدار, «ەگەمەن قازاقستان»