قازاقستان ۇلتتىق قۇراماسىنىڭ باس جاتتىقتىرۋشىسى الەكساندر بوروديۋك 2018 جىلعى الەم چەمپيوناتىنا ىرىكتەۋ كەزەڭى اياسىندا وتكەن رۋمىنيا-قازاقستان (3:1) ماتچىنان كەيىن جۋرناليستەردىڭ سۇراقتارىنا جاۋاپ بەردى.
– ويىن كوڭىلىمنەن شىققانىمەن, ناتيجە كوڭىل قۋانتارلىق ەمەس ەكەنى بارشاڭىزعا بەلگىلى. ماتچتا جەكەلەگەن قاتەلىكتەر جىبەرگەنىمىز راس. اتالعان كەزدەسۋ قاتەلىكتەرىمىزبەن تاعى دا كوبىرەك جۇمىس ىستەۋىمىز كەرەك ەكەنىن كورسەتتى. بىرنەشە گول سوعاتىن مۇمكىندىگىمىزدى پايدالانا المادىق. بىراق, ويىنشىلارىما ەشقانداي كىنا ارتا المايمىن. بارلىعى بەرىلگەن تاپسىرمانى تولىق ورىنداپ شىقتى.
– فۋتبول ماماندارى بۇگىن قاقپامىزدى داۆيد لوريا قورعايدى دەپ بولجاپ جاتتى. الايدا, ستاس پاكاتيلوۆتى الاڭعا شىعاردىڭىز...
– رۋمىنياعا قارسى وقۋ-جاتتىعۋ كەزىندە پوكاتيلوۆ ءوزىن جاقسى قىرىننان كورسەتكەن بولاتىن. ءسويتىپ, قاقپاشىلار باپكەرى بۇگىنگى ويىنعا ستاستى شىعارۋدى ءجون سانادى. بۇگىنگى ويىندا ول كەيبىر ساتتەردە قاقپامىزدى گولدان امان ساقتاپ قالدى. كەي ساتتە قاتەلەسكەنى راس. دەسە دە باپكەرلەر قۇرامى دۇرىس شەشىم قابىلدى ما جوق پا, ونى بىلمەدىم.
– رۋمىنيا قۇراماسى تۋرالى نە ايتاسىز؟ جاڭا باپكەردىڭ جۇمىسىنا قانداي باعا بەرەسىز؟ قازاقستان مەن رۋمىنيادا وتكەن ويىندا قانداي وزگەرىستى بايقادىڭىز؟
– ءوزىمنىڭ ارىپتەستەرىمدى ءبىر-بىرىمەن سالىستىرعىم كەلمەيدى. بىراق, قۇرامالارىڭىز بۇگىن وتە جاقسى ويىن كورسەتتى. تەحنيكاسى مىقتى ويىنشىلارىڭىز كوپ ەكەنىن بايقادىق...
– بايجانوۆ, نوسەرباەۆ, تۇڭعىشباەۆ سەكىلدى فۋتبولشىلاردى بۇگىن الاڭعا شىعارمادىڭىز. ولاردى ارمەنياعا قارسى ويىنعا ساقتاپ قالدىڭىز با؟
– سولاي دەسە دە بولادى. ويتكەنى, الداعى ويىنعا سۇيىمباەۆ پەن قۋات سارى قاعازىنا بايلانىستى قاتىسا المايدى. سونداي-اق تاعىبەرگەندى دە كەلەسى ويىنعا ساقتاپ قالۋ ءۇشىن اۋىستىردىم.
– ءبىرىنشى تايمنان سوڭ ازات نۇرعاليەۆتى الماستىرعانىڭىزعا قاراعاندا جاراقاتى اۋىر سياقتى ما؟
– ازىرشە ناقتى ەشنارسە ايتا المايمىن. دارىگەرلەرىمىز تولىق تەكسەرىپ بولعان سوڭ بەلگىلى بولماق. ءبارى جاقسى بولىپ, ازاتتىڭ ارمەنياعا قارسى الاڭعا شىققانىن تىلەيمىن.
– بۇگىن ويىن تاجىريبەسى از بولعان باۋىرجان تۇرىسبەك كۇتپەگەن جەردەن گول سوقتى. ەگەر قۇرامانىڭ تاجىريبەلى ويىنشىلارى جاراقاتىنا جانە ەسكەرتۋ قاعازدارىنا بايلانىستى ساپتان شىقپاعاندا, تۇرىسبەكتىڭ قۇرامادا ويناۋعا قانشالىقتى مۇمكىندىگى بار ەدى؟
– باۋىرجان تۇرىسبەكتە ويىن تاجىريبەسى از دەگەنگە كەلىسپەيمىن. ول سوڭعى ويىنداردا الاڭدا 90 مينۋت ويناپ ءجۇر. سوندىقتان ونى ۇلتتىق قۇراماعا شاقىردىم. ونىڭ ءوزى دە قۇراماعا بەكەر شاقىرماعانىن بۇگىن گولمەن دالەلدەدى. ماتچقا ەكىنشى تايمدا قوسىلعانىمەن, بۇگىنگى ويىنى كوڭىلىمنەن شىقتى.
ءالي بيتورە, «ەگەمەن قازاقستان» –
بۋحارەستتەن
سۋرەت اۆتورى – ءىلياس وماروۆ