دۇنيەجۇزىلىك تۋريزم كۇنى قارساڭىندا الماتىدا «Qazaq-Oner» قولونەرشىلەر ورتالىعى ەسىگىن اشتى. ءتۋريزمدى تابىس كوزىنە اينالدىرىپ, ەلىمىزگە ارنايى ساياحاتتاپ كەلگەن جاندارعا ۇلتتىق تابارىكتەرىمىزدى ۇيالماي ۇسىنۋعا ۇمتىلعان جاڭا تۋريستىك نىساننىڭ مىندەتى دە الۋان ءتۇرلى.
ءبىر جاعىنان «Qazaq-Oner» ورتالىعى – ۇيرەنۋشىلەردى قول ونەرىنە باۋلىپ قويماي, كاسىپكەرلىك, ساۋدا-ساتتىق پەن مادەني شارالاردى قوسا اتقاراتىن ورىن بولادى.
كولەمى 800 شارشى مەتردى الىپ جاتقان نىسان ۋنيۆەرسيادانى اتقارىپ سالعان اتلەتيكالىق اۋىلداعى پيراميدا زالىنا, ءداستۇرلى مۋزىكانىڭ مۋلتيمەديالىق ورتالىعى مەن ۇلتتىق مەيرامحاناعا جاقىن ورنالاسقان.
«قازىر ورتالىقتا 20 قولونەر شەبەرىنىڭ جۇمىستارى قويىلدى. ولاردىڭ كوبى ەكسپو كورمەسىنەن كەلدى. جاڭا بۇيىمدار جاساپ ۇلگەرمەدى. بىراق الداعى ۋاقىتتا بۇيىمدار قاتارى كوپ بولارى انىق. بۇرىن قولونەرشىلەرگە بۇۇ, يۋسايد, يۋنەسكو سەكىلدى حالىقارالىق قوعامدىق قورلار قولداۋ كورسەتەتىن. بيىل العاش رەت الماتى اكىمدىگى قولداۋ كورسەتىپ, جاڭا جىلعا دەيىنگى جالداۋ قارجىسىن كوتەردى. ءبىز اياعىمىزدان نىق تۇرىپ كەتكەنگە دەيىن, ارينە. بۇل دا ءىسىمىز العا باسقانشا ايتارلىقتاي كومەك. جانە ورتالىقتىڭ بارلىق جابدىعى – جيھاز, سورە, ورىندىقتار قالا اكىمدىگىنىڭ قاراجاتىنا ساتىپ الىندى. بۇرىن قولونەرشىلەر دەمەۋشىلەرگە ارقا سۇيەپ, قورلاردان كومەك سۇراپ جۇرەتىن. قانداي دا ءبىر شەبەرلىك سىنىپتارىنىڭ رەسمي جۇمىس ىستەگەنى سيرەك ەدى. «جالعىزدىڭ ءۇنى شىقپاس» دەگەن. سوندىقتان ورتالىقتىڭ ماقساتى – بىرگە جۇمىس ىستەۋ. بىزدە كاسسالىق قانا ەمەس, تولەم كارتاسىن قابىلدايتىن اپپارات تا بولادى. بۇل ارقىلى قولونەردى شاعىن بيزنەس دەڭگەيىنە دەيىن كوتەرىپ, بيۋدجەت ءتۇسىمىن ارتتىرۋدى عانا ەمەس, كليەنتكە زاماناۋي قىزمەت كورسەتۋدى كوزدەيمىز. كورپوراتيۆتىك كليەنتتەر حابارلاسادى, ولارمەن قۇجات جۇزىندە جۇمىس ىستەۋ كەرەك. سەرىكتەستەر قاتارىندا كوپتەگەن تۋريستىك كومپانيالار بار. ولار ءوز تۋريستەرىن تارتادى. قازىرگە شۆەتسيادان كەلگەن تۋريستەردى قارسى الدىق. ولار ءوز قولدارىمەن كيىز باسىپ كوردى», – دەيدى الماتى قالاسى ىسكەر ايەلدەر كەڭەسىنىڭ مۇشەسى, جوبا اۆتورى, كاسىپكەر ايگۇل جانسەرىكوۆا.
«Qazaq-Oner» ورتالىعى الماتىعا تۋريستەردى تارتۋعا الەۋەتى بار نىسان بولادى دەپ كۇتىلۋدە. وعان قوسا جەرگىلىكتى ءوندىرىستى جولعا قويىپ, جاڭا ىسمەرلەردىڭ قاتارىن كوبەيتەتىن مەكەن بولماق.
«جوبا الماتى كاسىپكەرلەر پالاتاسى دايىنداعان ءتۋريزمنىڭ جول كارتاسىنا ەنگىزىلگەن. ءبىز بۇل جوبالاردى سۇيەمەلدەپ, قارجىلاي ەمەس قولداۋ كورسەتەمىز. سوندىقتان وسىنداي ورتالىقتاردىڭ قاتارى كوبەيگەنى جاقسى», دەدى الماتى قالاسى كاسىپكەرلەر پالاتاسىنىڭ ديرەكتورى يۋري تىلەۋمۇراتوۆ.
ءبىر جاقسىسى, بۇل جەردە ىقىلاس تانىتقاندار جاڭا قولونەر تۇرىنە ماشىقتانىپ, وتباسىلىق دەمالىس ۇيىمداستىرا الادى. مۇندا كيىز باسۋ, قىش قۇيۋ, زەرگەرلىك ونەر, قۇراق قۇراۋ, كەستە تىگۋ, توقىما سىندى ونەردىڭ تالاي ءتۇرى تابىلادى.
ايناش ەسالي, «ەگەمەن قازاقستان»
الماتى