• RUB:
    6.68
  • USD:
    520.93
  • EUR:
    609.07
باستى سايتقا ءوتۋ
پرەزيدەنت 05 قازان, 2017

اقتوبە ەلدەگى ءىرى قالالاردىڭ بىرىنە اينالادى

640 رەت
كورسەتىلدى

ەلباسىنىڭ ەل وڭىرلەرىنە ساپارى بەلگىلى ءبىر ايماق تۇرعىندارىنا, رەسپۋبليكامىزدىڭ ءار قيىرىندا تۇتاستاي جاس مەملەكەتىمىزدىڭ ءوسىپ-وركەندەۋىنە ءوز ۇلەستەرىن قوسىپ جۇرگەن ەڭبەككەر ازاماتتارعا جاڭاشا ءبىر سەرپىن مەن تىڭ كۇش-جىگەر بەرەدى دەسەك, شىندىقتان اۋىتقي قويماسپىز. 

وڭىرلەردىڭ وركەنى ءوسىپ, ءورىسى كەڭەيگەن سايىن ەل ەكونوميكاسىنىڭ الەۋەتى دە سوعۇرلىم تۇعىرلانا تۇسەتىنى دە ەشقانداي تالاس تۋعىزبايدى. وسىنداي جەتىستىكتەرگە كۋا بولۋ ەلباسى ءۇشىن دە, ەل ءۇشىن دە ۇلكەن مەرەي ەكەنى انىق. وسى تۇرعىدا رەسپۋبليكا پرەزيدەنتى نۇرسۇلتان نازارباەۆتىڭ ەلىمىزدەگى ءوندىرىسى وركەن جايعان وڭىرلەردىڭ ءبىرى – اقتوبەگە ارنايى كەلۋى ارايلى ايماقتىڭ جۇرتشىلىعىن ءبىر سەرپىلتىپ تاستادى.

مەملەكەت باسشىسى مۇندا ەڭ الدىمەن «كازحروم» ترانسۇلتتىق كومپانياسى» اق-تىڭ بۇگىنگى تىنىس-تىرشىلىگىمەن تانىستى. «كاز­حروم» دەگەندە وسى ىرگەلى كاسىپ­ورىننىڭ قۇرامىنداعى اقتوبە فەرروقورىتپا زاۋى­تى­نىڭ № 4 تسەحى قوسا اتالادى. اتالعان كومپانيانىڭ باس دي­رەكتورى مەملەكەت باسشىسىنا بۇدان ءۇش جىل بۇرىن پاي­دالانۋعا بەرىلگەن ەلىمىزدەگى ءىرى كاسىپورىننىڭ قازىرگى جاي-كۇيى تۋرالى بايانداپ بەردى. بۇدان سوڭ پرەزيدەنت نۇرسۇلتان نازارباەۆ اقتوبە ايماعىندا ورنالاسقان «كازحروم» ترانسۇلتتىق كومپا­ني­يا­سىنىڭ الداعى دامۋ پەرسپەك­تيۆالارىنا قاتىستى ءوز وي-پىكىرىن ورتاعا سالا كەلىپ, ناقتى تاپسىرمالار جۇكتەدى.

جالپى قۇنى 126,4 ميلليارد تەڭگەنى قۇرايتىن ەلىمىزدە با­لا­ماسى جوق وندىرىستىك قۇرىلىم اتالعان ترانسۇلتتىق كومپا­نيا­­نىڭ ءىس-جوسپارىنا سايكەس جۇ­زەگە اسىرىلعان. وسى جوباعا ساي­كەس ەلىمىزدە جوعارى سۋتەگىلىك ءوندى­رىستىڭ كولەمىن ودان ءارى ۇلعايتۋ شارالارى كوزدەلگەن. وسىعان وراي №4 تسەحتاعى بالقىتۋ ۇدەرىسىنىڭ كولەمى ءوسىپ, تاعى دا قوسىمشا 4 پەش ورناتىلعان. وندىرىستەگى مۇنداي وزگەرىستەر ولشەمى جاڭاشا سيپاتتاعى توك تارتىلىسى جىلىنا 440 مىڭ جوعارى سۋتەگىلىك فەرروحروم ءوندىرىسىن قامتاماسىز ەتۋگە مۇمكىندىك بەرە الادى. الايدا مۇنىڭ ءوزى تابىس شەگى بولماۋعا ءتيىس. سوندىقتان كاسىپورىننىڭ نەگىزگى تۇتىنۋشىلارى مەن ەكسپورت كولەمىن ودان ءارى كوبەيتۋ جولدارىن قاراستىرعان ءجون دەپ شەگەلەي تاپسىردى مەملەكەت باسشىسى. ەندەشە بۇعان دەيىنگى قىتاي حالىق رەسپۋبليكاسى, ەۋروپا ەلدەرى مەن اقش مەم­لە­كەتىنە شىعارىلىپ كەلگەن ەكسپورت كولەمى مەن گەوگرافياسى كەڭەيە تۇسەدى دەگەن ءسوز. بۇدان كەيىنگى كەزەكتە پرەزيدەنت كورتەجى اقتوبە رەلس-ارقالىق زاۋىتىنا قاراي باعىت الدى. مۇندا كاسىپورىن باسشىسى اندرەي كۋزمين پرەزيدەنتتى رەسپۋبليكانىڭ يندۋستريالاندىرۋ كارتاسىنداعى ەڭ ءىرى جوبالاردىڭ بىرىمەن تانىستىردى. كاسىپورىن قازىرگى كۇنى تمد مەن ەۋرازيالىق ەكونوميكالىق وداق كەڭىستىگىندە ۇزىندىعى 120 مەترلىك «ر-65» ستاندارتىنداعى تابيعاتتىڭ قاتاڭ جاعدايلارىنا ءتوزىمدى تەرموبەرىك تەمىر جول رەلستەرىن شىعارادى. مۇندا زا­ۋىت­تىڭ تولىق جوبالىق قۋاتىنا كوشۋ ۋاقىتى الداعى 2018 جىل­دىڭ اياعىنا بەلگىلەنگەن. سول كەزدە جىلىنا 430 مىڭ توننا پروكات شىعارۋعا مۇمكىندىك تۋادى. جۇردەك تەمىر جول كولىكتەرىنە ارنالىپ شىعارىلعان تەمىر جول رەلستەرى ءوزى تەكتەس ونىمدەرمەن سالىستىرعاندا تەرموبەرىكتىك قۋاتىمەن ەرەكشەلەنەدى. بيىل­عى جىلدىڭ 9 ايىندا زاۋىت كون­ۆەيەرىنەن 116,4 مىڭ توننا رەلس ونىمدەرى ءوندىرىلدى. ونىڭ جالپى قۇنى 31,2 ملرد تەڭگەنى قۇرايدى. بۇگىنگى كۇنى «اقتوبە رەلس-ارقالىق زاۋىتى» جشس-ءنىڭ باستى تۇتىنۋشىلارى ورتالىق ازيا رەس­پۋبليكالارى بولىپ تابىلادى. ەڭ سوڭعى ۇل­گى­دەگى زاماناۋي تەحنولوگيامەن جاراقتاندىرىلعان زاۋىت ەل­باسىنىڭ وڭ باعاسىن الدى. زاۋىتتاعى جاڭاشىلدىق كورى­نىس­تەرى باسەكەلەستىككە قابىلەتتى ونىم­دەر وندىرۋگە مۇمكىندىك بەرە­تىنى دە پرەزيدەنت نازارىنا ىلىكتى. اتالعان زاۋىت يندۋس­تريا­لاندىرۋدىڭ ال­عاش­قى بەس­جىلدىعى اياسىندا ەلى­مىزدە جۇزەگە اسىرىلعان بىرە­گەي جوبا. بۇگىنگى كۇنى زاۋىت ونىم­دەرى ەكس­پورتقا جول تارتا باستا­دى. بۇعان قاتىستى الىنعان ارنايى سەرتي­فيكاتتار اقتوبە رەلس­تەرى ۇلتتىق جانە الەمدىك ستان­دارت­تارعا سايكەس كەلەتىنىن كورسەتەدى.

اتالعان وتاندىق كاسىپورىن رەسەيدىڭ مەملەكەتتىك ستاندارت­تارىنا سايكەس كەلەتىنىن دا­لەل­دەيتىن سەرتيفيكاتتارعا دا قول جەتكىزگەن. مۇنىڭ ءوزى زاۋىت ونىم­­دەرىنىڭ اۋقىمىن اجەپتاۋىر كوتەرۋگە سەپ­تىگىن تيگىزگەن. نەگىزىنەن العاندا اقتوبە رەلس-ارقالىق زاۋىتىنىڭ ونىمدەرى «قازاقستان تەمىر جولى» ۇلتتىق كومپانياسى ينۆەستيتسيالىق جوباسىنىڭ قاتارىنا كىرەدى. سوندىقتان دا اقتوبە رەلستەرى ەلىمىزدىڭ اۋماعىنداعى ماگيسترالدى تەمىر جولدارعا كۇردەلى جوندەۋلەر جۇرگىزۋگە پايدالانىلادى. «جۇبانوۆتار الەمى» مۇراجاي-ۇيىندە وبلىستىڭ زيالى قاۋىم وكىلدەرىمەن كەزدەسۋ ساتىندە ەلباسى اقتوبە رەلس-ارقالىق زاۋىتى ەلىمىزدەگى ەڭ ءىرى جۇمىس بەرۋشى كاسىپورىن رەتىندە ەرەكشەلەنەتىنىن اتاپ كورسەتتى.

قازىرگى كەزدە زاۋىتتىڭ ينجەنەر-كونسترۋكتورلارى تولىق اۆتوماتتاندىرۋ جۇيەسىن قۇرۋعا قول جەتكىزگەن. ءبىز مۇنى ءبىرىنشى كەزەكتە اقاۋلاردى كوپ بولدىرماۋ جانە كۇتپەگەن, كەزدەيسوق, وقىس جاعدايلاردىڭ الدىن الۋ ءۇشىن قۇردىق. قازىرگى كوەففيتسيەنتتىك جۇيە ويداعىداي جۇمىس جاساپ تۇر, دەدى زاۋىت ديرەكتورى مەملەكەت باسشىسى ن.ءا.نازارباەۆقا.

ىرگەلى كاسىپورىنداعى ەمەن-جار­­قىن جۇزدەسۋلەر كە­زىن­دە اقتوبە وبلىسىنىڭ اكىمى ب.ساپار­باەۆ پرەزيدەنت نۇرسۇلتان نازارباەۆقا وڭىردە يندۋس­­­تريا­­لان­دىرۋدىڭ قازىرگى ەكىنشى بەسجىل­دىعى تۇسىندا قانات قاعا باستاعان ون­دىرىستىك جوبا­لار جونىندە ايتىپ بەردى. ءوڭىر باس­شىسىنىڭ مالىم­دەۋىنشە, بۇگىنگى كۇنى يندۋس­تريا­لاندىرۋ كارتاسىنا ەنگى­زىلگەن 94 جوبانىڭ 84-ءى پايدالانۋعا بەرىلىپ ۇلگەرگەن. ونىڭ جالپى قۇنى 565 ميل­ليارد تەڭگەنى قۇرايدى. وڭىردە جاڭا ءوندى­رىس ورىندارىنىڭ ىسكە قوسىلۋى 7,4 مىڭ تۇراقتى جۇمىس ورنىنىڭ اشىلۋى­نا سەپتىگىن تيگىزدى, دەدى وبلىس اكىمى.

مەملەكەت باسشىسى بيىلعى جىلدىڭ باسىنداعى «قازاق­ستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جول­داۋىندا ورتالىق جانە جەرگىلىكتى اتقارۋشى ورگاندارعا «نۇرلى جەر» باعدار­لاماسىن ىسكە اسىرۋدى تاپسىرعانى بەلگىلى. نۇرسۇلتان ءابىش ۇلى وڭىرگە جۇمىس ساپارى كەزىندە اتالعان باعدارلامانىڭ ويداعىداي ورىندالىپ كەلە جات­قا­نىنا كوزىن جەتكىزدى.

ماڭىزدى جوبا ءبىرىنشى كەزەكتە قۇ­رىلىس ساپاسىنا ايرىقشا ءمان بەرى­لۋىمەن ەرەكشەلەنۋى ءتيىس. وسى ورايدا ەلباسى وڭىردەگى بۇل باعدارلامانىڭ جاي-كۇيى وزگە وڭىرلەرگە ۇلگى-ونەگە بولا الار­­لىقتاي دەڭگەيدە ەكەنىنە ريزا­­شى­­لىق تانىتتى. تۇتاستاي العاندا, وبلىس ورتالىعىنىڭ شاعىن اۋداندارىندا 2017-2018 جىل­دارى 423 از قاباتتى جاڭا تۇر­­عىن ۇيلەر بوي كوتەرمەك. سول كەزدە بۇل اراعا كەم دەگەندە 100 مىڭ تۇرعىن قونىس تەبە­تىن بولادى.  ونىڭ نەگىزگى بولىگى بيىل­عى جىلدىڭ ەنشىسىنە تيەدى. سون­داي-اق بيىل «نۇرلى جەر» باع­دار­لاماسىنا سايكەس مىڭ­نان استام وتباسى تۇرعىن ۇيلەرىن جاق­سارتا الاتىنى دا جاق­سى جەتىس­تىك. «نۇرلى جەر» باعدار­لا­ماسىنىڭ وڭىرلىك ەرەكشەلىگىنىڭ باستى ءبىر سيپاتى الەمدىك تۇتىنۋ ۇلگىلەرىنە سايكەس كەلەتىن «تاۋن­حاۋس» ۇل­گىسىندەگى 3-4 قاباتتى ۇيلەر ەكە­نىن ءوڭىر باسشىسى بەردىبەك سا­پارباەۆتىڭ اۋزىنان ەستىگەندە ءارى بۇل كورىنىسكە تىكەلەي ءوزى كۋا بول­عان ساتتە بۇل قولداۋعا ابدەن تۇ­رارلىق باستاما. ەلىمىزدىڭ قارا­پايىم تۇرعىندارىنىڭ ءومىر ءسۇرۋ دەڭگەيىن جوعارى ساتىعا كوتەرۋگە كومەگىن تيگىزە الاتىن ەرەكشە فاكتور. وسىنداي ءۇردىس ەلىمىزدىڭ وزگە وڭىرلەرىنە دە ءسىڭىستى بولعانىن قالايمىن, دەپ ءوزىنىڭ شىنايى تىلەگىن ءبىلدىردى ەلباسى.

تۇرعىن ءۇي قۇرىلىسىن سالۋ ءۇشىن وڭىردە قانشا ادام كەزەكتە تۇرعانى دا پرەزيدەنت نازارىنان تىس قالعان جوق. وڭىردە ولاردىڭ سانى 130 مىڭ بولىپ شىقتى. بۇل ساناتتاعى ازاماتتاردىڭ باسىم بولىگى تۇرعىن ءۇي قۇرىلىس جيناق بانكىندە قاجەتتى قاراجاتتارىن قامداستىرعان. ونىڭ دەنى وز­دەرى­نىڭ تولەم قابىلەتتىلىگىن دالەل­دەپ ۇلگەرگەن. «نۇرلى جەر» – ەلى­مىزدە تۇرعىن ءۇي كەزەگىندە تۇر­عان ازاماتتاردىڭ سانىن ازاي­تۋ­دىڭ باستى بالامالى جولى. وسى ورايدا بۇل باعدارلامانىڭ مۇم­كىندىكتەرىن تولىق پايدالانۋ ءۇشىن بۇگىنگى كۇنى 130-دان اس­تام قۇرىلىس كومپانيالارى مەن قۇرىلىس يندۋسترياسى كا­سىپ­ورىندارى بىركىسىدەي جۇمىلعان. ماتەريال­داردىڭ سەكسەن پايىزى جەرگىلىكتى جەردە وندىرىلەتىنى دە «نۇرلى جەر» باعدارلاماسى اياسىنا كىرەتىن تۇرعىن ۇيلەردىڭ وزىندىك قۇ­نىن تو­مەندەتە تۇسكەنى ەل­باسىنىڭ قانا­عا­تتانۋشىلىق سەزىمىن تۋعىزدى.

وبلىستا تۇرعىن ءۇي قۇرىلىسىن سالۋ­مەن قاتار, ەل-جۇرتقا قاجەتتى ينفرا­قۇرىلىمدىق جۇيەلەر دە ءبىر مەزگىلدە قاتار ورنىعىپ كەلە­دى. قازىرگى كۇنى «نۇر­لى جەر» باع­دارلاماسى اياسىندا تۇر­عىزىلعان جەكە تۇرعىن ۇيلەر اۋما­عىندا 1200 ورىندىق ورتا مەكتەپ پەن 300 ادامدى قامتي الاتىن ەمحانا قۇرى­لىستارىن مەملەكەت-جەكە­مەن­شىك ارىپتەستىگى اياسىندا سالۋ بەل­گىلەنگەن. رەسپۋبليكا پرەزي­دەنتى نۇرسۇلتان نازارباەۆ اتال­عان باعدارلاما اياسىنداعى قۇرى­لىس جوبالارىمەن تانىسىپ, ونىڭ ساپاسىنا, سىرتقى كورىنىسى مەن ىشكى ينتەرەرىنىڭ ءوزارا ۇيلە­سىم­دى­لىگىنە قاناعاتتانعاندىق تانىتتى.

ينفراقۇرىلىم دەگەندە جا­ڭا تۇرعىن ۇيلەرگە تارتىلعان «كو­گىل­دىر وتىننىڭ» تۇرعىندارعا تيگى­زەتىن الەۋمەتتىك-تۇر­مىستىق جەڭىلدىكتەرىنىڭ ورنى ايرىقشا. مۇنداي جاعدايدا ءومىر ءسۇرۋ ساپاسى ودان ءارى ارتا بەرمەك. مۇنداي يگى ماقساتقا قول جەتكىزۋ ءۇشىن اقتوبە ايماعىندا گازبەن جابدىقتاۋ ءىسىنىڭ كەشەندى شارالارى ىسكە اسىپ كەلەدى. وبلىس ورتالىعىنىڭ ىرگەسىندە تۇرعىزىلعان «اگرس 300» اۆتوماتتاندىرىلعان گاز تاراتۋ ستانساسىنا جۇكتەلەتىن الەۋمەتتىك-تۇرمىستىق سالماق پەن جاۋاپكەرشىلىك وسىنداي. اتالعان ستانسا ەلباسىنىڭ وسى ساپارىندا ىسكە قوسىلدى. جالپى سوڭعى ەكى جىلدا ءوڭىردى گاز­بەن قامتۋ دەڭگەيى 60-تان 80 پايىزعا دەيىن وسكەن.

مەملەكەت باسشىسى نۇرسۇلتان نازارباەۆتىڭ «بو­لا­شاققا باعدار: رۋحاني جاڭ­عىرۋ» اتتى ماقالاسى ەلىمىز­دىڭ تۇتاستاي رۋحاني جاڭ­عى­رۋى جونىندەگى كەڭ اۋقىمدى باع­دارلاماسىن بەلگىلەپ بەرگەن قابىرعالى قۇجاتقا اينالعانى بەلگىلى. پرەزيدەنت وڭىرگە جۇمىس ساپارىنىڭ ەكىنشى بولىگىن وبلىستا وسى ماسەلەلەرگە بايلانىستى بەلگىلەنگەن ءىس-شارالار كەشەنىمەن تانىسۋدان باستادى. اتاپ ايتقاندا, بۇل باعىتتاعى بولاشاققا باع­دار دەگەن باستى تارماق كەلەشەك ۇرپاق­تىڭ رۋحاني تۇرعىدان جان-جاقتى ۇيلەسىمدى دامۋى دەگەن ۇعىمدى بىلدىرە الادى. وسى تۇرعىدا اقتوبە اي­ما­­عىندا قازىر­دىڭ وزىندە ىرگەلى قا­­دامدار جاسالىپ ۇلگەر­گەنى بو­­لاشاققا بەلگىلەنگەن باعدار بايىپ­تى ەكەنىن بىلدىرەدى.

ايتالىق, ەركىن ەلدىڭ ەر­تەڭ­گى قامىن كوزدەي وتىرىپ تۇرعى­زىلعان وڭىردەگى ارنايى نىساندار وسكەلەڭ رۋحاني سۇرا­نىس­تاردى تولىقتاي وتەۋ دەڭگەيىنە كوتە­رىلە بىلگەن. سونىمەن بىرگە ءسانى مەن سال­تاناتى كەلىسكەن عيما­رات­تار اقتوبە قالا­سىنىڭ ارحي­تەك­تۋرالىق اجارىن اشا تۇسكەنى اتار تاڭداي اقي­قات. سولار­­دىڭ قاتارىندا ونەر ورتالىعى جانە شىعار­ما­شى­لىق اكا­دە­ميا عيماراتتارى بار. ەگەر شىعار­ما­شىلىق اكادە­ميا عي­ماراتى تۋرالى ايتساق, بۇل اي­رىقشا نى­ساننىڭ جوبالىق قۋاتى ءبىر مەزگىل­دە 1000 ادامدى قابىلداۋعا لايىقتالعان. اكادەميانىڭ ىسكە قوسىلۋى 6-18 جاس ارالىعىنداعى جەتكىن­شەك­تەردى قوسىمشا تاربيە بەرۋ تەتىكتەرىمەن قامتي الادى.

عيماراتتاعى كۇمبەزدى اسپانى بار پلانەتاري رەسپۋبليكا وڭىرلەرىنىڭ بىردە-بىرىندە كەز­دەسپەيدى. وعان كەلۋشىلەر كۇن جۇ­يەسىندەگى بارلىق پلانەتالاردى تاماشالاي الادى. اكادەميا توبەسىندە ورناتىلعان تەلەسكوپ پەن وبسەرۆاتوريانىڭ دا ورنى ايرىقشا. مۇنداي جوبا كەلەشەك ۇرپاق وكىلدەرىنىڭ جان-جاقتى ءوسىپ-دامۋىنا ايتا قالارلىقتاي العىشارت قالاي الاتىنى جا­نە پرە­زيدەنتتىڭ بولاشاققا باع­دار بەرەتىن كەڭ اۋقىمدى باعدار­لاما­سىمەن ۇندەستىك تابا العانى ەل­باسىنىڭ اقتوبە وبلىسىنا ساپارىنىڭ باستى ءبىر قۇندىلىعى ىسپەتتەس.

رۋحاني جاڭعىرۋ ءىسىنىڭ تاعى ءبىر تۇعىرى – ۇلتتىق ونەرىمىز بەن مادەنيەتىمىزگە دەگەن مەم­لە­كەت­تىك تۇرعىداعى شىنايى جانا­شىر­لىق. رەسپۋبليكا وڭىرلەرىندە تۇتاستاي ۇلت ونەرىنىڭ ورىستەۋىنە سۇبەلى ۇلەس قوسقان حالقىمىزدىڭ نەبىر تاڭداۋلى دا تالانتتى ۇلدا­رى مەن قىزدارى دۇنيەگە كەلگەن. وسى ورايدا اقتوبە ايماعى قازاق مۋزىكا ونەرىنىڭ قايتالانباس تۇلعالارى اكەلى-بالالى احمەت جۇبانوۆ پەن عازيزا جۇبانوۆا تۋىپ-وسكەن تەكتى توپىراق ەكەنى دە كوپشىلىككە جاقسى ءمالىم.

ءوزىنىڭ ماقتان تۇتار ۇل-قىز­دارىنىڭ وشپەس رۋحتارىن اس­قاقتاتۋ ماقساتىندا اقتوبەدە بيىل «جۇ­بانوۆتار الەمى» اتاۋىن يە­لەنگەن تاماشا مۇرا­جاي-ءۇي بوي كوتەردى. اقتوبە وبلى­سىنا جۇ­مىس ساپارى بارىسىن­دا رەس­پۋب­ليكا پرەزيدەنتى نۇرسۇلتان نازارباەۆ­تىڭ وسىناۋ قاس­تەر تۇ­تار عيماراتقا ارنايى بارىپ باس سۇعۋى تۇتاستاي ۇلت ونە­رى مەن ما­دەنيەتىنە دەگەن قۇر­­مەت پەن تاعزىم بەلگىسىندەي اسەر قال­دىردى.

«سىلدىراپ وڭكەي كەلىسىم, تاس بۇلاقتىڭ سۋىنداي» دەپ دانىشپان اباي ايتقانداي, مۇراجاي-ۇيدە ءتۇر مەن مازمۇننىڭ ءوزارا كە­لىسىم تابا ءبىلۋى جوبا جەتەك­شى­­لەرىنىڭ تەرەڭ پايىمى مەن پارا­ساتىن تانىتقانداي. مۇندا اتالعان تۇلعالاردىڭ مادەني مۇ­رالارىن كەلەشەك ۇرپاقتىڭ بويلارى مەن سانا-سەزىمدەرىنە سىڭىرۋگە باسىمدىق بەرىلگەن. سون­داي-اق «بۇلاق كورسەڭ – كوزىن اش» دەگەندەي, ونەردى ءپىر تۇتقان بۇل مەكەندە دارىندى بالالار مەن جەت­كىنشەكتەردىڭ تۇلا بويىندا تىعىلىپ جاتقان تالانت ۇشقى­نىنىڭ شوعىن ۇرلەۋ جولدارى دا قوسا قاراستىرىلعان. سو­نى­مەن بىرگە حالىقتىق شىعار­ما­شىلىق ۇجىمدار قىزمەتى­نىڭ ورىستەۋىنە دە جان-جاقتى جاع­دايلار جاسالعان. ءارى مۇراجاي-ءۇيى شىعارماشىلىق باعىتتاعى ءار­تۇرلى اۆتورلىق كەشتەر مەن كەزدەسۋلەر جانە كونتسەرتتەر وتكىزۋگە دە وتە ىڭعايلى. 

رەسپۋبليكا پرەزيدەنتى نۇرسۇلتان نازارباەۆ ونەر ور­تالىعى مەن شىعارماشىلىق اكا­د­ە­ميا عيماراتتارىندا وڭىر­دەگى شىعارماشىلىق يەلەرىمەن, زيا­لى قاۋىم وكىلدەرىمەن كەز­دەستى. مىسالى, ونەر ورتالىعىندا وتكى­زىلگەن كەزدەسۋ كەزىندە ونەردىڭ ءوز وكىلى سۆەتا ايتباەۆا وبلىس ور­تا­لىعىندا 1200 ادامدىق ءزاۋ­لىم دە ەڭسەلى ونەر ورداسىنىڭ بوي كوتە­رۋىنە شاپاعاتىن تيگىزگەنى ءۇشىن ەلباسىنا شىنايى العىس سەزىمىن ءبىلدىردى. ويتكەنى بۇعان دەيىن اقتوبە قالاسىنداعى كونتسەرت زالدارى – 400, ءارى كەتكەندە 500 ادامعا عانا ەسەپتەلىپ كەلىپتى.

سونداي-اق ەلباسى «جۇبا­نوۆ­تار الەمى» مۇراجاي-ۇيىندە بولعان كەزدەسۋدە زاماننىڭ بۇگىنگى بيىك تالا­بى مەن تالعامىنا جانە ولشەۋسىز بيىك وزگەرىستەرىنە ساي ءومىر سۇرە ءبىلۋ جونىندە ورامدى وي سا­باقتادى. بۇل رەتتە ادام فاك­­تورى­نىڭ ەلەۋلى ءرول اتقارا الا­تى­نى تۋرالى جۇرەكتەرگە جەت­كىزە ايتتى.

ەلىمىزدە جۇزەگە اسىپ جات­قان يگىلىكتى ىستەردىڭ ءبارى قازاق­ستان­­دىقتاردىڭ ءومىر ساپاسىن ودان ءارى كوتەرۋ ءۇشىن جاسالۋ­دا. مەملەكەتىمىزدەگى ورتاق تابىس­­تاردىڭ تاسقىنداي تۇسۋىنە اقتو­بەلىكتەردىڭ قوسىپ وتىرعان ۇلەس­تەرى دە قوماقتى. مەن بۇعان بۇ­گىنگى ساپار بارىسىندا كوز جەت­كىزە ءتۇستىم. اقتوبەنىڭ ەر­تەڭى ەڭسەلى, بولاشاعى اسقاق. كە­لە­شەكتە اقتوبە قالاسى ەلوردامىز – استانا, مەگاپوليس قالا – ال­ماتى جانە رەسپۋبليكامىزدىڭ وڭتۇستىگىندەگى شىمكەنت سەكىلدى ەلىمىزدەگى ءىرى شاھارلاردىڭ قاتارىنان ورىن الاتىن بولادى. بۇگىنگى ىرگەلى ىستەردىڭ ءبارى وسى ماقساتقا جۇمىلدىرىلعان وڭىردە ەل ىرىسىن ەسەلەي تۇسەتىندەي ىلكىمدى ىستەر مەن ورەلى وزگەرىستەر مول بولا بەرسىن, دەپ ءتۇيىن جاسادى وبلىسقا ساپارىنىڭ قورىتىن­دىسىندا مەملەكەت باسشىسى نۇرسۇلتان نازارباەۆ.

 

تەمىر قۇسايىن,

«ەگەمەن قازاقستان»

اقتوبە وبلىسى

سۋرەتتەر پرەزيدەنتتىڭ ءباسپاسوز قىزمەتىنەن الىندى

سوڭعى جاڭالىقتار