استانادا 6-7 قازان كۇندەرى بۇكىلالەمدىك مما قاۋىمداستىعىنىڭ نۇسقاسى بويىنشا مما-دان الەم چەمپيوناتى وتەدى.
ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا مما جانە كاراتە بويىنشا الەم چەمپيونى ايدار ماحمەتوۆ الداعى الەم چەمپيوناتى استاناداعى ەلەۋلى جانە كەڭ اۋقىمدى سپورتتىق ءىس-شاراعا اينالادى, دەيدى.
«بۇل جولى تولىق جاڭارتىلعان قۇرام ونەر كورسەتەدى. بۇگىندە كاسىبي شارشى الاڭدا ونەر كورسەتەتىن جانە بۇعان دەيىنگى جارىستاردىڭ چەمپيوندارى مەن جۇلدەگەرلەرى اراسىندا سەرگەي موروزوۆتى, شاۆكات راحمونوۆتى, داۋرەن ەرمەكوۆتى, گويتي دازاەۆانى, راشيدا داگاەۆانى ەرەكشە اتاپ وتۋگە بولادى. قازاقستاننىڭ قازىرگى قۇراماسىندا چەمپيون اتاعىن جەڭىپ الۋعا 21 جاستاعى سانجار ءادىلوۆتىڭ (سالماق دارەجەسى 56,7 كيلوعا دەيىن), 27 جاستاعى ءمادي رايحاننىڭ (93 كگ), بار-جوعى 20 جاستاعى قوس سپورتشى قىزىمىزدىڭ زارينا قادىرباەۆا (52,2 كگ) مەن ماريا اگاپوۆانىڭ (61,2 كگ) جاقسى مۇمكىندىگى بار», دەپ اتاپ ءوتتى ا.ماحمەتوۆ.
مما-دان قازاقستان قۇراماسىنىڭ باس جاتتىقتىرۋشى ايبەك شوقپىتوۆ سپورتشىلار دايىندىعىنا كەڭىنەن توقتالدى.
ء«بىزدىڭ وقۋ-جاتتىعۋ جيىنىمىز اقتوبە قالاسىندا ءوتتى. بارلىق سپورتشىلار جەڭىستەن ءۇمىتتى. ولار الەمدىك جارىسقا تىڭعىلىقتى دايىندالدى. سپورتشىلارىمىز استاناداعى الەم چەمپيوناتىندا جاقسى ناتيجەگە كورسەتەتىنىنە سەنىمدىمىن. سونىمەن قاتار تۋعان جەرىمىزدە ونەر كورسەتەمىز. بۇل بىزگە ەرەكشە كۇش-جىگەر, قولداۋ بەرەدى جانە ءاربىر سپورتشى ءۇشىن ماڭىزدى», دەدى ول.
باس باپكەردىڭ ايتۋىنشا, سپورتشى قىزدارىمىز دا الداعى چەمپيوناتقا تىڭعىلىقتى دايىندالعان. ولاردىڭ نازىك جاندىلار اراسىندا مما-دان الەم چەمپيوندارى اتانۋعا بارلىق مۇمكىندىك بار.
ۇلتتىق قۇرامانىڭ مۇشەسى ەركىنبەك ىنجەلدىڭ سوزىنشە, قارسىلاستار وسال ەمەس.
«مەنىڭشە, استانادا ەلىمىزدىڭ نامىسىن قورعاپ, جاقسى ويىن ورنەگىن كورسەتەمىز. وقۋ-جاتتىعۋ جيىنىندا تىنىمسىز جانە تىڭعىلىقتى دايىندالدىق. ارينە, رەسەيدەن باسقا ەلدەردەن كەلەتىن مىقتى سپورتشىلار بار. بىراق جانكۇيەرلەرىمىزدىڭ قولداۋى ارقاسىندا جەڭىستى قولدان جىبەرمەيمىز», دەگەن ويىن ءبىلدىردى.
بۇل چەمپيوناتقا الەم بويىنشا ارالاس جەكپە-جەك جانكۇيەرلەرىنىڭ نازارى تۇسپەك. ونى تىكەلەي ەفيردەن وتاندىق «QAZSPORT» تەلەارناسى كورسەتەدى. الەمنىڭ تۇكپىر-تۇكپىرىندەگى كورەرمەندەر اقتىق سىنداردى تەلەارنانىڭ سايتىنان تاماشالاي الادى. چەمپيونات تۋرالى ارنايى سيۋجەت «Euronews» تەلەارناسىندا شىعادى. بۇل ءوز كەزەگىندە الەمدەگى اۋەسقوي مما كوپشىلىككە پاش ەتۋگە جاڭا سەرپىن بەرمەك.
مما بويىنشا V الەم چەمپيوناتىن مما, پانكراتيون جانە گرەپپلينگ ۇلتتىق فەدەراتسياسى استانا قالاسى اكىمدىگىنىڭ, اقپارات جانە كوممۋنيكاتسيا مينيسترلىگىنىڭ, «سامۇرىق-قازىنا» اق قولداۋىمەن ۇيىمداستىرىپ وتىر.
چەمپيونات «داۋلەت» سپورتتىق كەشەنىندە وتەدى.
راۋان قايدار,
«ەگەمەن قازاقستان