ەكسپو ينۆەستيتسياعا جول اشتى - پاۆلودار وبلىسىنىڭ اكىمى

اكىمنىڭ مالىمدەۋىنشە, پاۆلودار وبلىسىنىڭ 120 مىڭ تۇرعىنى الەمنىڭ جەتەكشى ەلدەرىنىڭ «بولاشاق ەنەرگياسى» تاقىرىبىنداعى جاڭا تەحنولوگيالارىمەن تانىسۋعا مۇمكىندىك العان.

«وڭىردە ينۆەستيتسيالىق الەۋەتتى دامىتۋ بويىنشا بەلسەندى جۇمىس جۇرگىزىلىپ جاتىر. بيىلعى جىلى ەكسپو 2017 حالىقارالىق كورمەسىنىڭ ارقاسىندا ينۆەستيتسيالار تارتۋعا جانە جاڭا تەحنولوگيالاردى ەنگىزۋگە مۇمكىندىك تۋدى. ەكسپو كورمەسىنىڭ جۇمىسى كەزىندە استانادا پاۆلودار وبلىسىنىڭ «INVEST IN PAVLODAR» كورمە زالى جۇمىس ىستەدى. ورتالىقتا الەمنىڭ 22 ەلىنىڭ 112 كومپانياسىمەن ىسكەري كەزدەسۋلەر وتكىزىلدى. كەزدەسۋلەردىڭ قورىتىندىسى بويىنشا اۋىل شارۋاشىلىعى جانە جەمىستەر مەن كوكونىستەردى قايتا وڭدەۋ بويىنشا 3 جوبا, «جاسىل» ەنەرگەتيكا بويىنشا 2 جوبا, حيميا, ماشينا جاساۋ, تۋريزم جانە ءبىلىم بەرۋ سالالارىنىڭ ارقايسىسى بويىنشا ءبىر جوبادان جۇزەگە اسىرىلىپ جاتىر», دەدى.

اكىم سونداي-اق پولشا رەسپۋبليكاسىنىڭ جالپىپولشالىق شارۋاشىلىق پالاتاسىمەن اگروقالاشىق جوباسىن جۇزەگە اسىرۋ بويىنشا مەموراندۋمعا قول قويىلعانىن, اگروقالاشىقتا شىعارىلاتىن ءونىم تەك قانا قازاقستاندىق نارىققا عانا ەمەس, سونىمەن قاتار, كورشىلەس رەسەي فەدەراتسياسىنا دا ساتىلىمعا شىعارىلاتىنىن اتاپ ءوتتى. ء«بىرىنشى كەزەڭدە جالپى اۋماعى 16 گا بولاتىن ەكى جىلىجاي مەن قانت قىزىلشاسىن قايتا وڭدەيتىن زاۋىت سالۋ جوسپارلانىپ وتىر. بولاشاقتا كارتوپتان كراحمال الۋعا جانە جەمىستەر مەن كوكونىستەردى كونسەرۆىلەۋگە ارنالعان زاۋىتتار سالۋ كوزدەلۋدە. پولشانىڭ بيوماسسا (اعاش وڭدەۋ, وسىمدىك ءسىرۋ, قۋراعان جاپىراقتار جانە ت.ب.) نەگىزىندە جۇمىس ىستەيتىن قازاندىقتاردى شىعارۋمەن اينالىساتىن Natural Systems (ناچيۋرال سيستەمس) كومپانياسىنان اۋىل شارۋاشىلىق قوجالىقتارى مەن كوممۋنالدىق قىزمەت ورىندارىنا قازاندىقتار ساتىپ الىناتىن بولادى» دەدى ب.باقاۋوۆ.

سونىمەن قاتار يزرايلدىك M.A.D. Corporation كومپانياسىمەن قۇس فابريكاسى جانە ءسۇت-تاۋارلى فەرماسىنىڭ قۇرىلىسى بويىنشا 2 جوبا قولعا الىنعان. ەكسپو كورمەسى كەزىندە وڭىردە ەنگىزۋگە تۇرارلىق 20 جوبا تاڭداپ الىندى. ولاردىڭ ءبىرى – پولشا ەلىنىڭ كومىردىڭ جىلۋى مول جانە كومىرقىشقىل گازى از تۇزىلەتىن «كوگىلدىر كومىر» تەححنولوگياسى. دالالىق جايلاۋلاردا ورناتۋ ءۇشىن ارقايسىسىنىڭ قۋاتتىلىعى 1 مۆت بولاتىن نەمىس جەل ەنەرگياسىنىڭ قۇرىلعىلارىن ساتىپ الۋ كوزدەلىپ وتىر. اقىلدى قالانىڭ ەلەمەنتى رەتىندە وبلىس ورتالىعىندا وتپە جولدى جارىقتاندىرۋ ءۇشىن كينەتيكالىق ەنەرگيانى پايدالاناتىن پەزو-ەلەمەنتتەرى بار جولاۋشىلار وتپە جولدارىن قۇرۋ جوسپارلانىپ وتىر», دەدى اكىم .

دينارا بىتىك,

«ەگەمەن قازاقستان»