قازاقستان دەلەگاتسياسى پالەستينا مەن تاياۋ شىعىس جاعدايى جونىندە وتكەن بۇۇ قاۋىپسىزدىك كەڭەسىنىڭ كونسۋلتاتسياسىنا قاتىستى.
سىرتقى ىستەر مينيسترلىگىنىڭ حابارلاۋىنشا, جيىن بارىسىندا بۇۇ-نىڭ بەيبىتشىلىك جونىندەگى ارنايى كوورديناتورى نيكولاي ملادەنوۆتىڭ بريفينگى تىڭدالدى.
بريفينگتىڭ اشىق بولىمىندە ءسوز سويلەگەن قازاقستاننىڭ بىرىككەن ۇلتتار ۇيىمى جانىنداعى تۇراقتى وكىلى قايرات وماروۆ تاراپتاردى شيەلەنىستى بەيبىت تۇردە, ءادىل ءارى حالىقارالىق قۇقىق نورمالارىن ساقتاي وتىرىپ رەتتەۋگە شاقىردى.
ول ءوز مالىمدەمەسىندە يزرايل مەن پالەستينانىڭ كوشباسشىلارى ەكى ەلدىڭ بەيبىت تۇردە قاتار ءومىر ءسۇرۋىن ساقتاپ قالۋ ماقساتىندا ناقتى قادامدار قابىلداۋى ءتيىس ەكەندىگىن ايتتى.
قازاقستان پالەستينالىق جانە يزرايلدىق تاراپتى بەيبىت قارىم-قاتىناس, قاۋىپسىزدىك پەن دامۋ جولىنداعى «ەكى ەل حالىق ءۇشىن» قاعيداتى نەگىزىندە تاريحي بەيبىت كەلىسىم جەتىستىگىن ساياسي ەرىك نەگىزىندە كورسەتۋگە شاقىردى.
قازاقستاندىق دەلەگاتسيا «تاياۋ شىعىس تورتتىگى» (ەۋروپا وداعى, امەريكا قۇراما شتاتتارى, رەسەي جانە بىرىككەن ۇلتتار ۇيىمى وكىلدەرى) جۇمىسىن قايتا جانداندىرۋدى ۇسىندى. سونىمەن بىرگە حالىقارالىق ۇيىم نازارىن گازا سەكتورىنداعى جاعدايعا اۋداردى. قازاقستان اتالعان ماسەلەنى شەشۋ بارىسىندا اقش, رەسەي, ەگيپەت تاراپىنان جاسالعان ديپلوماتيالىق ارەكەتتەرىن ماقۇلدادى.