بۇگىندە ءبىلىم سالاسىنداعى ينتەرنەتپەن قامتاماسىز ەتۋ جاعدايى قاناعاتتانارلىق جاعدايدا. بۇل تۋرالى بۇگىن ۇكىمەت وتىرىسىندا ءبىلىم جانە عىلىم ءمينيسترى ەرلان ساعاديەۆ مالىمدەدى.
ءمينيستردىڭ دەرەگىنشە, جالپى رەسپۋبليكا بويىنشا 6 956 مەكتەپ نەمەسە 98 پايىزى جەلىگە قوسىلعان, الايدا سەكۋندىنا 4 مەگابيتپەن كەڭ جولاقتى ينتەرنەتكە تەك 34 پايىزى قوسىلعان. سوڭعى ەكى جىلدا اتالعان كورسەتكىش 9 پايىزعا ۇلعايتىلعان.
ءبىلىم جانە عىلىم ءمينيسترى ەرلان ساعاديەۆ قازىرگى تاڭدا ينتەرنەت ءبىلىم بەرۋ جۇيەسىن دامىتۋدىڭ ماڭىزدى ەلەمەنتى ەكەنىن اتاپ ءوتتى.
بۇگىندە قازاقستان مەكتەپتەرىنىڭ باسىم بولىگىندە تسيفرلى وقىتۋ رەسۋرستارى قولجەتىمدى, ياعني بۇل رەتتە 80 مىڭنان استام ماتەريال بار. ولاردىڭ ىشىندە ءۇش تىلدە ينتەراكتيۆتى جانە مۋلتيمەديالىق ساباقتار, ۆيدەولاردى ايتۋعا بولادى, دەدى مينيستر. ولار وقىتۋ پروتسەسىن تولىقتىراتىن ماتەريالدار, اسىرەسە شاعىن جيناقتى مەكتەپتەر ءۇشىن وتە قاجەت. سونداي-اق ەلەكتروندى كۇندەلىكتەردى تۇتاستاي پايدالانۋدى قامتاماسىز ەتۋ ماڭىزدى. وسىنىڭ بارلىعى ءۇشىن جوعارى جىلدامدىقتى ينتەرنەت كەرەك.
ايتقانداي, بۇگىن پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا اۋىلدىق ەلدى مەكەندەردى كەڭ جولاقتى ينتەرنەت جەلىسىنە قوسۋدى قامتاماسىز ەتۋ جوباسى قارالدى.
دينارا بىتىك, «ەگەمەن قازاقستان»