كومپانيا دەنە شىنىقتىرۋ-ساۋىقتىرۋ كەشەنىن ىسكە قوستى
«قاراشىعاناق پەتروليۋم وپەرەيتينگ ب.ۆ» (كپو) كومپانياسى 16 قىركۇيەكتە اقساي قالاسىندا قۇرىلىسى ايماقتىڭ الەۋمەتتىك ينفراقۇرىلىمىن دامىتۋ جونىندەگى باعدارلاما اياسىندا جۇزەگە اسقان دەنە شىنىقتىرۋ-ساۋىقتىرۋ كەشەنى تابىستى ىسكە قوسىلعانى تۋرالى مالىمدەدى.
اشىلۋ سالتاناتىنا باتىس قازاقستان وبلىسىنىڭ اكىمى التاي كولگىنوۆ, ءبورلى اۋدانىنىڭ اكىمى الديار حالەلوۆ, كپو باس ديرەكتورى رەناتو مارولي, مەردىگەر ۇيىمدار مەن قاۋىمداستىق وكىلدەرى قاتىستى.
ءوز سوزىندە كپو باس ديرەكتورى رەناتو مارولي جاڭا سپورت نىسانىنىڭ اشىلۋىمەن اقسايدىڭ بارلىق تۇرعىندارىن قۇتتىقتاي كەلە, ونىڭ قۇرىلىسى كپو مەن باتىس قازاقستان وبلىسىنىڭ باسشىلىعى اراسىندا قالىپتاسقان جەمىستى ىنتىماقتاستىق پەن سەرىكتەستىك قارىم-قاتىناستىڭ ارقاسىندا سالىنعانىن اتاپ ءوتتى.
ونىڭ ايتۋىنشا, كپو نىسانىن ىسكە قوسۋ ايتۋلى كۇندەرگە: قاراشىعاناق ءونىمىن ءبولۋ تۋرالى تۇپكىلىكتى كەلىسىمگە (وبتك) قول قويۋدىڭ 20 جىلدىعى جانە ءبورلى اۋدانىنىڭ اكىمشىلىك ورتالىعى مەن بىرەگەي قاراشىعاناق مۇناي-گاز كوندەنساتى كەن ورنىنىڭ ورتالىعى – اقساي قالاسىنىڭ 50 جىلدىعىنا ورايلاستىرىلعان.
«وسى كەشەن اقساي تۇرعىندارىنىڭ دەنساۋلىعىن تۇزەۋگە جانە بوس ۋاقىتىندا سپورتپەن شۇعىلدانۋعا ارنالعان تانىمال ورتالىققا اينالادى دەپ ۇمىتتەنەمىز, – دەدى رەناتو مارولي. – تۇراقتى دامۋ جانە الەۋمەتتىك-جاۋاپتى سەرىكتەستىكتى قولداپ كەلە جاتقان كپو كومپانياسى باتىس قازاقستان وبلىسى مەن جالپى قازاقستان تۇرعىندارىنىڭ يگىلىگى ءۇشىن جاڭا بەلەستەردى باعىندىراتىن بولادى».
دەنە شىنىقتىرۋ-ساۋىقتىرۋ كەشەنىنىڭ جالپى اۋدانى 4,6 گەكتاردى قۇرايدى جانە اقساي قالاسىنىڭ ورتالىق بولىگىندەگى ءۇش قاباتتى عيماراتتا ورنالاسقان.
كەشەننىڭ ءوزى فۋتبول الاڭىنان, 1200 ورىندىق تريبۋنادان جانە جۇگىرۋ جولىنان, سونداي-اق باسكەتبول, ۆولەيبول, تەننيس, يادرو لاقتىرۋ مەن سۇڭگى اتۋعا ارنالعان اشىق الاڭداردان, بوكسپەن شۇعىلداناتىن زالداردان تۇرادى. جوبا اياسىندا جالپى اباتتاندىرۋ جانە كەشەن اۋماعىن كوگالداندىرۋ جۇمىستارى جۇرگىزىلدى.
باتىس قازاقستان وبلىسىنىڭ اكىمى التاي كولگىنوۆ ءوز سوزىندە «مەملەكەت باسشىسى نۇرسۇلتان نازارباەۆ جاستار اراسىندا سالاماتتى ءومىر سالتىن ناسيحاتتاۋدىڭ, سونداي-اق جوعارى جەتىستىكتەرگە جەتكىزەتىن سپورتتى دامىتۋمەن قاتار, تۇرعىنداردىڭ دەنە شىنىقتىرۋ جانە سپورتپەن بەلسەندى شۇعىلدانۋىنا ارنالعان قاجەتتى جاعدايلاردىڭ بارلىعىن جاساۋدىڭ ايرىقشا ماڭىزدىلىعىن اتاپ ءوتتى. سوندىقتان سپورت ءومىرىمىزدىڭ نەگىزى, وسكەلەڭ ۇرپاق ءۇشىن دە نەگىز بولۋعا ءتيىس. بۇگىنگى جاڭا دەنە شىنىقتىرۋ-ساۋىقتىرۋ كەشەنىنىڭ اشىلۋى – كاسىبي سپورتشىلار ءۇشىن دە, سپورتتى سۇيەتىن اۋەسقويلار ءۇشىن دە ايتۋلى وقيعا», دەدى.
سونداي-اق ول: «قالا تۇرعىندارى بۇل كەشەننىڭ لايىقتى باعاسىن بەرەدى جانە وسىنداي نىساندار بىزدە تاعى دا پايدا بولاتىنىنا سەنىمدىمىن, مۇنداي نىساندار قازىرگى كەزدە وتە قاجەت, ويتكەنى وسكەلەڭ ۇرپاقتىڭ دەنساۋلىعىن نىعايتۋعا جانە دامىتۋعا باعىتتالعان», دەپ اتاپ ايتتى. بۇدان باسقا, قالا مەرەيتويى قارساڭىندا كپو الەۋمەتتىك باعدارلاما اياسىندا جۇزەگە اسىرعان اقساي قالاسىنىڭ مامەتوۆا جانە تەمىر جول كوشەلەرىندەگى, سادوۆايا كوشەسىنەن زاپادنايا كوشەسىنە دەيىنگى ارالىقتى كۇردەلى جوندەۋ جۇمىستارى اياقتالدى. سونداي-اق ورال قالاسىندا قالا ساياباعىنىڭ وڭ جاعالاۋىن اباتتاندىرۋدىڭ ەكىنشى كەزەڭى اياقتالعان بولاتىن.
كپو جىل سايىن باتىس قازاقستان وبلىسىندا كوپتەگەن الەۋمەتتىك-ينفراقۇرىلىمدىق جوبالاردى جۇزەگە اسىرۋدا. جوبالاردىڭ تىزبەسى مەن باسىمدىلىعى ءوڭىر باسشىلىعى تاراپىنان بەلگىلەنەدى. وسى باعدارلاما اياسىندا دەنساۋلىق ساقتاۋ, ءبىلىم بەرۋ, مادەنيەت جانە سپورت نىساندارىنىڭ قۇرىلىسى ىسكە اسىرىلادى, سونداي-اق بارلىق وسى جوبالار تەك قانا قازاقستاندىق مەردىگەرلەردى تارتۋ ارقىلى ورىندالىپ وتىر. ءوڭىردىڭ الەۋمەتتىك ينفراقۇرىلىمىن دامىتۋعا كپو سالعان ينۆەستيتسيالاردىڭ جالپى سوماسى بۇگىندە 318 ميلليون اقش دوللارىن قۇرايدى.
كومپانيانىڭ ايماقتى دامىتۋعا قوسىپ كەلە جاتقان ۇلەسى قازاقستان ۇكىمەتى تاراپىنان لايىقتى باعالانۋدا. بيزنەستىڭ الەۋمەتتىك جاۋاپكەرشىلىگى جونىندەگى رەسپۋبليكالىق كونكۋرستا كپو «پارىز» سىيلىعىمەن ەكى مارتە ماراپاتتالدى, سونىمەن قاتار «ەڭ وزىق الەۋمەتتىك جوبا» اتالىمى بويىنشا كۇمىس «پارىزدى» الدى.
ارمان قۇسايىنوۆ
باتىس قازاقستان وبلىسى, اقساي قالاسى