قۇرامىنا ۇزدىك وتاندىق كينو جانە تەلەۆيزيا قىزمەتكەرلەرى مەن كينو ونەرىنىڭ دامۋىنا, تانىلۋىنا ۇلەس قوسقان شەتەلدىك كينەماتوگرافيستەر كىرەتىن «ۇلتتىق كينەماتوگرافيالىق ونەر جانە عىلىم اكادەمياسى» قوعامدىق بىرلەستىگى تاعايىنداعان ۇلتتىق «تۇلپار» كينوجۇلدەسىن تابىستاۋ ءراسىمى بيىل ەكىنشى رەت وتكىزىلدى.
مۇندا وتاندىق كارتينالار 8 اتالىم بويىنشا, ال تۇركىتىلدەس ەلدەر جانە كورشىلەس مەملەكەتتەردەن قاتىسقان فيلمدەر ءبىر اتالىمدا باق سىنادى.
بيىلعى «تۇلپاردان» ۇمىتكەرلەردىڭ ىشىندە نۇرتاس ادامبايدىڭ «تاراز», كاتەرينا سۋۆوروۆانىڭ «ەرتەڭ تەڭىز», گاۋھار نۇرتاستىڭ «توقال», سۆەتلانا فورتۋنانىڭ «ا.ل.ج.ي.ر» فيلمدەرى دە بولعان ەدى. ادەتتەگىدەي, كينو مەرەكەلەرىندە قىزىل كىلەمنىڭ ۇستىمەن قۋانىش قۇشاعىندا ءجۇرىپ وتەتىن رەجيسسەر اقان ساتاەۆتىڭ جەڭىستى جولى بۇل كەشتە دە جالعاسىن تاۋىپ, ول تۇسىرگەن «اۋدانداردىڭ» توبەسىنەن جۇلدە جاۋعان كۇن بولدى.
سونىمەن «ۇزدىك فيلم» دە, «ۇزدىك رەجيسسەرلىك جۇمىس» تا, «ۇزدىك ستسەناري» دە, «فيلمگە جازىلعان ۇزدىك مۋزىكا» دا, «ۇزدىك ەر ادام» دا رەجيسسەر اقان ساتاەۆتىڭ «اۋداندارىندا» بولىپ شىقتى. تيمۋر جاقسىلىقوۆ ۇزدىك ستسەناريدىڭ يەسى اتانسا, ۇزدىك كومپوزيتور ءالىم زايروۆ پەن ۇزدىك اكتەر ەلتەرىس نۇرجانوۆ وسى «اۋدانداردىڭ» ىشىنەن تابىلدى. ا.ساتاەۆتىڭ فيلمىنەن كەيىن ەڭ كوپ جۇلدەنى يەلەنگەن فيلم «قازاق حاندىعى. الماس قىلىش» بولدى. «الماس قىلىشتا» جارقىلداعان قايرات كەمالوۆ تا ەلتەرىسپەن بىرگە «ۇزدىك ەر ادامنىڭ ءرولىن» ءبولىستى. بۇل تاريحي تۋىندىداعى ساپار كويچۋمانوۆ, الەكساندر پلوتنيكوۆ «ۇزدىك وپەراتورلىق جۇمىس», ءسابيت قۇرمانبەكوۆ پەن ومىرزاق شمانوۆ «ۇزدىك قويۋشى-سۋرەتشى جۇمىسى» ءۇشىن ماراپاتتالدى. «عالامتوردا» ويناعان ايسۇلۋ ازىمباەۆا «ۇزدىك ايەل ءرولىن» جەڭىپ الدى. ءاسانالى اشىموۆكە «قازاقستان كينەماتوگرافياسىنا قوسقان ۇلەسى ءۇشىن» جۇلدەسى تابىستالدى.
ايگۇل احانبايقىزى, «ەگەمەن قازاقستان» الماتى