قازاقستاننىڭ حالىق جازۋشىسى شەرحان مۇرتازانىڭ – شەراعاڭنىڭ توسىننان تۇسىرىلگەن بۇل سۋرەتى وقىرمانىن بەي-جاي قالدىرماسى انىق. ەل الدىندا جۇرگەن, حالىقتىڭ ءسوزىن سويلەگەن قوعام قايراتكەرىنىڭ ءومىرىنىڭ ءار قىرىن, ءار ءساتىن ادەمى بەينەلەيتىن سۋرەتتەر كوپ-اق. بۇل سۋرەت تە سونىڭ ءبىرى. الايدا بۇل فوتونىڭ ەرەكشەلىگى سول – ءسوز مەرگەنى شەراعامىز سپورتشى-مەرگەننىڭ تۇعىرىندا نىسانا كوزدەپ قاسقايىپ تۇر.
اۋىلى ارالاس, قويى قورالاس جاتقان «ەگەمەن» مەن «كازپراۆدا» گازەتتەرىنىڭ الماتى بولىمشەسىندە مۇددەسى ءبىر ەكى ۇجىمنىڭ جۋرناليستەرى قاشاننان ادەتتەگىدەي ءبىرىنىڭ بولمەسىنە ءبىرى باس سۇعىپ, كىرىپ-شىعىپ, ەسىكتەرى جابىلماي جاتادى. شەراعاڭنىڭ تاياۋ كۇندەرى 85 جاسقا تولاتىنى قارساڭىندا «كازپراۆدانىڭ» الماتىداعى بولىمشەسىنىڭ اتاقتى ءفوتوتىلشىسى يۋري بەككەرگە بارىپ, «ال يۋرەكە, قورجىننىڭ ءتۇبىن قاق! ەرەكشە سۋرەت بولسا قالاپ الايىق...» دەدىك. كاسىبي ءفوتوجۋرناليستىڭ كوزى شىراداي جاندى. «شەراعا, شەراعا... ۇمىتپاسام مەندە ءبىر تاماشا سۋرەت بار!». كومپيۋتەردىڭ پەرنەتاقتاسىن توقىلداتا باسا وتىرىپ, تاپتى-اۋ اقىرى! «بۇل سۋرەتتى 1999 جىلى كۇزدە رەسپۋبليكالىق «سپورت» گازەتىنىڭ جۇلدەسى ءۇشىن تاپانشادان نىسانا كوزدەۋدەن وتكەن قالالىق جارىستا ءتۇسىرىپ ەم» دەدى جادىراپ. قاس-قاعىم ءساتتى كوزىنىڭ قيىعىنان قۇر جىبەرمەيتىن فوتومەرگەن اڭگىمەنى ءارى قاراي بىلاي جالعادى.
– اتاقتى شەراعا ول تۇستا ءوزىمىزدىڭ «ەگەمەن قازاقستاندا» ەڭبەك ەتىپ ءجۇردى. قازاقستانداعى جالعىز سپورتتىق گازەتتىڭ جۇلدەسى ءۇشىن وتكەن جارىستا قازىلار القاسى توراعاسىنىڭ مىندەتىن اتقاردى. مەرگەندەرگە ءادىل باعاسىن بەردى. ءوز باسىم مەملەكەت قايراتكەرى, جوعارعى كەڭەستىڭ دەپۋتاتى, باس رەداكتور شەرحان مۇرتازا كەنەت قولىنا تاپانشا الىپ نىسانا كوزدەيدى دەپ ويلاماپپىن. ىلكى ساتتە كانىگى سپورتشىلارمەن قاتار تۇرا قالىپ, تاپانشانىڭ شۇرىپپەسىن باسىپ-باسىپ سالعاندا تالاي-تالاي ارىپتەستەر, سپورتشىلار, مينيسترلىك قىزمەتكەرلەرى باستارىن شايقاپ تامسانىپ, شەراعانى ءابدان قولپاشتاپ, قولىن قىستى. ءالى ەسىمدە, كورسەتكىشى دە تومەن شىقپادى. مىنا سۋرەت سول ءبىر ساتتەن كورىنىس.
– شەراعانىڭ ماسكەۋ مەملەكەتتىك ۋنيۆەرسيتەتىندە وقىعان ستۋدەنتتىك شاعىندا ورتا سالماقتا بوكستان فاكۋلتەت نامىسىن قورعاعانىن بىلمەۋشى مە ەدىڭىز؟
– سولاي ما, ال كەرەك بولسا, بىلمەيدى ەكەنمىن... بىراق تاپانشانى قولىنا العان شەراعا سپورتشىلارعا ءتان سالماقتى مىنەزبەن ءبىر كوزىن قىسىپ, بويىن تىك ۇستاپ تۇرا قالعاندا ءىشىم بىردەڭە سەزگەندەي كۇيگە ءتۇسىپ ەدى...
شەراعاڭ بيليارد ۇستەلىندە دە مەرگەندىگىمەن تانىلعان, دەپ جانە ايتتىق. فوتومەرگەندى كەزىندە «ەگەمەن قازاقستاننىڭ» باس رەداكتورى قىزمەتىن اتقارعان داڭقتى شەرحان مۇرتازانىڭ 85 جاسقا تولۋىنا وراي رەداكتسيانىڭ بيلياردتان تۋرنير وتكىزەتىندىگى جايلى دا قۇلاعدار ەتتىك.
حالىق جازۋشىسىنىڭ سپورتقا قىرىن قاراماعانىنا كۋا بولعان يۋري زەلمانوۆيچ «ول جارىسقا مىندەتتى تۇردە قاتىسامىن...» دەپ كەڭ ءدالىزدى باسىنا كوتەرىپ ايقايلاپ بارا جاتتى. جاراسىمدى-اق. كادىمگى گازەت ءتىلشىسىنىڭ قىزمەتىنە ساي توسىننان ۇشىراسىپ قالاتىن شىنايى قۋانىشى...
تالعات ءسۇيىنباي, «ەگەمەن قازاقستان»
الماتى
سۋرەتتە: شەرحان مۇرتازا (الماتى, 1999 جىل)
سۋرەتتى تۇسىرگەن يۋري بەككەر