ەلباسى ۇزاقباي قارامانوۆتىڭ جاقىندارىنا كوڭىل ايتۋ جەدەلحاتىن جولدادى

جەدەلحاتتا قازاقستان پرەزيدەنتىنىڭ كورنەكتى مەملەكەت جانە قوعام قايراتكەرى ۇزاقباي قارامانوۆتىڭ دۇنيەدەن وتكەنى تۋرالى حاباردى زور كۇيزەلىسپەن قابىلداعانى ايتىلعان.

«ۇزاقباي قارامان ۇلى بۇكىل عۇمىرىن حالقى مەن تۋعان ەلىنىڭ ءوسىپ-وركەندەۋىنە ارنادى. ول ءوزىنىڭ زور ۇيىمداستىرۋشىلىق قابىلەتى مەن قوعامداعى بەدەلىنىڭ ارقاسىندا كوپتەگەن جوعارى لاۋازىمدى مەملەكەتتىك قىزمەتتە بولىپ, وزىنە جۇكتەلگەن مىندەتتەردىڭ بارلىعىن ابىرويمەن اتقارا ءبىلدى», – دەلىنگەن جەدەلحاتتا.

مەملەكەت باسشىسى قازاقستاندىقتار ونىڭ ەسىمى مەن ەل الدىنداعى ەڭبەگىن ءاردايىم ەستە ساقتايتىنىن اتاپ ءوتتى.

ۇزاقباي قارامان ۇلى قارامانوۆ 1937 جىلدىڭ 20 تامىزى كۇنى قىزىلوردا وبلىسى ارال اۋدانىنىڭ ۇيالى اۋىلىندا دۇنيەگە كەلگەن. قازسرو مينيسترلەر كەڭەسىنىڭ سوڭعى توراعاسى جانە قازسرو-نىڭ تۇڭعىش پرەمەر-ءمينيسترى.

1959 جىلى كۋيبىشەۆ (سامارا) قالاسىنداعى ينجەنەرلىك قۇرىلىس ينستيتۋتىن بىتىرگەن;

1959 - 64 جىلدارى شۇبارقۇدىق اۆتوبازاسىندا, «قىزىلوردا قۇرىلىس» ترەسىندە جۇمىس ىستەدى;

1964 - 80 جىلدارى «الماتى ونەركاسىپ قۇرىلىسى» ترەسىندە اعا پروراب, كومبينات ديرەكتورى, قازاقستان كومپارتياسى وك-ءنىڭ ءىس باسقارماسىنىڭ قىزمەتكەرى, جەڭىل جانە تاماق كاسىپورىندارى قۇرىلىسى باسقارماسىنىڭ باستىعى, قازاق كسر اۋىر ونەركاسىپ مينيسترلىگىنىڭ الماتى قۇرىلىس باس باسقارماسىنىڭ جانە قۇرىلىس يندۋسترياسى باس باسقارماسىنىڭ باستىعى;

1980 - 84 جىلدارى قازاق كسر جەڭىل ونەركاسىپ مينيسترلىگىنىڭ ورىنباسارى, «قازاقتىڭ سۋ تاسقىندارىنان قورعانۋ قۇرىلىسى» باس باسقارماسىنىڭ باستىعى;

1984 - 89 جىلدارى قازاق كسر قۇرىلىس مينيسترلىگىنىڭ ءبىرىنشى ورىنباسارى, قازاق كسر مەملەكەتتىك جابدىقتاۋ كوميتەتىنىڭ توراعاسى قىزمەتتەرىن اتقارعان;

1989 - 90 جىلدارى قازاق كسر مينيسترلەر كەڭەسىنىڭ توراعاسى;

1990 - 92 جىلدارى قازاق كسر پرەمەر-ءمينيسترى بولدى;

1991 جىلدىڭ قازان ايىنان - قر مەملەكەتتىك كەڭەسشىسى;

1993 جىلدىڭ ءساۋىر ايىنان - ارالدى قۇتقارۋ حالىقارالىق قورىنىڭ اتقارۋشى ديرەكتورى;

1994 جىلدىڭ ناۋرىز ايىنان - دەپۋتات, قر جوعارعى كەڭەسى تابيعاتتى پايدالانۋ جانە ەكولوگيا كوميتەتىنىڭ توراعاسى, «قازاقستان حالىقتىق كونگرەسى» پارتياسىنان ۇسىنىلعان;

1995 جىلدىڭ ءساۋىر ايىنان - «قازكونتراكت» رەسپۋبليكالىق كەلىسىمشارت كورپوراتسياسىنىڭ ۆيتسە-پرەزيدەنتى;

1998 جىلدىڭ ءساۋىر ايىنان - «قوماق-ينۆەست» قارجىلاي-كاسىپشىلىك توبىنىڭ پرەزيدەنتى. ونىمەن ءبىر مەزگىلدە - قر قۇرىلىسشىلار وداعىنىڭ پرەزيدەنتى;

1999 جىلدىڭ قازان ايىنان - قر پارلامەنتى ءماجىلىسى 2-ءشى شاقىرىلىمىنىڭ دەپۋتاتى (№37 قىزىلوردا وبلىسىنىڭ ارالماڭى سايلاۋ وكرۋگىنەن, «وتان» رسپ اتىنان). ايماقتىق دامىتۋ جانە ەكونوميكالىق قايتا قۇرۋ كوميتەتىنىڭ مۇشەسى;

2004 جىلدىڭ قازان ايىنان 2007 جىلعا دەيىن - قر پارلامەنتى ءماجىلىسى 3-ءشى شاقىرىلىمىنىڭ دەپۋتاتى; قازكسر جوعارعى كەڭەسىنىڭ 11-ءشى, 12-ءشى, 13-ءشى شاقىرىلىمدارىنىڭ دەپۋتاتى;

قازاقستان قۇرىلىسشىلار وداعىنىڭ نەگىزىن سالۋشى. II دارەجەلى «بارىس», ەڭبەك قىزىل تۋ وردەندەرىمەن; قازكسر جوعارعى كەڭەسىنىڭ مەدالدارىمەن, قازاقستان رەسپۋبليكاسىنىڭ مەرەيتولىق مەدالدارىمەن, قازكسر جوعارعى كەڭەسىنىڭ قۇرمەت گراموتالارىمەن ماراپاتتالعان. كسرو مينيسترلەر كەڭەسى سىيلىعىنىڭ, ەۋروپا قورشاعان ورتانى قورعاۋ وبلىستىق «التىن گلوبۋس» سىيلىعىنىڭ لاۋرەاتى.

قىزىلوردا وبلىسىنىڭ قۇرمەتتى ازاماتى.