وسكەمەندەگى وبلىستىق قازاق دراما تەاترى 18-ءشى ماۋسىمىن جازۋشى باققوجا مۇقايدىڭ «سەرگەلدەڭ بولعان سەرىلەر» كومەدياسىمەن اشتى. قويىلىمداعى وقيعا نەگىزىنەن ءۇش جىگىت پەن ءبىر قىزدىڭ اراسىندا ءوربيدى. ساحنا ارتىندا تەلەفونمەن عانا تىلدەسەتىن ءتورتىنشى جىگىت پەن «كارى قىز» – سايرانىڭ قۇربىسى ايجان ارا-تۇرا عانا بوي كورسەتەدى. ءبىرى ماقتانشاق اقىن, ءبىرى جاسقانشاق عالىم, ەندى ءبىرى مانساپقور ءۇش جىگىتتىڭ بەتپەردەسى قويىلىم سوڭىندا باستى رولدەگى قىزدىڭ ۇلكەن قىزمەتتەگى اكەسى جۇمىستان بوساعان كەزدە اشىلادى. جەڭگەتاي قۇربىسىنىڭ دا «قوي تەرىسىن جامىلعان» قاسقىر ەكەنى ءمالىم بولادى.
قويىلىم رەجيسسەرى ساحان اكەلەەۆ كومەديا وتكەن عاسىردىڭ 80-ءشى جىلدارى جازىلسا دا, قاۋزاعان تاقىرىبى بۇگىنگى كۇنى دە ءوز وزەكتىلىگىن جوعالتپاعانىن ايتادى. «كوپتەگەن بويجەتكەندەرىمىزدىڭ «كارى قىز» اتانىپ, جىگىتتەردىڭ «سۇربويداق» دەگەن ايدار تاعىنۋى قازىرگى زاماندا كوبەيمەسە, ازايعان جوق. مانساپقور, جاعىمپاز, اتاققۇمار ادامداردىڭ قاتارى دا ارتا تۇسپەسە, كەمىمەگەنى انىق. ساحنا – ادامنىڭ ىشكى ايناسى. كورەرمەن وزدەرى بالكىم كۇندە ارالاسىپ جۇرگەن, بالكىم كۇندە ەسىگىن قاعىپ جۇرگەن ادامدارىن ساحنادان كورىپ, ويلانسىن دەگەن نيەتپەن قويىپ وتىرمىز. كومەديانى وسىنداي رەجيسسەرلىك كوزقاراسپەن بۇگىنگى كۇننىڭ سۇرانىسىنا, بۇگىنگىنىڭ تالابىنا ساي ەتىپ ىقشامداپ, وزىمىزشە تراكتوۆكا جاسادىق», – دەيدى رەجيسسەر. كومەديا سوڭىندا سەرىلەردى سەرگەلدەڭگە سالعان «كارى قىز» – سايرانىڭ رولىندەگى نازەركە ايدىنوۆامەن تىلدەسكەنىمىزدە ءوزىنىڭ جاسى كىشى بولعاندىقتان 30-داعى ايەلدىڭ بەينەسىن سومداۋ وڭايعا تۇسپەگەنىن, دەگەنمەن دە ساحناداعى سەرىكتەستەرى مەن كورەرمەننىڭ ىستىق ىقىلاسى جىگەرلەندىرگەنىن جەتكىزدى.
رەتى كەلگەندە ايتا كەتەيىك, وسكەمەندەگى وبلىستىق قازاق دراما تەاترى بيىل 30-عا تارتا جاس اكتەرلەرمەن تولىقتى. تەاتردىڭ كوركەمدىك جەتەكشىسى ساحان اكەلەەۆ وبلىس باسشىلىعىنىڭ قولداۋىمەن ولاردىڭ 20-دان استامىنا قىزمەتتىك پاتەر بەرىلگەنىن ايتتى.
ازامات قاسىم, «ەگەمەن قازاقستان»
وسكەمەن