پارلامەنت سەناتىنىڭ بيىلعى جىلعا ارنالعان نەگىزگى شارالار جوسپارىنا سايكەس, حالىقارالىق قاتىناستار, قورعانىس جانە قاۋىپسىزدىك كوميتەتىنىڭ مۇشەلەرى الماتى قالاسى مەن الماتى وبلىسىندا مەملەكەتتىك شەكارانى قورعاۋ ماسەلەلەرى بويىنشا كوشپەلى وتىرىس وتكىزدى, دەپ حابارلادى سەناتتىڭ ءباسپاسوز قىزمەتى.
كوشپەلى وتىرىس اياسىندا دەپۋتاتتار «قورعاس» حالىقارالىق شەكارالىق ىنتىماقتاستىق ورتالىعىندا بولىپ, قازاقستان جانە قىتاي بولىگىنىڭ جۇمىسىمەن تانىستى. سەناتورلارعا ورتالىقتىڭ جەكەلەگەن جوبالارى جونىندە ايتىلىپ, سونداي-اق ورتالىق اۋماعىندا ىسكە اسىرىلعان ينۆەستيتسيالىق جوبالار تۋرالى حاباردار ەتىلدى.
سونداي-اق, كوميتەت مۇشەلەرى ساپار بارىسىندا «شىعىس» ايماقتىق باسقارماسىنىڭ «قورعاس» شەكارا زاستاۆاسىندا جانە جاركەنت شەكارا وتريادىندا دا بولدى. دەپۋتاتتار تەحنيكالىق جابدىقتالۋ جانە جاۋىنگەرلىك كەزەكشىلىكتى ۇيىمداستىرۋ بارىسىمەن, سونداي-اق جەكە قۇرامنىڭ تۇرمىس جاعدايىمەن جاقىننان تانىستى.
بولىمشە باسشىسى ر.رامازانوۆ دەپۋتاتتارعا وتريادتىڭ كۇندەلىكتى جاۋىنگەرلىك قىزمەتى مەن جاۋاپتى بولىكتىڭ قازىرگى جاعدايى تۋرالى كەڭىنەن باياندادى.