باسكىلەردىڭ سەپاراتيستىك ەتا ۇيىمى قارۋلى كۇرەستى تۇپكىلىكتى توقتاتىندىقتارى تۋرالى جاريا ەتتى. وندا بىلاي دەلىنەدى: «ەتا يسپانيا مەن فرانتسيا ۇكىمەتتەرىنە جانجالداردىڭ سالدارىن شەشۋگە جانە قارۋلى قارسى تۇرۋلاردىڭ اياقتالۋىنا باعىتتالعان تىكەلەي ۇنقاتىسۋلاردى باستاۋ تۋرالى ۇندەۋ تاستايدى».
يسپانيا پرەمەر-ءمينيسترى حوسە لۋيس رودريگەس ساپاتەرو ءوزىنىڭ تەلەۇندەۋىندە ەتا-نىڭ قارۋلى كۇرەستى توقتاتۋ تۋرالى مالىمدەمەسىن دەموكراتيانىڭ, زاڭدىلىقتىڭ جانە پاراساتتىڭ جەڭىسى دەپ اتادى. ەتا ۇيىمىنىڭ تاۋەلسىز باسك مەملەكەتىن قۇرۋ ماقساتىندا 1959 جىلى نەگىزى قالانعان بولاتىن.
جاڭا جوسپاردى ماقۇلدادى
گرەكيا پارلامەنتى بيۋدجەت شىعىستارىن ودان ءارى قىسقارتۋدى قاراستىراتىن جاڭا داعدارىسقا قارسى جوسپاردى ماقۇلدادى. ول بويىنشا زەينەتاقى قىسقارىپ, جىلجىمايتىن م ۇلىككە قوسىمشا سالىق سالىناتىن بولادى. وعان قوسا, 10 مىڭ مەملەكەتتىك قىزمەتشى تولىق ەمەس ەڭبەكاقى الۋعا كوشىرىلەدى.
مۇنداي جوسپاردى قابىلداۋ گرەكياعا حالىقارالىق ۆاليۋتا قورىنان, ەۋروپا ورتالىق بانكىنەن جانە ەۋرووداقتان 8 ميلليارد دوللار قارجىلاي كومەك ءبولىنۋ ءۇشىن قاجەتتى شارت بولىپ تابىلادى. داعدارىسقا قارسى جوسپارعا داۋىس بەرۋ قارساڭىندا گرەكيادا ەكى كۇندىك جاپپاي ەرەۋىل بولىپ ءوتتى. پوليتسيامەن قاقتىعىستار سالدارىنان كەم دەگەندە 16 ادام جاراقات الدى. ءبىر ادام جۇرەك تالماسىنان كوز جۇمدى.
مەدۆەدەۆتىڭ تابىسى جاريا ەتىلدى
رەسەيدىڭ ورتالىق سايلاۋ كوميسسياسى «ءبىرتۇتاس رەسەي» پارتياسىنان مەملەكەتتىك دۋماعا كانديداتتاردىڭ تابىستارى تۋرالى مالىمەتتەردى جاريالادى. ولاردىڭ ىشىندە «بر-ءدىڭ» ءتىزىمىن باستاپ تۇرعان ەل پرەزيدەنتى دميتري مەدۆەدەۆ تە بار.
جاريالانعان دەرەكتەرگە سۇيەنسەك, ءبىر جىلدا مەدۆەدەۆ 3,37 ميلليون رۋبل تاۋىپتى. ەكى راريتەتتى گاز اۆتوكولىكتەرى مەن ماسكەۋدە پاتەرى جانە ەكى گاراجى بار ەكەن. سونداي-اق, ونىڭ اتىنا بىرقاتار بانكتەردەن ەسەپ اشىلسا, ولاردا 4,2 ميلليون رۋبل بار كورىنەدى. كولىكتەرىنە كەلسەك, بىرەۋى 1962 جىلعى گاز-21 بولسا, ەكىنشىسى 1948 جىلعى گاز-20.
ستۋدەنتتەرمەن كەزدەسۋىن بولدىرمادى
«ادىلەتتى رەسەي» پارتياسىنىڭ سەركەسى سەرگەي ميرونوۆ زاڭگەر ماماندىقتارىنا وقىتاتىن جوو-لار ستۋدەنتتەرىمەن كەزدەسپەك ەدى. ءبىرىنشى كەزدەسۋى رەسەي مەملەكەتتىك يننوۆاتسيالىق تەحنولوگيالار جانە كاسىپكەرلىك ۋنيۆەرسيتەتىندە ءوتۋى ءتيىس بولاتىن.
ميرونوۆتىڭ ايتۋىنشا, بىرەۋلەر ارقىلى وعان جوعارىدان تەلەفون شالىنىپ, جوو باسشىلىعىنا مۇنداي كەزدەسۋدى وتكىزبەۋ تۋرالى ۇسىنىس تۇسكەنى جەتكىزىلگەن. ال ونىڭ الدىندا كەزدەسۋ وتكىزۋگە «تەحنيكالىق اقاۋلار» كەدەرگى كەلتىرىپ وتىرعانى كولدەنەڭ تارتىلىپتى. «ءار-دەن» قورقاتىندارى سونشالىق, بىزگە فەدەرالدى باق-تارعا, ونىڭ ىشىندە تەلەكانالدارعا شىعۋعا جول جابىق, ەندى ادامدارمەن كەزدەسۋگە مۇمكىندىك بەرىلمەۋدە», دەيدى س.ميرونوۆ.
ازەربايجان يراننان نوتا الدى
جاقىندا ازەربايجان شەكاراشىلارى ولتىرگەن ادام اداسىپ كەتكەن يراندىق شەكاراشى بولىپ شىقتى. وسىعان بايلانىستى باكۋ تەھراننان نارازىلىق نوتاسىن الدى. يران شەكارا قىزمەتىنىڭ وكىلى, پولكوۆنيك مويتاب مۋساۆيدىڭ ايتۋىنشا, ونىڭ ارىپتەسى پاترۋل بارىسىندا قاتەلەسىپ كەتىپ, ازەربايجان شەكاراسىنا اياق باسقان.
ءمۋساۆيدىڭ سوزىنە قاراعاندا, ازەربايجان شەكاراشىلارى زاڭسىز ءارى جاۋىزدىق ارەكەتكە بارعان. مۇنىڭ الدىندا ازەربايجاننىڭ مەملەكەتتىك شەكارا قىزمەتى شەكارا بۇزۋشى ازەربايجان شەكاراشىلارىنا شابۋىل جاساماق بولدى, ءسويتىپ, ولاردى قارۋ قولدانۋعا ماجبۇرلەدى, دەگەن ەدى. قازا تاپقان 20 جاسار شەكاراشى اكبەر گاسانپۋر ەكەن.
قىسقا قايىرىپ ايتقاندا:
*گرەكيانىڭ مەملەكەتتىك قارىزى 350 ميلليارد ەۋروعا جاقىنداپ كەلەدى. ەل دەفولت شەگىندە تۇر. حۆق گرەكياعا 110 ميلليارد ەۋرو بولسە, بۇل قارجى ەلدى داعدارىستان شىعارۋعا جەتكىلىكسىز بولىپ شىقتى. ءسويتىپ, افينا تاعى دا قارجىلاي كومەك سۇراۋعا ءماجبۇر بولىپ وتىر.
*ۋكراينانىڭ «يۋجنوە» كونسترۋكتورلىق بيۋروسى كوپفۋنكتسيالى «ساپسان» زىمىراندىق كەشەن قۇرۋ جۇمىستارىن 2015 جىلدىڭ اياعىنا دەيىن اياقتاۋدى جوسپارلاپ وتىر. كەشەن قۇرۋعا شامامەن 439,3 ميلليون دوللار جۇمسالماق كورىنەدى.
*پەرۋدە فەيەرۆەركتەرگە قاتىستى ەكى وقيعا سالدارىنان كەم دەگەندە 18 ادام قازا تاپتى. بالالاردى قوسا العاندا 14 ادام پيروتەحنيكالار تيەلگەن اۆتوبۋس جارىلعان كەزدە كوز جۇمعان. ەكىنشىسىندە جاسىرىن زاۋىتتان پوليتسيا تاركىلەگەن پيروتەحنيكالار جارىلعان. وندا ءتورت پوليتسيا قىزمەتكەرى وپات بولعان.
*ۋكراينا باسشىلىعىنا لۆوۆ قالالىق كەڭەسىنىڭ دەپۋتاتى رۋسلان كوشۋلينسكي ۇسىنىسپەن شىقتى. وندا ول جەرگىلىكتى تۇرعىندار لۆوۆ اۋەجايىنا ۋكراينا ۇلتشىلدارى ۇيىمىنىڭ (ۋۇۇ) كوشباسشىسى بولعان ستەپان باندەرانىڭ اتىن بەرۋ تۋرالى ءوتىنىش ءبىلدىرىپ وتىرعانىن مالىمدەگەن.
اقش-تىڭ الاباما شتاتىنداعى اتمور قالاسىنداعى ءتۇرمەدە 2005 جىلى التى ايلىق ۇلىن جاۋىزدىقپەن ولتىرگەن 38 جاستاعى كريستوفەر توماس دجونسون جازالاندى. ونىڭ دەنەسىنە ماڭگىلىككە ۇيىقتاتاتىن ءدارى جىبەرىلدى.
ينتەرنەت ماتەريالدارى نەگىزىندە ازىرلەندى.