فۋتبولدان قازاقستان ۇلتتىق قۇراماسىنىڭ بۇرىنعى باس باپكەرى تالعات بايسۋفينوۆ «استانانىڭ» ەۋروپا ليگاسىنداعى اياق الىسى تۋرالى پىكىر ءبىلدىردى.
– تالعات مارۋان ۇلى, «استانا» وتكەن اپتادا ەۋروپا ليگاسىنىڭ توپتىق كەزەڭىندە «ۆيلياررەالعا» ەسە جىبەردى. الايدا, كەمىندە ءبىر ۇپاي الاتىن مۇمكىندىكتەرى بار ەدى. ءسىزدىڭ ويىڭىزشا جەرلەستەرىمىزگە بۇل ويىندا نە جەتىسپەدى؟
– شىنىمدى ايتسام, باپكەرلەردىڭ جۇمىسىنا باعا بەرۋدى ءجون كورمەيمىن. الايدا, مەنىڭ ءبىر پىكىرىممەن كوپشىلىك كەلىسەدى دەگەن ويدامىن. ەگەر قازاقستان پرەمەر-ليگاسىندا «استانا» قورعانىسقا كوبىرەك كوڭىل بولگەنىندە سوڭعى ءۇش ەۋروكۋبوكتىق ويىندا 11 گول جىبەرمەس ەدى. ەلوردالىقتار ىشكى بىرىنشىلىكتە ەۋروكۋبوكتىق دەڭگەيدەگى ۇلكەن ماتچتار وتكىزبەيدى. وسى جاعى قيىندىق تۋدىرىپ وتىرعانىن جاسىرۋ مۇمكىن ەمەس. يسپانياداعى ءۇش گول كوماندالىق ويىندا كەتكەن كەمشىلىكتەردىڭ سالدارىنان ەمەس قورعاۋشىلار مەن قاقپاشىنىڭ جەكەلەگەن قاتەلىكتەرىنەن بولىپ وتىر. ەگەر قازاقستان چەمپيوناتىندا وزگە كوماندالار «استانانى» ءجيى قىسىمعا الىپ, وسىنىڭ اسەرىنەن ەلوردالىقتار ماۋسىم بويى قورعانىستا جيناقى ءارى ساۋاتتى ويناپ ۇيرەنسە, باپكەرلەرگە دە, ويىنشىلاردىڭ وزدەرىنە دە حالىقارالىق ماتچتارعا قاتىسۋ وڭاي بولار ەدى. ماسەلەن, «ۆيلياررەالعا» قارسى ويىن الدىندا «استانا» «اتىراۋدى» قالاي شىر كوبەلەك اينالدىردى. قازاقستاندىق كوماندالاردىڭ ەلوردالىقتارعا لايىقتى دەڭگەيدە قارسىلىق كورسەتە الماۋى – «استانانىڭ» ەۋروكۋبوكتارداعى ساتسىزدىكتەرىنىڭ ءبىر سەبەبى.
– ء ۇش جىل بۇرىن «ۆيلياررەال» جەرلەستەرىمىزدى 4:0 ەسەبىمەن ويسىراتا ۇتقان ەدى. بۇل جولى ونداي ءىرى ەسەپ تىركەلمەدى. بۇل ەلوردالىقتاردىڭ كۇشەيگەنىنىڭ بەلگىسى مە, الدە يسپانيالىقتاردىڭ السىرەگەنى مە؟
– ارينە, «استانا» سوڭعى جىلدارى كۇشەيدى. ءۇش جىل قاتارىنان كارى قۇرلىقتىڭ باستى دودالارىندا ونەر كورسەتۋ كەز كەلگەن كوماندانىڭ قولىنان كەلە بەرمەيدى. وسىعان قاراپ-اق دۇرىس باعىتتا كەلە جاتقانىن اڭعارۋعا بولادى. «استانا» – قازىرگى ۋاقىتتا ەلىمىزدەگى تۇراقتى, تابىستى كوماندا. «ۆيلياررەالعا» قارسى وتەتىن جاۋاپتى كەزدەسۋدە جەرلەستەرىمىزدىڭ بارىن سالارىنا سەنىمدىمىن.
– «استانا» وزىنە قاجەت ويىنشىلارمەن تولىق جاساقتالماعان سەكىلدى. ماسەلەن, يسپانياداعى ويىندا الاڭعا ەكىنشى تايمدا شىققان جىگىتتەر ءوز پوزيتسيالارىندا ونەر كورسەتپەدى. قارجىلىق fairplay ەرەجەسىنىڭ ترانسفەرگە شەكتەۋ قويىلۋى «استاناعا» كەرى اسەرىن تيگىزىپ وتىر دەپ ويلايسىز با؟
– شىنىمدى ايتسام, قارجىلىق fairplay ايتارلىقتاي كەدەرگى دەي المايمىن. سەبەبى, بۇل حالىقارالىق ۇيىمنىڭ قويعان تالابى. مىسالعا ەرەجە كەدەرگى كەلتىرىپ وتىر دەپ قولىڭىزبەن گول سوعا المايسىز عوي, سول سياقتى قاقپانىڭ دا كولەمىنە قىسقارتا المايسىز. مەن بۇل جەردە fair play ەرەجەسىن ەمەس كەرىسىنشە «استانادان» سوڭعى جىلدارى ماقتارلىقتاي قازاقستاندىق ويىنشىنىڭ شىقپاعانىن العا تارتار ەدىم. كوماندانى 11 لەگيونەرگە سەنىپ تاپسىرۋ دۇرىس ەمەس. بىلاي الىپ قارايتىن بولساق, «استانادا» شەتەلدىكتەرگە باسەكەلەس بولا الاتىن ويىنشىلار شىعا قويمادى. ىلعي دا سول الاڭعا شىعاتىن لوگۆينەنكو, مۋجيكوۆ, شومكو. اراسىندا بەيسەبەكوۆ پەن مۇرتازاەۆ كورىنىپ تۇرادى. بولدى, باسقا ەشكىم جوق. مەنىڭشە, «استانا» جەرگىلىكتى مىقتى ويىنشىلارمەن تولىقسا نەمەسە اكادەمياسىنا كوڭىل بولسە ۇلكەن كومەگى تيەر ەدى. بىراق سول جاستارعا قانشالىقتى جاعداي جاسالىپ وتىر ەكەن؟ ەلىمىزدىڭ ۇزدىك كومانداسىنىڭ ءوز بازاسى, قوسالقى الاڭى جوق. وسىدان كەيىن نە ايتۋعا بولادى؟
– سىرت الاڭدا وتەتىن ەۋروكۋبوكتىق ويىنداردا «استاناعا» سەنىمدىلىك جەتىسپەيتىنى بايقالادى. بۇل ويىنشىلارداعى شەبەرلىكتىڭ جەتىسپەۋشىلىگى مە, الدە باسقا دا سەبەپتەرى بار ما؟
– مەنىڭشە, بۇل ستەرەوتيپ سەكىلدى. سەبەبى, «استانا» دا, ۇلتتىق قۇراما دا ءوز جانكۇيەرلەرىنىڭ الدىندا جاقسى ونەر كورسەتەدى. مەنىڭشە, ويىنشىلاردىڭ وزدەرى دە وسىعان ىشتەي دايىن بولاتىن سەكىلدى. ال سىرتتا وتەتىن ماتچتاردا نە ويلايتىنى بەلگىسىز. پسيحولوگيالىق قيىندىقتان بولەك, «استانانىڭ» قوناقتاعى ويىندارى وڭاي ەمەس. سەبەبى, ءار ويىنعا كەمىندە بەس ساعات جول ءجۇرۋى ءتيىس. ال توپتاعى كوماندالاردىڭ جاعدايى باسقاشا. جارتى جىلدا ءبىر-اق رەت استاناعا كەلەدى. ۇزاق جول ءجۇرۋ ويىنشىلاردىڭ دەنساۋلىعىنا دا اۋىر تيەدى.
– ىشكى بىرىنشىلىكتە «استانانىڭ» «قايراتتان» وزگە قارسىلاسى جوق دەپ ايتۋعا بولادى. وسىدان كەلىپ «استانا» ەۋروكۋبوكتىق ويىندارعا لايىقتى دەڭگەيدە دايىندالا المايدى دەپ ەسەپتەۋگە بولا ما؟
– وسىنىڭ سالدارىنان بۇكىل قازاق فۋتبولى زارداپ شەگىپ وتىر. باسەكەلەستىك ورناعان جەردە «استانا» دا, «قايرات» تا, ۇلتتىق قۇراما دا يگىلىگىن كورەتىن ەدى. كوماندالاردىڭ العا قادام باسىپ كەلە جاتقانىن جوققا شىعارا المايمىن. بىراق «استانا» مەن «قايرات» وزگەلەرىنە قاراعاندا جىلدام دامىپ بارادى. بىرىنشىلىك دەڭگەيى دە ارتىپ كەلەدى, بىراق ايتارلىقتاي جىلدام ەمەس. بۇدان بولەك, وزگە ەلدەردىڭ دە ءبىر ورىندا تۇرىپ قالمايتىنىن ەستە ساقتاعانىمىز ءجون. ءبىز ءبىر قادام العا جىلجىعاندا, ەۋروپا بىرنەشە قادام اتتاپ باسادى. قازاق فۋتبولىندا باسەكەلەستىك ارتۋى ءۇشىن تاعى ەكى-ءۇش كلۋبتىڭ دامۋى كەرەك.