س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە كارتوپتى سۇرىپتاۋ جانە داقىلداندىرۋ جونىندەگى قازاق-قىتاي عىلىمي ورتالىعى اشىلادى.
شاندۋن پروۆينتسياسى مەن شيسەن (قحر) كارتوپ ءوندىرۋ كومپانياسى دەلەگەتسياسى عىلىمي- تاجىريبەلىك كامپۋس اۋماعىندا كارتوپ سۇرىپتاۋ ناتيجەسىمەن, قىتايمەن بىرلەسىپ قۇرىلعان عىلىمي-وندىرىستىك ورتالىقتاردىڭ جۇمىستارىمەن تانىستى. دەلەگاتسيا قۇرامىندا شاندۋن پروۆينتسياسىنىڭ مەملەكەتتىك ورگاندارى مەن كارتوپ ءوندىرۋشى كومپانيانىڭ وكىلدەرى بار.
ەكى جاقتى كەلىسىمگە سايكەس قازاتۋ بازاسىندا فەرمەرلەردى اگرووندىرىس سالاسىنداعى جاڭا تەحنولوگيالار بويىنشا وقىتۋ جۇمىستارى ۇيىمداستىرىلاتىن بولادى. سونىمەن قاتار, ۋنيۆەرسيتەت جانىنان كارتوپتىڭ ۆيرۋسسىز شاعىن تۇينەك سورتىن سۇرىپتاۋ جونىندەگى زەرتحانا اشىلادى.
كادرلاردى بىرلەسىپ دايارلاۋ ءۇشىن قىتايلىق تاراپ 10 جاس عالىمدى قىتايدا وقىتۋ ءۇشىن, 5 ماماندى شاندۋن پروۆينتسياسىنىڭ جوو-دا ءىس-تاجىريبەدەن وتكىزۋ ءۇشىن ارنايى گرانت ءبولدى. «Xisen Potato Industry Group Co. Ltd» كومپانياسىنىڭ پرەزيدەنتى قازاتۋ-عا ستۋدەنتتەردى قىتايدا جانە ۋنيۆەرسيتەت قابىرعاسىندا وقىتۋعا 2 ملن يۋان, ياعني 102 ملن تەڭگە ءبولدى.
قازاق اگروتەحنيكالىق ۋنيۆەرسيتەتى «Xisen Potato Industry Group Co. Ltd» كارتوپ ءوندىرۋشى كومپانياسىمەن 4 جىلدان بەرى ارىپتەستىك قارىم-قاتىناس ورناتقان. قازاتۋ قىتايلىق كومپانياعا ۋنيۆەرسيتەتتىڭ عىلىمي-تاجىريبەلىك كامپۋسىنداعى 35 گەكتار جەرگە كارتوپ ەگۋگە, بىرلەسكەن عىلىمي تاجىريبەلەر جۇرگىزۋگە جانە دەمونستراتسيالىق ستاتسيونار قۇرۋعا 35 گەكتار جەرگە جۇمىس جۇرگىزۋگە مۇمكىندىك بەردى. قىتايلىق تاراپ ۋنيۆەرسيتەتتى 8 بىرلىك كارتوپ تەحنيكاسى جانە وزگە دە قوندىرعىلارمەن قامتاماسىز ەتتى.
شەتەلدىك دەلەگاتسيالاردىڭ قاتىسۋىمەن وتكەن عىلىمي كەڭەستە شاندۋن پروۆينتسياسى عىلىم جانە تەحنولوگيا دەپارتامەنتىنىڭ باس ديرەكتورى ليۋ ۆەيمينگە جانە شيسەن كارتوپ ءوندىرۋ كومپانياسىنىڭ پرەزيدەنتى ليانگ شيسەنگە قازاتۋ-دىڭ قۇرمەتتى پروفەسسورلارى اتاعى بەرىلدى.
ايا ءومىرتاي,
«ەگەمەن قازاقستان»