بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ توراعالىعىمەن وبلىس اكىمدىگىندە سەلەكتورلىق ءماجىلىس ءوتتى. كۇن تارتىبىندە نەگىزگى ءۇش ماسەلە قارالدى.
سونىڭ ءبىرى – ايماقتىڭ 2017 جىلدىڭ 8 ايىنداعى الەۋمەتتىك-ەكونوميكالىق دامۋ قورتىندىسى بولدى. بۇل تۋرالى وبلىستىق ەكونوميكا جانە بيۋدجەتتى جوسپارلاۋ باسقارماسىنىڭ باسشىسى ارمان ءسابيتوۆ بايانداما جاساپ, سالاداعى اتقارىلعان جۇمىستارعا ەسەپ بەردى.
ونىڭ ايتۋىنشا, وبلىسىمىزداعى ونەركاسىپ ءونىمىنىڭ كولەمى 510,1 ملرد. تەڭگەنى قۇراپ, وتكەن جىلدىڭ سايكەس كەزەڭىمەن سالىستىرعاندا 0,2 پايىزعا ارتقان. ال, وڭدەۋ ونەركاسىبى ءونىمىنىڭ كولەمى 353,0 ملرد. تەڭگەنى قۇراپ, 2,4 پايىزعا ءوسىپ وتىر. جىلدىڭ قورىتىندىسىمەن كەن ءوندىرۋ ونەركاسىبى ءونىمىنىڭ كولەمى 200 ملرد. تەڭگەنى قۇراعان.
«وبلىسىمىزدا جەڭىل ونەركاسىپ – 5,2 پايىزعا, ماشينا جاساۋ – 32,7, حيميالىق ونەركاسىپ – 17,3, مەتاللۋرگيا – 17,0, وزگە مەتالل ەمەس مينەرالدىق ونىمدەر – 14,8, فارماتسەۆتيكالىق ونىمدەر – 12,1, تاماق ونىمدەرىن ءوندىرۋ – 8,4 پايىزعا ارتىپ وتىر. جىلدىڭ قورىتىندىسىمەن وڭدەۋ ونەركاسىبى ءونىمىنىڭ كولەمى 570 ملرد. تەڭگەنى قۇرايدى دەگەن جوسپار بار», - دەدى ارمان ءسابيت ۇلى.
بيىل وبلىسقا 266,0 ملرد. تەڭگە ينۆەستيتسيا باعىتتالىپ, 2016 جىلدىڭ ءتيىستى كەزەڭىمەن سالىستىرعاندا 21,8 پايىزعا ارتقان. ال, اۋىل شارۋاشىلىعىنىڭ جالپى ءونىم كولەمى 257,4 ملرد. تەڭگەنى قۇراسا, مال شارۋاشىلىعىندا مال باسىنىڭ سانى ورتاشا ەسەپپەن 5,5 پايىزعا كوبەيگەن. سونداي-اق, ەت ءوندىرىسى – 5,1, ءسۇت - 2,0, جۇمىرتقا – 9,1 پايىزعا وسكەن.
وبلىس اكىمى جوعارىدا اتالعان سالالار بويىنشا تومەن كورسەتكىش كورسەتكەن اۋدان, قالا باسشىلارىنىڭ جۇمىسىن جانداندىرۋ قاجەتتىگىن ەسكەرتتى.
«سىرتقى ينۆەستيتسيا تارتۋدى جانداندىرۋ قاجەت. سونىمەن قاتار باسقارما باسشىلارى مەن اۋدان, قالا اكىمدەرى 2017 جىلعا جوسپارلانعان ينديكاتورلاردىڭ تولىق ورىندالۋىن قامتاماسىز ەتىپ, ينديكاتورلاردىڭ ورىندالۋى تۋرالى اقپاراتتى اي قورىتىندىسىمەن ەكونوميكا جانە بيۋدجەتتىك جوسپارلاۋ باسقارماسىنا ۇسىنۋدى تاپسىرامىن», - دەدى جانسەيىت تۇيمەباەۆ.
ء ماجىلىس بارىسىندا وبلىستىق بيۋدجەتتىڭ يگەرىلۋ بارىسى دا تالقىلاندى. بۇل تۋرالى وبلىستىق قارجى باسقارماسى باسشىسىنىڭ مىندەتىن اتقارۋشى راقىمبەردى مۇلكەمانوۆ بايانداما جاساپ, جىل سوڭىنا دەيىن ءتيىستى قارجىلاردىڭ يگەرىلۋ قاجەتتىگىنە توقتالدى. بۇل رەتتە وبلىس باسشىسى جەرگىلىكتى بيۋدجەتى يگەرۋ ماقساتىنداعى جۇمىستاردى جەتىلدىرىپ, ناقتى جوسپار قۇرۋدى جۇكتەدى.