الماتى وبلىسى ەڭبەكشىقازاق اۋدانىنىڭ ورتالىعى شەلەك اۋىلىندا بەس ءجۇز ورىندىق جاڭا مەشىت بوي كوتەردى. وتە قىسقا مەرزىمدە تۇرعىزىلعان بۇل مەشىت تەك قۇلشىلىق ورنى عانا ەمەس, اۋىل حالقىنىڭ باسىن بىرىكتىرەتىن تاتۋلىق ۇياسىنا دا اينالعانداي.
وتىز مىڭنان اسا تۇرعىنى بار شەلەك اۋىلىنىڭ بۇرىنعى مەشىتى ەرتەرەكتە سالىنعاندىقتان, وندا كوپ ادامنىڭ ناماز وقۋىنا مۇمكىنشىلىك بولماي كەلگەن ەدى. اۋىل حالقى كوپتەن بەرى جاڭا مەشىت سالۋدى نيەت ەتىپ, قارجى ماسەلەسىن شەشۋ ءۇشىن تالاي باستاما كوتەرگەن. ءۇش جىلدان بەرى شەشىمى تابىلماي كەلگەن ماسەلە, اللا قولداپ, بيىل جۇزەگە اسىپ وتىر.
جەرگىلىكتى اكىمدىك پەن اۋىل تۇرعىندارى كاسىپكەر د.كۋزيەۆتەن مەشىت سوعۋعا جاردەم بەرۋدى كوپتەن بەرى سۇراپ جۇرگەن. كوكتەم ايلارىنىڭ بىرىندە شەلەك اۋىلىنىڭ اقساقالدارىمەن بولعان باسقوسۋدا بەلگىلى كاسىپكەر ءدىلمۇرات كۋزيەۆ اۋىل مەشىتىنىڭ قۇرىلىسىن قارجىلاندىرۋدى موينىنا الىپ, مەشىتتىڭ جوباسى مەن ورىنىن حالىقتىڭ ءوزى تاڭداسا دەگەن ءوتىنىش بىلدىرگەن. كوپ ۇزاماي, وسى شەلەك اۋىلىنىڭ تۇرعىنى بەلال ۋشۋروۆ دەيتىن جاس كاسىپكەر اۋىلعا كىرە بەرىستەگى وزىنە تيەسىلى جەر تەلىمىن مەشىت سوعاتىن ورىن رەتىندە تەگىن بەرىپ, سونىمەن قاتار قۇرىلىس جۇمىسىن جارتىلاي قارجىلاندىرۋعا نيەت ءبىلدىردى. اۋداننىڭ بەلگىلى ازاماتى, قايىرىمدىلىق شارالاردىڭ ۇنەمى بەل ورتاسىندا جۇرەتىن بولات نۇرعازيەۆ بولسا بۇل يگى ءىستى قارجىلاندىرىپ قانا قويماي, مەشىتتىڭ جوباسىن جاساۋ, ساۋلەتتەندىرۋ جانە باسقا دا ماڭىزدى شارۋالارىن ءوز موينىنا الدى. ۇيىمداستىرۋشىلار مەشىت قۇرىلىسىن جۇرگىزۋمەن قاتار, اۋىل تۇرعىندارىن وسى شاراعا جۇمىلدىرۋدى, ەلدىڭ ىشكى تاتۋلىعى مەن كەلىسىمىن نىعايتۋدى كوزدەپ, شەلەك قوعامدىق بىرلەستىگىن قۇردى. بىرلەستىكتىڭ ءتورايىمى ەتىپ ت.كەنجەەۆا اتىنداعى ورتا مەكتەپتىڭ ديرەكتورى ارداق قىرىقباي تاعايىندالدى.
مەشىت قۇرىلىسىنا اۋىل تۇرعىندارى جاز بويى جۇمىلا كىرىستى. ءتۇرلى ۇلت وكىلدەرى عانا ەمەس, وزگە ءدىن وكىلدەرى دە اللانىڭ ءۇيىن سالۋعا اتسالىستى. قۇرىلىس جۇمىسىنان وزگە, جۇمىسكەرلەرگە تاماق ازىرلەۋ, گۇل وتىرعىزۋ, اۋلانى اباتتاندىرۋ سەكىلدى شارۋانى جەرگىلىكتى حالىقتىڭ ءوزى اتقاردى. ونىڭ سىرتىندا شەلەك بىرلەستىگىنىڭ ەسەپ-شوتىنا قارجىلاي كومەگىن اۋدارعان تۇرعىندار دا جەتەرلىك.
– مەشىت رۋحانياتتىڭ, مادەنيەتتىڭ, سونداي-اق بەيبىتشىلىكتىڭ ورداسى. بارشا ۇلت وكىلدەرىن عانا ەمەس, كۇللى ادامزاتتىڭ باسىن جاراتۋشىنىڭ الدىندا بىرىكتىرەتىن قاسيەتتى ورىن. مەشىتتى تەك عيبادات ءۇشىن سوقپايدى, ۇرپاق بولاشاعى ءھام ادامزات تىنىشتىعى ءۇشىن, بۇگىنگى بۋىن مەن كەلەشەكتىڭ تاتۋلىعى مەن ىنتىماعىن نىعايتۋ ءۇشىن تۇرعىزادى. بۇل قاسيەتتى ءۇيدى دە ءبىز قۇرىلىسىن باستاعان كەزدە سونداي نيەتپەن قولعا الدىق, – دەدى جۋرناليستەردىڭ سۇراقتارىنا جاۋاپ بەرگەن كاسىپكەر د.كۋزيەۆ.
شەلەك اۋىلىنداعى ەڭسەلى جاڭا مەشىتتىڭ اشىلۋ سالتاناتىنا كمدب توراعاسىنىڭ ءبىرىنشى ورىنباسارى مۇحاممەد حۋسەين السابەكوۆ باستاعان ءدىن جانە زيالى قاۋىم وكىلدەرى قاتىسىپ, اۋىل تۇرعىندارىنا دەگەن جىلى لەبىزدەرىن ءبىلدىردى.
قانات ەسكەندىر. الماتى.