ۇكىمەت باسشىسى مۇنايلى ايماققا جۇمىس ساپارىمەن كەلدى
مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى مەن «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى مىندەتتەردى جۇزەگە اسىرۋ بويىنشا مۇنايلى ايماقتا قولعا الىنعان يگى ىستەردىڭ قاتارى كوپ. بۇعان پرەمەر-مينيستر باقىتجان ساعىنتاەۆ اتىراۋ وبلىسىنا جۇمىس ساپارى كەزىندە كوز جەتكىزدى.
بولاشاق مۇنايشىلاردىڭ ءبىلىم ورداسى
ەلباسى جولداۋىندا ادامي كاپيتالدى دامىتۋ, ءبىلىم بەرۋدىڭ كوكجيەگىن كەڭەيتۋ ماسەلەسىنە نازار اۋدارىلعان. وسى رەتتە اتىراۋداعى APEC Petro Technic جوعارى تەحنيكالىق كوللەدجىندەگى مۇناي-گاز سالاسى ماماندارىن وقىتۋدىڭ قازىرگى زامانعى ۇلگىسىن ايرىقشا اتاۋعا بولادى. اشىلعانىنا بەس جىل بولعان وقۋ ورنىندا جاستاردىڭ الاڭسىز ءبىلىم الۋىنا قاجەتتى بارلىق جاعداي بار. پرەمەر-ءمينيستردىڭ جۇمىس ساپارى وسى ءبىلىم ورداسىنان باستالدى. ستۋدەنت جاستارمەن كەزدەسكەن باقىتجان ساعىنتاەۆ مۇناي-گاز سالاسىنا كادر دايىنداۋ, تۇلەكتەردىڭ باسەكەگە قابىلەتتىلىگىن ارتتىرۋ, بولاشاق ماماندىقتارى ءۇشىن داعدىلار مەن بىلىكتىلىكتەر قالىپتاستىرۋ, دۋالدى وقىتۋدىڭ ەرەكشەلىكتەرى مەن كاسىبي قۇزىرەتتەردى كەڭەيتۋ بويىنشا جاس ماماندارعا جاعداي جاساۋ ماسەلەلەرىنە توقتالدى. ءبىلىم جانە عىلىم ءمينيسترى ەرلان ساعاديەۆ كەزدەسۋدە ايتىلعان جايتتار بويىنشا تۇسىنىكتەمە بەرىپ, جاستارعا زامانعا ساي ءبىلىم الۋدىڭ قاجەتتىلىگىن اتاپ ايتتى.
تەحنولوگيالىق جاڭعىرتۋ تيىمدىلىگى
ەلباسى جولداۋى اياسىندا مۇناي-گاز سالاسىنداعى كاسىپورىنداردىڭ تەحنولوگيالىق جاڭعىرتىلۋى پرەمەر-ءمينيستردىڭ قاتىسۋىمەن وتكەن جيىننىڭ كۇن تارتىبىنە قويىلدى. «تەڭىزشەۆرويل» بىرلەسكەن كاسىپورنىندا بولعان ۇكىمەت باسشىسى اتىراۋ, ماڭعىستاۋ, اقتوبە, باتىس قازاقستان, قىزىلوردا وبلىستارىنداعى ءىرى مۇناي كومپانيالارىنىڭ باسشىلارىمەن كەزدەستى.
الدىمەن اتىراۋ وبلىسىنىڭ الەۋمەتتىك-ەكونوميكالىق جاعدايى تۋرالى حابارلاما جاساعان ايماق باسشىسى نۇرلان نوعاەۆ ەكونوميكانى ءارتاراپتاندىرۋ بويىنشا قولعا الىنعان شارالاردى دا نازاردان تىس قالدىرمادى. بۇگىندە مۇنايلى وڭىردە 600-دەن استام ونەركاسىپ كاسىپورنى جۇمىس ىستەيدى. «قازاقستاندىق مازمۇننىڭ ۇلەسىن كوبەيتۋ تۋرالى شەتەلدىك كومپانيالارمەن كەلىسىمدەر جاسالدى. الايدا قۇرال-جابدىقتاردى جەتكىزۋ مەن ورنالاستىرۋدا جەرگىلىكتى جەردىڭ مۇمكىندىگى ءالى دە تولىق پايدالانىلماي كەلەدى», – دەدى وبلىس اكىمى.
ەنەرگەتيكا ءمينيسترى قانات بوزىمباەۆ مۇناي-گاز سالاسىنداعى كاسىپورىنداردى تەحنولوگيالىق جاڭعىرتۋ تۋرالى بايانداسا, اقپارات جانە كوممۋنيكاتسيالار ءمينيسترى داۋرەن اباەۆ «تسيفرلى قازاقستان» باعدارلاماسىنىڭ شەڭبەرىندەگى ءىس-شارالار جايىنا توقتالدى. «قازمۇنايگاز» اق-تىڭ جۇمىسىنان كاسىپورىن باسشىسى ساۋات مىڭباەۆ حاباردار ەتتى. «سنپس – اقتوبەمۇنايگاز», «پەترو قازاقستان قۇمكول رەسورسيز», «تەڭىزشەۆرويل», باسقا دا كومپانيالارداعى تەحنولوگيالىق جاڭعىرتۋلار دا اڭگىمە وزەگى بولدى.
جيىندى قورىتىندىلاعان باقىتجان ساعىنتاەۆ مۇناي-گاز سالاسى ماماندارىنىڭ بىلىكتىلىگىن ارتتىرۋ, جۇمىسسىزدىقتىڭ الدىن الۋ, جوبالارداعى جەرگىلىكتى قامتۋدى كوبەيتۋ بويىنشا كاسىپورىن باسشىلارىنا مىندەتتەر جۇكتەدى.
اتىراۋلىق كاسىپكەرلەردىڭ بيزنەسى بەرەكەلى
اتىراۋداعى «اتامەكەن» ۇقپ وڭىرلىك كەڭەسىنىڭ مۇشەلەرى دە ۇكىمەت باسشىسىمەن كەزدەسۋ مۇمكىندىگىنە يە بولدى. شاعىن جانە ورتا بيزنەستى دامىتۋ, كاسىپكەرلەردى ەلىمىزدىڭ مۇناي-گاز سالاسىن تسيفرلاندىرۋعا تارتۋ ماسەلەلەرى ايتىلعان ماجىلىستە مۇنايلى وڭىردە شاعىن يندۋستريالىق ايماقتار قۇرۋ, اۋىل شارۋاشىلىعى سالاسى بيزنەسىن نەسيەلەندىرۋ جايى دا نازاردان تىس قالمادى.
پرەمەر-مينيستر ەلباسى تاپسىرماسىنا سايكەس تسيفرلى تەحنولوگيالاردى ەكونوميكانىڭ بارلىق سالالارىنا ەنگىزۋ كەرەكتىگىن اتاپ ءوتتى. كاسىپكەرلەرگە سايكەس ىنتالاندىرۋ جۇيەسىن قۇرۋ, نورماتيۆتىك بازانى جەتىلدىرۋ, كاسىپورىنداردى تسيفرلى ترانسفورماتسيالاۋ ءۇشىن شىعىنداردى ازايتۋ, تسيفرلى جوبالارعا ينۆەستيتسيالار تارتۋ ءۇشىن قولايلى جاعداي جاساۋ بويىنشا جۇمىس جۇرگىزىلۋدە. اتىراۋ وبلىسىنىڭ كاسىپكەرلەرى بۇل باعىتتا ۇلكەن مۇمكىندىككە يە, سەبەبى مۇناي-گاز سالاسى يندۋستريا 4.0 ەلەمەنتتەرىن ەنگىزۋ ءۇشىن وتە قولايلى. باقىتجان ساعىنتاەۆ ۇكىمەتتىڭ بيزنەستى قولداۋ, جەڭىلدىكتى نەسيەلەۋ تۇرىندەگى قۇرالدارى بار اوك-ءتى دامىتۋ مەن ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ اياسىنداعى جۇمىستار جالعاسىپ جاتقانىنان حاباردار ەتتى.
ينۆەستيتسيالىق جوبانىڭ يگىلىگى كوپ
قاشاعان كەن ورنىنىڭ نىساندارىندا مۇناي-گاز سالاسىنداعى ءوندىرىس قۋاتتىلىعىن ارتتىرۋ بويىنشا تاپسىرمالاردىڭ ورىندالۋ بارىسى دا ۇكىمەت باسشىسىنا باياندالدى. جاساندى D ارالى مەن «بولاشاق» زاۋىتىن ارالاعان باقىتجان ساعىنتاەۆ الەمدەگى ءىرى كومىرسۋتەكتى نىسانداردىڭ ءبىرى جانە ەلىمىزدەگى ەڭ ءىرى حالىقارالىق ينۆەستيتسيالىق جوبا رەتىندە قاشاعاننىڭ ماڭىزى زور ەكەنىن اتاپ ايتتى. قازىر مۇندا اي سايىن 650 مىڭ تونناعا دەيىن مۇناي وندىرىلەدى. ال «بولاشاق» زاۋىتى مۇنايدى قايتا وڭدەۋمەن, ونى ساقتاۋمەن جانە ەكسپورتقا جونەلتۋمەن, گازدى دايىنداۋمەن, سۇيىلتىلعان گازدى وتىن رەتىندە الۋمەن, كۇكىرت ءوندىرۋ ءارى ونى ساقتاۋمەن, قالدىق گازدى تازارتۋمەن جانە قولدانىستاعى جەلىگە قوسىلۋ نۇكتەسىنە دەيىن جەتكىزۋمەن اينالىسادى. جاقىندا اتىراۋدا تاعى ءبىر جوبا باستاۋ الادى. تاۋلىگىنە 4500 توننا تۇيىرشىكتەلگەن كۇكىرت شىعاراتىن زاۋىتتىڭ ءوڭىر ەكونوميكاسىنا قوساتىن ۇلەسى كوپ بولماق.
«نۇرلى جەر» باعدارلاماسى: قۇرىلىستا قارقىن بار
ۇكىمەت باسشىسى جۇمىس ساپارىندا «نۇرلى جەر» باعدارلاماسى بويىنشا سالىنعان كوپ پاتەرلى تۇرعىن ۇيلەردى كورۋگە دە ۋاقىت تاپتى. وبلىس ورتالىعىنداعى «نۇرسايا» شاعىن اۋدانىنداعى «تۇلپار-2» تۇرعىن ءۇي كەشەنى مەملەكەتتىك باعدارلاما شەڭبەرىندە بوي كوتەرگەن. بيىل اتىراۋدا 370 شارشى مەتر تۇرعىن ءۇي پايدالانۋعا بەرىلدى, بۇل وتكەن جىلمەن سالىستىرعاندا 20 پايىزعا ارتىق كورسەتكىش. قازىر 37 كوپ قاباتتى تۇرعىن ءۇي قۇرىلىسى ءجۇرىپ جاتىر. قۇرىلىس جۇمىستارىمەن تانىسقان باقىتجان ساعىنتاەۆ: «ەڭ الدىمەن الەۋمەتتىك نىساندارعا, مەكتەپ, بالاباقشالاردىڭ سالىنۋىنا, ساپالى تۇرعىزىلۋىنا ماڭىز بەرىلۋى كەرەك» – دەدى.
باقىتگۇل باباش, «ەگەمەن قازاقستان»
اتىراۋ
سۋرەت پرەمەر-ءمينيستردىڭ ءباسپاسوز قىزمەتىنەن الىندى