وقىرمان ويىندا بولسا, «ورالمان» كوركەم ءفيلمى جىل باسىندا يراندا وتكەن XXXV حالىقارالىق فادجر كينوفەستيۆالىندە باس جۇلدەنى, سونىمەن قاتار XIII حالىقارالىق «ەۋرازيا» كينوفەستيۆالىنىڭ دە باس جۇلدەسىن جەڭىپ العان بولاتىن.
رەجيسسەر ءسابيت قۇرمانبەكوۆتىڭ «ورالمان» فيلمىندە باستى ءرولدى سومداعان اكتەر دۋلىعا اقمولدا 5-11 قىركۇيەك ارالىعىندا تاتارستاندا وتكەن XIII حالىقارالىق مۇسىلماندار كينوسى فەستيۆالىندە «ۇزدىك ەر ادام ءرولى» جۇلدەسىمەن ماراپاتتالدى.
وسىلايشا 15 قىركۇيەكتەن باستاپ ەلىمىزدە پروكاتقا شىعاتىن كارتينانىڭ جولى بولىپ تۇر. حالىقارالىق كينوسىنشىلاردان بيىك باعاسىن الىپ, كورەرمەندەرىن تاپتى.
اتالمىش كارتينا حح عاسىردىڭ وتىزىنشى جىلدارىندا سۇرقيا ساياساتتىڭ سالدارىنان الەمنىڭ ءار شالعايىنا تارىداي شاشىراعىن قانداستارىمىزدىڭ قاسىرەتى مەن تاۋقىمەتىن, ساعىنىشى مەن اتالار اماناتىن ارقالايدى.
– تولىقمەتراجدى كارتينالاردا سومداعان رولدەرىم ىشىندەگى بۇل مەنىڭ العاشقى جەڭىسىم, وتە قۋانىشتىمىن. بۇل تەك مەنىڭ عانا تابىسىم ەمەس, رەجيسسەر ءسابيت قۇرمانبەكوۆتىڭ, وپەراتور مارس ۋماروۆتىڭ, قويۋشى سۋرەتشى, كومپوزيتوردىڭ, سونىمەن قاتار بارلىق ءتۇسىرۋ توبىنىڭ ەڭبەگى. ولاردىڭ بارلىعىنا العىسىمدى بىلدىرە وتىرىپ, وسى جەڭىسپەن قۇتتىقتايمىن, – دەدى اكتەر دۋلىعا اقمولدا.
ورايى كەلىپ تۇرعاندا, فەستيۆالدىڭ «ۇزدىك فيلم» جۇلدەسىن تۇرىك رەجيسسەرى مۇستافا قارانىڭ «كالاندرا ىزعارى» ءفيلمى, ال «ۇزدىك رەجيسسەر» جۇلدەسىن ءۇندى رەجيسسەرى مانگەش دجوشي («دجوشي جونۋشى» ءفيلمى ءۇشىن) يەلەنگەنىن ايتا كەتەلىك. سونىمەن قاتار رەسەيدىڭ ەكى كارتيناسى – «امۋن» ءفيلمى «ۇزدىك ستسەناري» جۇلدەسىمەن ماراپاتتالسا, «سوفيچكا» ءفيلمىنىڭ وپەراتورى ايرات ياميلوۆ ۇزدىك وپەراتور اتاندى. ال «ۇزدىك ايەل ادام ءرولى» جۇلدەسى «ايەل كۇنى» ءفيلمىنىڭ ءۇش اكتريساسىنا بۇيىردى.
اتالمىش حالىقارالىق مۇسىلماندار كينوسى فەستيۆالى – 2005 جىلدان بەرى تاتارستاندا وتكىزىلىپ كەلە جاتقان رەسەيدەگى ءىرى كينوفەستيۆالداردىڭ ءبىرى.
فەستيۆال ۇيىمداستىرۋشىلارىنىڭ ايتۋىنشا, بۇل كينوفورۋمنىڭ ماقساتى – مۇسىلمان ەلدەردىڭ فيلمدەرىن ۇلكەن ەكرانعا شىعارىپ, ءدىني عانا ەمەس, ادامي قۇندىلىقتاردى دا دارىپتەۋ, ۇلتارالىق ديالوگ قالىپتاستىرۋ بولىپ تابىلادى.
ايناش ەسالي, «ەگەمەن قازاقستان»
الماتى