بۇگىنگى جۇرت سامارقاۋ. زامانداستارىمىز بەيقام, ەنجار. نارىق, نارىق دەپ پارىقتان كەتىپ بارامىز.
وسىلاي ايتاتىندار از ەمەس. وسىلاي ايتاتىنداردىڭ ءبىرازى الدىڭعى كۇنى استاناداعى كونگرەسس-حولل سارايىندا وتكەن بەكبولات تىلەۋحاننىڭ «الاش ۇرانى» اتتى شىعارماشىلىق كەشىنە قاتىسقان بولسا, رايىنان قايتقان شىعار دەپ ويلايمىز. ول كەش بەكبولاتتىڭ بۇگىنگى ءبىر بيىگىن كورسەتىپ قانا قويعان جوق, ول كەش قازىرگى قازاق رۋحىنىڭ دەڭگەي-دارەجەسىن دە ءبىرشاما تانىتىپ بەردى.
بەكبولات تىلەۋحاننىڭ ءانشىلىگى, كومپوزيتورلىعى, قوعامدىق بەلسەندىلىگى جايىندا ايتىپ جاتۋ كوزى قاراقتى وقىرمان ءۇشىن ارتىق تا بولار. الايدا, كەشتىڭ تالاي تۇسىندا ورەلى ونەر يەسىنىڭ اسقاق ۇنىمەن دە, جۇرەگىنىڭ تەرەڭ تۇكپىرلەرىنەن شىمىرلاپ شىققان, شىرقىراپ ايتقان ءوز شىندىعىمەن دە تىڭداۋشىلاردىڭ جان دۇنيەسىن سىلكىپ-سىلكىپ جىبەرگەنىن, بۇكىل زالدى قاناتتاندىرىپ اكەتكەنىن تاعى دا رازىلىقپەن اتاپ ءوتۋدىڭ ءجونى بار. راس, كەيىنگى كەزدە سان ءتۇرلى سەبەپتەرگە بايلانىستى باق بەتىندە, ينتەرنەت سايتتارىندا بىرەسە ماقتالىپ, بىرەسە داتتالىپ جاتقان بەكبولاتقا قوعامدىق ءومىردىڭ ءار قىرىنا قاتىستى كوپتەگەن سۇراقتاردىڭ قويىلۋى كەشتى وزىندىك ءتول سيپاتىنان الىستاتىپ اكەتكەن تۇستار دا بولدى, بەكبولاتتىڭ ءوزىنىڭ شىعارماشىلىق كەشتى ساياسيلاندىرۋعا, ساحنانى كوپتىڭ كوكەيىندە جۇرگەن ءبىراز ساۋالدارعا جاۋاپ قايتارۋعا پايدالانىپ قالۋدان كەت ءارى ەمەستىگى دە كەي-كەيدە كورىنىپ تۇردى. الايدا, دۇرىس ايتسا دا, بۇرىس ايتسا دا سوزىنە قالىڭ حالىق قۇلاق تۇرمەي قويمايتىن ازاماتتىڭ جۇرەكجاردى ءۇنىن كەيدە ەلىتە, كەيدە ەلىگە, كەيدە جەلىگە تىڭداعان جاستاردىڭ قوعامدى تولعاندىرار تاقىرىپتارعا نازارى سول كەشتە ارتا تۇسكەنى انىق.
ءبىر جاقسىسى, بەكبولات ءتىلەۋحان سول كەشتە ءبارىن ءوزى بىلەتىندەي, شىندىقتى جالعىز ءوزى تىلەتىندەي بولىپ سويلەگەن جوق. ونەر ادامى, ەموتسيا يەسى رەتىندە ارتىق ايتىپ, كەم ءتۇسىپ جاتاتىن جايلارى بار ەكەنىن دە جاسىرمادى. سوندىقتان دا ونىڭ ءسوزى زالدى كەرنەپ كەتكەن جۇرتشىلىقتىڭ ء(ۇش ساعاتقا سوزىلعان كەشتى تىكەسىنەن تىك تۇرىپ تىڭداعان ادامداردى ايتپاعاندا, زالعا كىرە الماي سىرتتا قالعاندار قانشاما دەسەڭىزشى!) ءجۇرەگىنە جەتىپ, كوڭىلىنەن ورىن تاۋىپ جاتتى. مۇنىڭ ءوزى ەل ادامىنا اينالعان تۇلعالاردىڭ حالىق الدىنداعى ءاربىر سوزىنە ايرىقشا جاۋاپكەرشىلىكپەن قاراۋى شارت ەكەنىن تاعى دا دالەلدەي تۇسەدى.
ەڭ باستىسى, بەكبولات بابىندا ەكەنىن كورسەتتى. پارلامەنت ءماجىلىسىنىڭ دەپۋتاتى رەتىندە كوپ جۇمىس اتقارا ءجۇرىپ, ءانشىلىك دەڭگەيىن تومەندەتپەگەنىن تانىتتى. شىن مانىندە, بەكبولات ءۇنى الاش ۇرانىنا اينالدى. كەش يەسىنىڭ ءوزى «پاتشامىزدىڭ جان-جۇرەگىن جارىپ شىققان ءسوز عوي» دەپ باستاپ, «ەلىم مەنىڭ» ءانىنىڭ اسقاق اۋەنىمەن اياقتالعان سول كەش حالقىمىزدىڭ بويىنداعى ەلدىك مىنەزدىڭ تاۋەلسىزدىكتىڭ جيىرما جىلدىعى قارساڭىندا كەمەلىنە كەلە تۇسكەنىن كورسەتىپ بەردى.
«ەگەمەن-اقپارات».