ەلشىلىكتىڭ جەدەل جەلىسىنە يرما داۋىلىنىڭ سالدارىنان ونداعان قر ازاماتىنان قوڭىراۋلار كەلىپ تۇسكەن. ولار وزدەرى تۋرالى جانە تۇرعان جەرى, سونداي-اق زارداپ شەككەن قازاقستاندىقتارعا كومەكتەسۋ ۇسىنىسىمەن بايلانىس اقپاراتىن قالدىرعان.
بۇل جايلى «قازاقپارات» حاا-عا قازاقستان رەسپۋبليكاسى سىرتقى ىستەر مينيسترلىگى ءباسپاسوز قىزمەتىنىڭ باسشىسى حابار بەردى. قازاقستاننىڭ اقش-تاعى ەلشىلىگى فلوريدا شتاتىندا تۇراتىن قازاقستاندىق دياسپورا وكىلدەرىمەن ۇزبەي بايلانىس جاساپ وتىر.
قازاقستان ازاماتتارى قاجەتتى كەڭەستەر مەن شتاتتىڭ شۇعىل قىزمەتتەرىنىڭ نومىرلەرىن الۋىنا بولاتىن قاۋىرت جەلى اشىلعان. بۇدان بولەك, الەۋمەتتىك جەلىلەردەگى قازاقستاندىقتاردىڭ باسىن قوساتىن ارنايى توپتاردا امەريكالىق جەدەل جاردەم قىزمەتتەرىنىڭ نومىرلەرى كورسەتىلگەن اقپاراتتار تارالۋدا.
ماياميدە جانە وعان جاقىن اۋدانداردا تۇراتىن كوپتەگەن قازاقستاندىقتار وزدەرى تۇرعان جەردەن كەتىپ, باسقا شتاتتارداعى تۋىستارى مەن دوستارىنا بارىپ پانالاۋدا. تابيعات اپاتىنىڭ قاۋىپتى ايماعىنان كەتۋگە ۇلگەرمەگەن, سونداي-اق شتاتتا قالۋعا تاۋەكەل ەتكەن ازاماتتار داۋىلدىڭ باسىلۋىن ارنايى ۇيىمداستىرىلعان باسپانالاردا نەمەسە بەرىك سالىنعان عيماراتتاردا كۇتەدى.