استانانىڭ «بارىسى» قۇرلىقتىق حوككەي ليگاسىنىڭ (قحل) كەزەكتى ويىنىن ريگادا جەرگىلىكتى «دينامو» كومانداسىمەن وتكىزىپ, 6:0 ەسەبىمەن جەڭىسكە جەتتى, دەپ حابارلايدى «قازاقپارات»
«Qazsport» تەلەارناسىنان تىكەلەي ەفيردە كورسەتكەنىندەي, بۇل كەزدەسۋدە ەۆگەني كورەشكوۆتىڭ شاكىرتتەرى ايدىن يەلەرىنەن بارلىق ساتتەردە شەبەرلىكتەرىنىڭ باسىم ەكەندىگىن تانىتا ءبىلدى. الدىمەن 6-مينۋتتا كانادالىق ليندەن ۆەي مەن كەۆين داللمەننىڭ كومەگىمەن كوماندا كاپيتانى نايدجەل دوۋس ەسەپ اشتى. سودان كەيىن 14-مينۋتتا تاعى دا ل.ۆەيدىڭ پاسىنان كەيىن شابۋىلعا قوسىلعان قورعاۋشى, كانادالىق داررەن ديتس مەرگەندىك تانىتتى.
ويىننىڭ ەكىنشى كەزەڭىندە استانالىقتار قارقىندى ءتىپتى كۇشەيتتى. اۋەلى مارتين سەن-پەر مەن نيكيتا ءميحايليستىڭ پاسىن پايدالانعان كونستانتين پۋشكارەۆ قاقپا ساڭىلاۋىن ءدال كوزدەدى. 30-مينۋتتا سان باسىمدىلىعى كەزىندە رومان ساۆچەنكو ەسەپتى 4:0-گە جەتكىزدى.
بۇدان كەيىن «دينامو» قاقپاشىسىن اۋىستىرۋعا ءماجبۇر بولدى. بىراق دجاستين پەتەرستىڭ ورنىنا شىققان يانيس كالنينش تا ءوز قاقپاسىن امان ساقتاپ قالا المادى. 32-مينۋتتا تاعى ءبىر كانادالىق مەتتيۋ فرەتتين مەن ل.ۆەيدىڭ پاسىنان كەيىن ن.دوۋس وسى ماتچتاعى ەكىنشى گولىن سوقتى. ءسويتىپ كوماندا كاپيتانى بيىلعى چەمپيوناتتاعى گول سانىن 10-عا جەتكىزدى. ال 39-مينۋتتا وسى ويىندا-اق ءۇش مارتە ناتيجەلى پاس بەرگەن ل.ۆەيدىڭ ءوزى جاڭا ماۋسىمداعى العاشقى شايباسىن سالدى.
ءۇشىنشى كەزەڭ قارسىلاستاردىڭ الما-كەزەك شابۋىلىمەن ءوتتى. ۇرىمتال ساتتەردىڭ بىرىندە نۇرسۇلتان بەلگىباەۆتىڭ قاۋىپتى سوققىسىن يا.كالنينش ءوز قاقپاسىنا دارىتقان جوق. اقىرى ەسەپ وزگەرمەي, كەزدەسۋ 6:0 ەسەبىمەن استانالىقتاردىڭ پايداسىنا اياقتالدى.
ماتچ بارىسىندا «بارىستىڭ» ويىنشىلارى بارىنشا ءتارتىپ بۇزباي, جيناقى وينادى, وعان قوسا شۆەتسيالىق قاقپاشى حەنريك كارللسون دا ءوز شەبەرلىگىن كورسەتە ءبىلدى.
وسى كەزدەسۋدەن كەيىن 16 ۇپاي جيناعان استانالىقتار شىعىس كونفەرەنتسياسىندا كوش باستاسا, قحل-دىڭ جالپى كەستەسىندە ءۇشىنشى ورىندا كەلەدى. «بارىس» كەلەسى ويىنىن 10 قىركۇيەك كۇنى پودولسكىدە «ۆيتياز» كومانداسىمەن وتكىزەدى. سودان كەيىن ەلوردالىقتار ءوز ايدىنىنا ورالادى.