ەكسپو-2017 حالىقارالىق كورمەسى قالاشىعىندا وتكەن كەنيانىڭ ۇلتتىق كۇنىندە ءوندىرىس, ساۋدا جانە كووپەراتيۆ مينيسترلىگى ساۋدا دەپارتامەنتىنىڭ باس حاتشىسى كريس كاپتوو ءسوز سويلەپ, تەحنولوگيالاردى پايدالانىپ, جوبالاردى جۇزەگە اسىرۋ ءۇشىن قاراجاتتىڭ قولبايلاۋ بولىپ وتىرعانىن جاسىرمادى.
استاناداعى حالىقارالىق كورمە ينۆەستورلار مەن كاسىپكەرلەر اراسىنداعى التىن كوپىر دەپ باعا بەرگەن ول ءوز ەلىندە سۋدان ەنەرگيا الۋ جاقسى جولعا قويىلعانىن اڭگىمەلەدى.
«كەنيا 10 000 مۆت قۇرايتىن گەوتەرمالدى رەسۋرستارعا يە, وسى ۋاقىتقا دەيىن ونىڭ 632 مۆت كادەگە جاراعان. وندا ورناتىلعان ەلەكتر ەنەرگياسىنىڭ قۋاتى 2 341 مۆت قۇرايدى. ونىڭ ىشىندە سۋ ەنەرگەتيكاسىنا 36 پايىز, تەرمالدى ەنەرگياعا 35 پايىز, گەوتەرمالدى ەنەرگياعا 28 پايىز جانە جەل ەنەرگەتيكاسىنا 1 پايىز تيەسىلى. سونداي-اق, ءبىز جەل, گەوتەرمالدى, كۇن جانە سۋ ەنەرگەتيكاسى سياقتى جاڭعىرمالى قۋات كوزدەرىنىڭ بىرقاتار رەسۋرستارىنا يەمىز. سۋ ەنەرگەتيكاسىنان وزگە ەنەرگيا كوزدەرى تولىق قولدانىلماعان. اتالعان رەسۋرستاردى ەنگىزۋ جانە وڭدەۋ ينۆەستيتسيالىق مۇمكىندىكتەرمەن قامتاماسىز ەتىلەدى», دەدى كريس كاپتوو. ونىڭ سوزىنشە, ەكسپو-2017 كورمەسىنە قاتىسۋ جاڭعىرمالى ەنەرگيا كوزدەرىنىڭ دامۋىنا وڭ ناتيجە بەرەدى جانە ەكى ەل مەن وزگە دە قاتىسۋشى مەملەكەتتەر اراسىندا ىنتىماقتاستىق قارىم-قاتىناستاردى جەتىلدىرۋگە تىڭ سەرپىن بولادى.
جيىندا قازاقستان رەسپۋبليكاسى ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورساريەۆ حالىقارالىق مامانداندىرىلعان كورمەنىڭ «بولاشاق ەنەرگياسى» تاقىرىبى زاماناۋي الەم ءۇشىن وزەكتى ءارى ماڭىزدى ەكەندىگىن تىلگە تيەك ەتتى. «كەنيانىڭ ەكسپو-2017 كورمەسىنە قاتىسۋى قوس تاراپتىڭ ءوزارا سەنىم دەڭگەيىن كورسەتەدى. قازاقستان كەنيا ەلىمەن ساۋدا-ەكونوميكالىق بايلانىستاردى كەڭەيتۋگە مۇددەلى. مەملەكەتتىڭ ۇلتتىق كۇنى ەكىجاقتى قارىم-قاتىناستى نىعايتۋدا جاڭا مۇمكىندىكتەر اشاتىندىعىنا كامىل سەنەمىن», دەدى ول.
اسحات رايقۇل, سۋرەتتەردى تۇسىرگەن ورىنباي بالمۇرات, «ەگەمەن قازاقستان»