ءار مەملەكەتتىڭ ايبارىن اسپانداتىپ, ەلدىگىن قۋاتتايتىن نەگىزگى قۇجاتى – ونىڭ كونستيتۋتسياسى.
تاۋەلسىزدىگىمىزدى تۇعىرلى, بىرلىگىمىزدى عۇمىرلى ەتىپ, قوعامداعى تاتۋ ءومىردىڭ قاعيداسىن قالىپتاستىراتىن دا وسى قۇجات. سوندىقتان بۇل كۇننىڭ ماڭىزى ەش مەرەكەدەن ءبىر ساتى دا تومەن ەمەس. تاڭىردەن تالەيىمىزگە بۇيىرعان تاۋەلسىزدىگىمىزدىڭ ءتاتتى تاڭىنىڭ اتقانىنا دا اتتاي 25 جىل تولدى.
وسى جىلدار ىشىندە جاڭا ءارى قۋاتتى مەملەكەتتىڭ قالىپتاسۋى ءۇشىن قانشاما قاجىرلى ەڭبەك جۇمسالىپ, تاۋەكەلدى باستامالار جاسالدى. كەز-كەلگەن ەلمەن يىق تىرەستىرىپ, تەرەزەمىز تەڭ دارەجەدە سويلەسە الاتىن جاعدايعا جەتتىك. وتانىمىز تاتۋلىق پەن ىنتىماقتىڭ كيەلى بەسىگىنە اينالدى. مۇنىڭ ءبارىنىڭ ويداعىداي ىسكە اسۋىنا تايعا تاڭبا باسقانداي ەتىپ جازىلعان ارداقتى اتا زاڭىمىزدىڭ تيگىزگەن ىقپالى زور دەپ ايتار ەدىم.
سەبەبى, مەملەكەت دامۋىنىڭ قاي سالاسىندا بولسىن تەمىردەي ءتارتىپ پەن ورتاق زاڭ بولماسا العا قاراي جىلجۋ مۇمكىن ەمەس. ءوندىرىس تە, رۋحانيات پەن ەكونوميكا دا اتا زاڭنىڭ اياسىنا باعىنا وتىرىپ داميدى. مەكتەپ تابالدىرىعىن يمەنە اتتاعان ءاربىر جاس باستاۋىش سىنىپتىڭ قابىرعاسىندا جۇرگەن كەزدە-اق اتا زاڭنىڭ, انا ءتىلدىڭ قاسيەتىن بويىنا دارىتۋى ءتيىس. اتا زاڭىن ارداقتاعان ازامات, اتا سالتىن دا قۇرمەتتەي الادى. تۇمارداي قاستەرلى قۇجاتتىڭ قۇندىلىعىن ءاربىر جاس ۇرپاق سەزىنسە, جان دۇنيەسىمەن ۇعىنسا دەيمىن.
اياگۇل ميرازوۆا, قازاقستاننىڭ ەڭبەك ەرى