وبلىس تۇرعىندارى تاراپىنان كەشكى, تۇنگى ۋاقىتتاردا ءتۇتىن اسەرىنە شاعىمدار ءتۇسۋ جيىلەگەن. وتكەن جىلى اۋانى لاستايتىن زاتتاردىڭ شەكتى مولشەرىنەن اسىپ كەتۋى اقسۋ فەرروقورىتپا زاۋىتى, ەەك, «قازاقستان ءاليۋمينيى» اق كاسىپورىندارىنىڭ سانيتارلىق-تابيعات قورعاۋ اۋماقتارىندا تىركەلىپتى.
وبلىستىق جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسىنىڭ مالىمتەتتەرىنشە, بۇل وبلىس ورتالىعىنداعى «قازاقستان ءاليۋمينيى» اق, №1,№2 جىلۋ ەلەكتر ورتالىقتارى, KSP Steel, پمحز, «قازاقستان ەلەكتروليز زاۋىتى» اق, اقسۋ فەرروقورىتپا زاۋىتى, ەۋرازيالىق ەنەرگەتيكالىق كورپوراتسياسى, «كاستينگ» كاسىپورىندارى. سوندىقتان, وسى الىپ كاسىپورىنداردىڭ قورشاعان ورتاعا تيزىگەتىن زيانىن انىقتاۋ ءۇشىن وندىرىستىك جۇمىستار كۇندىزگى جانە تۇنگى ۋاقىتتاردا جۇرگىزىلىپ, 11 ەلەمەنت بويىنشا 7520 سىناما الىنادى.
وڭىردە ونەركاسىپ, ءتۇستى جانە قارا مەتاللۋرگيا, ەلەكتر, جىلۋ ەنەرگياسى, مۇناي وڭدەلىپ, گلينوزەم وندىرىلەدى. وندىرىستەر قاجەت-اق, بىراق, بۇل كاسىپورىنداردىڭ دامۋى ءوڭىردىڭ ەكولوگيالىق جاعدايىنا زيان كەلتىرۋدە. ەلىمىزدە قورشاعان ورتاعا زياندى زاتتاردىڭ ءجۇز پايىزعا جۋىعى وبلىس ۇلەسىندە بولسا, وبلىس ورتالىعىندا 26, اقسۋدا 24, ەكىباستۇزدا 33 پايىزدان كەلەدى.
باسقارما تاراپىنان ونەركاسىپتىك اۋماقتاعى اۋانىڭ ساپاسىن باعالاۋ جۇمىستارى تاۋلىكتىڭ تۇنگى ۋاقىتى ەسكەرىلىپ, اۋانىڭ ساپاسى انىقتالۋدا. ال, «سىنامالاردى الۋ باعدارلاماسىنا» جىل سايىن وزگەرىستەر ەنگىزىلىپ تۇرادى. 2015 جىلى ءوندىرىستى ءۇش قالادا تەكسەرىستەر جۇرگىزىلىپتى. ناتيجەسىندە ساراپتالاتىن ەلەمەنتتەردىڭ شەكتى نورمادان اسۋى اقسۋ فەرروقورىتپا زاۋىتى, «قازاقستان ءاليۋمينيى» اق, «KSP Steel» كاسىپورىندارىندا انىقتالىپتى. كاسىپورىندارعا قاتىستى ءتيىستى شارالار قولعا الىنىپ, شامامەن 1 ميلليون تەڭگەگە جۋىق ايىپپۇل سالىنىپتى.
فاريدا بىقاي, «ەگەمەن قازاقستان»