نازارباەۆتىڭ توراعالىعىمەن جاڭعىرتۋ جونىندەگى ۇلتتىق كوميسسيا جۇمىسىنىڭ ماسەلەلەرىنە ارنالعان كەڭەس ءوتتى

كەڭەسكە پرەمەر-مينيستر ب.ساعىنتاەۆ, ءماجىلىس توراعاسى ن.نىعماتۋلين, پرەزيدەنت اكىمشىلىگىنىڭ باسشىسى ءا.جاقسىبەكوۆ, ۇكىمەت مۇشەلەرى, ورتالىق مەملەكەتتىك ورگاندار مەن ۇلتتىق كومپانيالار جەتەكشىلەرى قاتىستى.

كەڭەس بارىسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى ق.قوجامجاروۆ, پرەزيدەنت اكىمشىلىگى باسشىسىنىڭ ورىنباسارى ت.دوناقوۆ, ۇلتتىق ەكونوميكا ءمينيسترى ت.سۇلەيمەنوۆ, پرەزيدەنت اكىمشىلىگى باسشىسىنىڭ ءبىرىنشى ورىنباسارى م.ءتاجين, سەنات توراعاسىنىڭ ورىنباسارى ب.بەكنازاروۆ بايانداما جاسادى.

مەملەكەت باسشىسى جۇمىس توبى جەتەكشىلەرىنىڭ ەسەپتەرىن تىڭداپ, بەس ينستيتۋتسيونالدىق رەفورمانىڭ جەكەلەگەن باعىتتارىنىڭ ىسكە اسىرىلۋ بارىسىنا توقتالدى.

– ءبىرىنشى رەفورماعا توقتالايىق. «ب» كورپۋسىنىڭ باسشىلىقتاعى قىزمەتكەرلەرىن اتتەستاتسيالاۋ قورىتىندىسىندا كوپتەگەن مينيسترلىك پەن اكىمدىكتەردە جۇمىس ىستەيتىندەردىڭ ستراتەگيالىق جانە باعدارلامالىق قۇجاتتاردى ءبىلۋ دەڭگەيى تومەن ەكەنى انىقتالدى. ەڭ الدىمەن, بۇل اۋىل شارۋاشىلىعى, دەنساۋلىق ساقتاۋ, ءبىلىم جانە عىلىم مينيسترلىكتەرىنە, سونداي-اق بارلىق اكىمدىكتەرگە قاتىستى بولىپ وتىر. مەملەكەتتىك قىزمەتكەرلەردىڭ قىزمەت بابىندا ءوسۋ جاعدايى جاقساردى. سونىمەن بىرگە, بىرقاتار مەملەكەتتىك ورگانداردا «كوماندالىق اۋىس-تۇيىسكە» بايلانىستى باسشىلىق قۇرامنىڭ اۋىسۋ دەڭگەيى جوعارى ەكەنى بايقالادى, – دەدى ەلباسى.

نۇرسۇلتان نازارباەۆ ء«وز ەركىمەن» بوساعان لاۋازىمدارعا ءتۇرلى كەزەڭدە باسشىلارمەن بىرگە جۇمىس ىستەگەن ادامدار تاعايىندالىپ جاتقانىن ايتتى, سونداي-اق بۇل ماسەلەلەردى رەتكە كەلتىرۋ جونىندە قوسىمشا شارالار قابىلداۋدى تاپسىردى.

– زاڭدىلىق پەن قۇقىقتىق ءتارتىپتىڭ بۇزىلۋى تۋرالى حالىقتىڭ پرەزيدەنت اكىمشىلىگىنە ارىز-شاعىمى ازايماي تۇر. سوتقا دەيىنگى ساتىدا ناقتى جارىسپالىلىق جوق. قورعاۋشىلار مەن قۇقىق قورعاۋ ورگاندارى قىزمەتكەرلەرىنىڭ بىلىكتىلىگى جەتكىلىكسىز. ايقىن ءارى بولماشى بۇزۋشىلىقتار جونىندەگى راسىمدەردى مەيلىنشە جەڭىلدەتۋ قاجەت. ادامدار قاراپايىم ىستەر بويىنشا شەشىمدى ايلاپ كۇتپەۋى كەرەك. سوت جانە قۇقىق قورعاۋ ورگاندارىنىڭ شەشىمدەرى جيناقى ءارى ادامدارعا تۇسىنىكتى بولۋعا ءتيىس, – دەدى قازاقستان پرەزيدەنتى.

سونداي-اق, مەملەكەت باسشىسى جەرگىلىكتى پوليتسيا قىزمەتىنە توقتالىپ, شۇعىل جاعدايلاردا ولاردى باسقارۋدىڭ جانە ارەكەت ەتۋ جەدەلدىگىنىڭ تومەندەمەۋىنە جول بەرمەۋ قاجەتتىگىنە توقتالدى.

– جەرگىلىكتى پوليتسيا ىشكى ىستەر ورگاندارىنىڭ ءبىرتۇتاس جۇيەسىندە بولعان جانە سولاي بولىپ قالا بەرەدى. الايدا, اكىم پوليتسيا الدىنا جەرگىلىكتى ماڭىزى بار قۇقىقتىق ءتارتىپتى قامتاماسىز ەتۋ جانە قۇقىق بۇزۋشىلىقتىڭ الدىن الۋ جونىندە مىندەتتەر قويۋعا قۇقىلى, – دەدى ەلباسى.

نۇرسۇلتان نازارباەۆ بەس ينستيتۋتسيونالدىق رەفورمانىڭ ءۇشىنشى باعىتىنا قاتىستى 50 قادامنىڭ 13-ءى ىسكە اسىرىلعانىن, ال قالعانى بويىنشا جۇمىستاردىڭ جۇرگىزىلىپ جاتقانىن اتاپ ءوتتى.

سونىمەن بىرگە, قازاقستان پرەزيدەنتى جاڭا سالىق كودەكسى جوباسىنان ءتيىمسىز جەڭىلدىكتەر مەن ارتىقشىلىقتاردى الىپ تاستاۋ قاجەتتىگىن تاعى دا ەسكەرتىپ, بۇل ماسەلە جونىندە اۋقىمدى ءتۇسىندىرۋ جۇمىستارىن جۇرگىزۋدى تاپسىردى.

بۇدان بولەك, مەملەكەت باسشىسى وڭىرلىك ەلەكتر جۇيەلەرى كومپانيالارىن ىرىلەندىرۋ جونىندەگى زاڭدى ورىنداۋدىڭ ماڭىزدى ەكەنىنە نازار اۋداردى. ونىڭ ناتيجەسىندە تۇتىنۋشىلار ءۇشىن ەلەكتر ەنەرگياسىنىڭ باعاسى تومەندەۋگە ءتيىس.

– ەكسپورتتىق تاۋارلار جاساۋ جانە الەمدىك نارىققا شىعۋ ءۇشىن قايتا وڭدەۋ سەكتورىنا كەمىندە 10 ترانسۇلتتىق كومپانيانى تارتۋ مىندەتى قويىلعان بولاتىن. بىلتىر «تەناريس», «ەفكو» جانە «كوكا-كولا» كومپانيالارى ىسكە اسىرعان 3 بىرلەسكەن جوبا عانا ىسكە قوسىلدى. بۇل رەتتە, كوكا-كولا شىعاراتىن كومپانيا ەلىمىزدە وتكەن عاسىردان باستاپ جۇمىس ىستەۋدە, – دەدى ەلباسى.

نۇرسۇلتان نازارباەۆ ء«ىرى ينۆەستورلاردىڭ» قاتىسۋىمەن ەكونوميكانىڭ باسىم سەكتورلارىنداعى جوبالاردى ىسكە اسىرۋ تۇرعىسىنان سوڭعى 2 جىلدا ايتارلىقتاي ىلگەرىلەۋشىلىك بولماعانىن ايتتى.

– بۇل جونىندە جىل سايىن ايتىپ كەلەمىز. ءالى كۇنگە دەيىن ستراتەگيالىق ينۆەستورمەن بىرگە وسى سالادا بىردە-ءبىر جوبا ىسكە اسىرىلعان جوق. ارنايى «Kazakh Invest» ۇلتتىق كومپانياسىن قۇردىق. وعان ايرىقشا مارتەبە بەرىپ, بارلىق وڭىردە وكىلدىكتەرىن اشتىق. جارتى جىل ءوتتى, ناتيجەسى قايدا؟ – دەدى قازاقستان پرەزيدەنتى. سونداي-اق, پرەمەر-مينيسترگە ينۆەستورلار تارتۋ جونىندەگى جۇمىستارعا جاۋاپكەرشىلىك بەلگىلەۋ جۇكتەلدى.

سونىمەن قاتار, قازاقستان پرەزيدەنتى «استانا» حالىقارالىق قارجى ورتالىعى مەن ونىڭ ينستيتۋتتارىنىڭ بۇدان ارعى جۇمىس جوسپارى مەن پەرسپەكتيۆالارىنا توقتالدى.

مەملەكەت باسشىسى ۇكىمەت قابىلداعان شارالارعا قاراماستان, جەر قويناۋىن پايدالانۋ سەكتورىندا ورىن الىپ وتىرعان سىبايلاس جەمقورلىق ماسەلەلەرىنە توقتالىپ, بۇل سالاداعى زاڭنامانى قايتا قاراستىرۋدى تاپسىردى.

سوڭىندا نۇرسۇلتان نازارباەۆ ۇلت جوسپارىن ودان ءارى ىسكە اسىرۋ ءۇشىن بيلىكتىڭ بارلىق تارماعىنىڭ الدىندا تۇرعان اۋقىمدى جۇمىس كولەمىن ايقىنداپ بەردى.

– كونستيتۋتسيالىق رەفورما اياسىندا ۇكىمەتتىڭ پارلامەنت پەن ونىڭ پالاتالارى الدىنداعى ەسەپتىلىگى مەن باقىلانۋى كۇشەيتىلدى. كەز كەلگەن باسشى جاۋاپكەرشىلىكتى باسقاعا اۋدارماي, ماسەلەنى ءوز دەڭگەيىندە جەدەل ءارى بىلىكتىلىكپەن شەشۋگە ءتيىس. اعىمداعى ماسەلەلەردى پرەزيدەنتتىڭ دەڭگەيىنە شىعارۋدىڭ قاجەتى جوق, – دەدى ەلباسى.