استانادا «جاڭعىرۋ 3.0: رۋحاني جاڭعىرۋ» اتتى حالىقارالىق عىلىمي-پراكتيكالىق كونفەرەنتسيا بولىپ ءوتتى. بۇل شارانى ەۋرازيالىق ينتەگراتسيا ينستيتۋتى ۇيىمداستىردى.
كونفەرەنتسيانىڭ ماقساتى – قازاقستاندى جاڭعىرتۋدىڭ وزەكتى سۇراقتارى بويىنشا كەڭ اۋقىمدى ماسەلەلەردى تالقىلاۋ.
كونفەرەنتسيانىڭ جۇمىسىنا 100-دەن استام ادام قاتىستى. ولاردىڭ اراسىندا بەلگىلى عالىمدار ز. شاۋكەنوۆا, ز. قابىلدينوۆ, ب. ابدىعالي ۇلى جانە قازاقستان مەن شەتەلدىڭ ساراپشى-تالداۋشى قوعامداستىعىنىڭ باسقا دا وكىلدەرى, جوعارى وقۋ ورىندارىنىڭ پروفەسسورلارى مەن وقىتۋشىلارى بولدى.
قازاقستان رەسپۋبليكاسى پرەمەر-ءمينيسترى كەڭسەسى باسشىسىنىڭ ورىنباسارى ەرجان باباقۇماروۆ كونفەرەنتسيا قاتىسۋشىلارىنا ءوزىنىڭ قۇتتىقتاۋ ءسوزىن ارناپ, وندا نۇرسۇلتان نازارباەۆتىڭ قوعامدا رەزونانس تۋعىزىپ, قالىڭ كوپشىلىك اراسىندا قولداۋ تاپقان «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى ءوزىنىڭ ىسكە اسىرىلۋى جونىنەن ەرەكشە ءتاسىلدى تالاپ ەتەتىن جالپىۇلتتىق اۋقىمداعى تەرەڭ ماعىنالى قۇجات بولىپ تابىلادى دەپ اتاپ ءوتتى.
– تاۋەلسىز قازاقستان تاريحىندا ءالى ەشقاشان ۇلت الدىندا سانانى جاڭعىرتۋ سەكىلدى اسا تەرەڭ ءارى اۋقىمدى مىندەت تۇرماعان ەدى. «رۋحاني جاڭعىرۋ» – مەملەكەتتىڭ بارلىق سالالارىنىڭ ساپالىق تۇرعىدان جاڭارىپ-وزگەرۋىنە نەگىز بولۋعا ءتيىس يدەيالىق تۇعىرناما. بۇگىنگى تاڭدا جاڭارۋعا دەگەن تالپىنىس ءوزىنىڭ ءمانى جونىنەن ۇلتتىق-مەملەكەتتىك ءوزىن-ءوزى ساقتاۋمەن جانە ساپالى دامۋمەن بىردەي بولىپ وتىر – دەپ اتاپ ءوتتى, ە. باباقۇماروۆ.
كونفەرەنتسيانىڭ مودەراتورى ەۋرازيالىق ينتەگراتسيا ينستيتۋتىنىڭ ديرەكتورى عاني نىعىمەتوۆ ءوز سوزىندە ينستيتۋت جۇرگىزىپ جاتقان سوتسيولوگيالىق زەرتتەۋلەردىڭ الدىن الا قورىتىندىسىن ايتىپ بەردى.
– زەرتتەۋلەرگە كوز جۇگىرتەر بولساق, قازىرگى تاڭدا ءۇشىنشى جاڭعىرۋ اياسىنداعى شارالاردى ىسكە اسىرۋ ءۇشىن قولايلى جاعداي قالىپتاسىپ وتىر. قوعامدىق پىكىردە رەفورماشىل كوڭىل-كۇيدىڭ جوعارى ەكەنى اتاپ وتىلۋدە. قازاقستاندىقتاردىڭ 82%-عا جۋىعى ەل ومىرىندە وزگەرىس قاجەت دەپ ەسەپتەيدى. بۇل رەتتە قازىرگى الەۋمەتتىك-ساياسي دامۋ باعىتىن قولداۋ دەڭگەيى دە مەيلىنشە جوعارى – 88%.
سوتسيولوگيالىق زەرتتەۋلەردىڭ دەرەكتەرى قازاقستاندىق قوعام دامۋىنىڭ الەۋمەتتىك-مادەني اسپەكتىلەرىن قوزعايتىن جاڭعىرۋ مىندەتتەرى مەن كونستيتۋتسيالىق وزگەرىستەر قازاقستاندىقتار اراسىندا قولداۋ تاۋىپ وتىرعانىن كورسەتەدى, – دەپ اتاپ ءوتتى ع. نىعىمەتوۆ.
كونفەرەنتسيانىڭ جۇمىسى بارىسىندا جاۋاپتى مەملەكەتتىك قۇرىلىمدار مەن عىلىمي-ساراپشىلىق جۇرتشىلىق وكىلدەرى اراسىندا «رۋحاني جاڭعىرۋ» باعدارلاماسى مەن كونستيتۋتسيالىق رەفورمانىڭ شەشۋشى باعىتتارىن ىسكە اسىرۋ بارىسىن تالقىلاۋ بويىنشا كەڭ كولەمدە سىندارلى سۇحبات ءوربىدى.
كەزدەسۋگە قاتىسۋشىلار قوعامدىق سانانى جاڭعىرتۋ باعدارلاماسى شەڭبەرىندە جۇرگىزىلىپ جاتقان جۇمىستى كەڭىنەن جازىپ-كورسەتىپ, حالىققا ءتۇسىندىرۋ ءۇشىن سۇحبات الاڭى جۇمىسىنىڭ ماڭىزى زور ەكەنىن اتاپ ءوتتى.