بۇگىن الماتىدا ءوتىپ جاتقان ءداستۇرلى تامىز كەڭەسىندە قالالىق ءبىلىم بەرۋ باسقارماسىنىڭ باسشىسى راحات شيماشەۆا اتا-انالاردان اقشا جيناماۋدى ەسكەرتتى, دەپ حابارلايدى قازاقپارات.
باسقارما وسىنداي ماتىندەگى حاتتى جىل سايىن بارلىق مەكتەپتەرگە جىبەرەدى. «قۇرمەتتى, ارىپتەستەر. قايتالاپ ايتامىن. سىزدەرگە اقشا جيناۋعا ەشقانداي نەگىز جوق. ەگەر, مۇنداي اقپارات پايدا بولسا, شارا قولدانامىز», دەدى ر.شيماشەۆا.
ونىڭ ايتۋىنشا, مەكتەپتەر كەرىسىنشە, اتا-انالارعا مەكتەپكە بولىنگەن بيۋدجەتتىك قارجىنىڭ قايدا, قالاي جۇمسالىپ جاتقانى تۋرالى ەسەپ بەرۋى ءتيىس.
«اكىمنىڭ تاپسىرۋىمەن ءبىرىنشى باسشىلار مەكتەپ بيۋدجەتىنىڭ كىرىسى مەن شىعىسى تۋرالى ەسەپ بەرۋى كەرەك. سوڭعى ءۇش جىلدا سەنىم تەلەفونىن اشقالى بەرى مەكتەپتەردەگى اقشا جيناۋ تۋرالى شاعىمدار 3 ەسەگە ازايدى», دەدى ول.
قالا اكىمى باۋىرجان بايبەك ءوزىنىڭ بايانداماسىندا بيىل ءبىلىم بەرۋ سالاسىنا قانشا قارجى بولىنگەنىن ايتىپ ءوتتى.
«بيىل ءبىلىم بەرۋ سالاسىنا جاڭا نىسانداردىڭ قۇرىلىسىن قوسپاعاندا 63,4 ملرد تەڭگە قاراستىرىلعان. ال جاڭا نىسان قۇرىلىسىن قوسا العاندا جالپى 86 ملرد تەڭگە جۇمسالدى. بۇل جالپى قالا بيۋدجەتىنىڭ 1/5 بولىگىنە پارا-پار. مەكتەپتەردى جابدىقتاۋعا - 1,4 ملرد تەڭگە, جاڭا مازمۇنداعى وقۋلىقتاردى الۋعا - 2 ملرد تەڭگە, 28 مەكتەپتى سەيسميكالىق تۇرعىدان كۇشەيتۋگە 23 ملرد تەڭگە باعىتتالعان», دەدى اكىم.
سونىمەن قاتار, اكىم قالادا مەملەكەتتىك جەكەمەنشىك ارىپتەستىك اياسىندا 175 بالاباقشا عيماراتى سالىنىپ, 57 نىسان پايدالانۋعا بەرىلگەنىن ايتتى. وسىنىڭ ارقاسىندا قالا بيۋدجەتىنەن 14 ملرد تەڭگە ۇنەمدەلگەن.