كەزدەسۋ بارىسىندا گ.ابدىقالىقوۆا بيىل ەلىمىزدىڭ ەقىۇ مۇشەلىگىنە ەنگەنىنە 25 جىل تولعانىن اتاپ ءوتتى. ول 62-ءشى رەت وتكىزىلىپ وتىرعان پاگۋوش كونفەرەنتسياسىنا پارلامەنتتىك اسسامبلەيا باسشىلارىنىڭ قاتىسۋى يادرولىق قارۋسىزدانۋدىڭ ماڭىزىن ەسەلەيتىنىن مالىمدەدى. سونداي-اق, اتالعان ماسەلەگە قازاقستاننىڭ ايرىقشا كوڭىل بولەتىنىنە توقتالدى.
مەملەكەتتىك xاتشى بيىل قازاقستاندا ستراتەگيالىق دامۋىنداعى بەتبۇرىستى كەزەڭ ەكەنىن ايتتى. «قاڭتاردا ەلباسى نۇرسۇلتان نازارباەۆ بىرقاتار پرەزيدەنتتىك وكىلەتتىكتەردى پارلامەنت پەن ۇكىمەتكە بەرۋ ارقىلى بيلىك تارماقتارى اراسىنداعى قايتا ءبولۋ جونىندە باستاما كوتەرگەن-ءدى. كونستيتۋتسيالىق رەفورمالار جاريالانعاننان كەيىن مەملەكەت باسشىسى xالىققا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جىل سايىنعى جولداۋىن ارنادى. پرەزيدەنتتىڭ ءۇشىنشى نەگىزگى باستاماسى ونىڭ «بولاشاققا باعدار: رۋxاني جاڭعىرۋ» باعدارلامالىق ماقالاسى بولدى», – دەدى گۇلشارا ابدىقالىقوۆا.
سونىمەن قاتار گ.ابدىقالىقوۆا ەلباسى قولداۋىمەن ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ بيلىك, ازاماتتىق قوعام جانە xالىقارالىق ۇيىمدار اراسىنداعى ديالوگقا ارنالعان ءتيىمدى پلاتفورماعا اينالعانىن مالىمدەدى. ونىڭ ايتۋىنشا, گەندەرلىك ساياساتتىڭ «ەرلەر مەن ايەلدەردىڭ تەڭ قۇقىقتارىنىڭ جانە تەڭ مۇمكىندىكتەرىنىڭ مەملەكەتتىك كەپىلدىكتەرى تۋرالى» جانە «تۇرمىستىق زورلىق-زومبىلىق پروفيلاكتيكاسى تۋرالى» زاڭدار ارقىلى رەتتەلەتىنىن اتاپ كورسەتتى. مەملەكەتتىك xاتشى ەلىمىزدىڭ 2006-2016 جىلدارعا ارنالعان گەندەرلىك تەڭدىڭ ستراتەگياسى ءساتتى ىسكە اسىرىلعانىن, 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى بەكىتىلگەنىن xابارلادى.
گۇلشارا ابدىقالىقوۆا تەرروريزممەن كۇرەسۋ جونىندە ارناۋلى كوميتەت قۇرۋ جونىندەگى ەقىۇ پارلامەنتتىك اسسامبلەياسى ءتورايىمى ك.مۋتوتونەننىڭ باستاماسىن قازاقستان تاراپى قولدايتىنىن جەتكىزدى. سونداي-اق, مەملەكەتتىك xاتشى قۇرمەتتى قوناقتاردى «ەكسپو-2017» كورمەسى اياسىندا 31 تامىز بەن 1 قىركۇيەك ارالىعىندا وتەتىن «ايەلدەر بولاشاق ەنەرگياسىن قولدايدى» اتتى xالىقارالىق فورۋمعا قاتىسۋعا شاقىردى. گ.ابدىقالىقوۆا ورتالىقتىڭ قالىپتاسۋى مەن دامۋىنا ەقىۇ-نىڭ ءوز ۇلەسىن قوساتىنىنا سەنىمىن ءبىلدىردى.
اباي اسانكەلدى ۇلى,
«ەگەمەن قازاقستان»