ءىس-شارانى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى ديرەكتورىنىڭ ءبىرىنشى ورىنباسارى ءامىرحان راحىمجانوۆ اشتى.
– مەملەكەت باسشىسى ن.ءا. نازارباەۆ: «اباي ءسوزى – قازاقتىڭ بويتۇمارى. اباي مۇراسى – قازاقتىڭ ەڭ قاسيەتتى قازىناسى», - دەيدى. قوعامدىق سانانى جاڭعىرتۋ باعدارلاماسىن قولداۋ جولىندا ەلباسى كىتاپحاناسى اباي مۇراسىن جاستار اراسىندا دارىپتەۋ جانە ولاردىڭ ادەبي تالعامىن قالىپتاستىرۋ, وقۋ مادەنيەتىن ىلگەرىلەتۋ ماسەلەسىن مىقتاپ قولعا الدى. وسى ورايدا «اباي وقۋلارى» ەل ازاماتتارىنىڭ بويىنداعى ۇلتتىق رۋحتى كوتەرىپ, وتانسۇيگىشتىك قاسيەتتەر مەن الەۋمەتتىك, ازاماتتىق جاۋاپكەرشىلىكتى ارتتىرۋعا باعىتتالدى, - دەدى ساياسي عىلىمداردىڭ دوكتورى, پروفەسسور ءامىرحان مۇراتبەك ۇلى.
بەلگىلى ابايتانۋشى, قازاقستان جازۋشىلار وداعىنىڭ مۇشەسى الماحان مۇحامەتقاليقىزىنىڭ سوزىنشە, اباي شىعارماشىلىعىن بۇگىنگى ۇرپاققا جان-جاقتى ناسيحاتتاۋدىڭ ماڭىزى زور. بۇل پىكىردى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى, فيلولوگيا عىلىمدارىنىڭ دوكتورى, پروفەسسور ديحان قامزابەك ۇلى دا قولدايدى. ونىڭ ايتۋىنشا, ابايدىڭ ادەبي مۇراسىن كەڭىنەن ناسيحاتتاۋ – جاستاردى ۇلت رۋحانياتىنا تاربيەلەۋدىڭ, ۇلتتىڭ ءتىلى مەن ءدىلىن وياتۋدىڭ بىردەن ءبىر قۇرالى. ءىس-شارا بارىسىندا «EXPO&WOMEN» حالىقارالىق ۇيىمىنىڭ اتقارۋشى ديرەكتورى ءلاززات اسقاروۆا ءوز بايانداماسىن وقىدى.
ناتيجەسىندە ءبىرىنشى ورىندى الماتى وبلىسى قاسكەلەڭ قالاسىنداعى «اياجان قاراساي» مەديتسينالىق كوللەدجىنىڭ تۇلەگى سالتانات وتەباي قانجىعاسىنا بايلادى. ءىى دارەجەلى ديپلوممەن استانا قالاسى قازاق ۇلتتىق ونەر ۋنيۆەرسيتەتىنىڭ 2 كۋرس ستۋدەنتى راۋان ءابدۋالي ماراپاتتالدى. ۇشتىكتى سولتۇستىك قازاقستان وبلىسى اقبۇلاق اۋىلىنداعى چەحوۆ ورتا مەكتەبىنىڭ 11 سىنىپ وقۋشىسى ۆيكتوريا ۆيۋشكينا مەن الماتى وبلىسى قاراساي اۋدانى ۇشقوڭىر اۋىلىنداعى ورتا مەكتەپ-گيمنازياسىنىڭ 8 سىنىپ وقۋشىسى باعيلا نيەتۋللاەۆا تۇيىندەدى. الماتى وبلىسى, جامبىل اۋدانى قاينازار ورتا مەكتەبىنىڭ وقۋشىلارى, اپالى-ءسىڭلىلى دارياباي اسەل مەن ارۋجان ىنتالاندىرۋ سىيلىعى مەن «ەڭ جاس قاتىسۋشى» نوميناتسياسىن يەلەندى. ال نوتتينگەم ۋنيۆەرسيتەتىنىڭ 2 كۋرس ستۋدەنتى جانبوتا دۇيسەباەۆا «اباي مۇراسىن الەمدىك كەڭىستىكتە دارىپتەۋ» نوميناتسياسىنىڭ جۇلدەگەرى اتاندى. ولارعا تىڭ كىتاپ توپتامالارى مەن بىرەگەي ەستەلىك سىيلىقتارى تارتۋ ەتىلدى.
شارا بارىسىندا كوپشىلىك نازارىنا ۇسىنىلعان كىتاپ كورمەسىندە كىتاپحانا قورى مەن ەلباسىنىڭ جەكە كىتاپحاناسىنداعى بىرەگەي باسىلىمدار بەرىلدى. قوناقتار اباي تۋىندىلارى العاشقى اۋدارمالارىنىڭ تۇپنۇسقالارىمەن تانىستى.
ەستەرىڭىزگە سالساق, «اباي وقۋلارى» اتتى جىلسايىنعى ادەبيەت سايىسى ۇلتىمىزدىڭ ۇلى اقىنى, دانا ويشىلى, قازاق جازبا ادەبيەتىنىڭ نەگىزىن قالاۋشىسى جانە تۇڭعىش كلاسسيگى اباي قۇنانباي ۇلىنىڭ تۋعان كۇنىنە وراي وتكىزىلگەن بولاتىن. وعان قاتىسقان جۇمىستارمەن Instagram, Facebook الەۋمەتتىك جەلىلەرىندە ء#بىزدىڭاباي #ابايادەبيەتسايىسى #ەلباسىكىتاپحاناسىاباي حەشتەگتەرىنىڭ كومەگىمەن تانىسۋعا بولادى.