كۇن سايىن تاۋەلسىزدىك مەرەيىنە دەگەن جاقسى ىستەر تىزبەگى ايقىندالۋ ءۇستىندە. تارتۋ, تارالعى دا مول دەۋگە بولادى. سونىڭ دالەلىندەي, تالدىقورعان شاھارىندا جاڭا تەننيس ورتالىعى اشىلىپ, سالتاناتتا وبلىس اكىمى اڭسار مۇساحانوۆ ءسويلەپ, سالاماتتى ءومىر سالتىن مۇرات ەتكەن جاستارعا ساتتىلىك تىلەدى. ساۋلەتتى ورتالىقتىڭ اۋماعى 13 864 شارشى مەتردى الىپ جاتىر. وندا ەكى جابىق تەننيس كورتى, ءتورت اشىق الاڭ ورنالاسقان. ءبىر مەزەتتە ون ەكى ادام تەننيس ويناسا, 300 كورەرمەننىڭ جارىستى تاماشالاۋعا مۇمكىندىگى بار.
حالىقارالىق تەننيس فەدەراتسياسىنىڭ ستاندارتىنا ساي جابىق الاڭعا «حارد» توسەنىشى توسەلسە, سىرتتاعى اشىق الاڭعا «جۇمساق حارد» توسەنىشى جابىلعان. جابىق عيمارات ەكى قاباتتان تۇرادى. ءبىرىنشى قاباتىندا ءدارىگەرلىك كابينەت, ەكى ويىن زالى, ەكىنشى قاباتىندا ەرلەر مەن ايەلدەردىڭ كيىم اۋىستىراتىن ورنى, دۋش, جاتتىقتىرۋشىلار كابينەتى, VIP-زال جانە ويىنشىلاردىڭ تاماقتانۋىنا قولايلى بۋفەت ورنالاسقان.
ساۋلەتتى عيماراتتىڭ جالپى قۇنى 479 ملن. تەڭگەنى قۇراعان. قۇرىلىستىڭ جوباسىن «ارلان» جاۋاپكەرشىلىگى شەكتەۋلى سەرىكتەستىگى دايىنداسا, قۇرىلىستى «سپەتسسانتەحستروي-1» جاۋاپكەرشىلىگى شەكتەۋلى سەرىكتەستىگى سالىپ, قىسقا مەرزىمدە ەل يگىلىگىنە بەردى. ورتالىقتا جاڭا جۇمىس ورىندارى اشىلدى. ەندى ءوڭىر نامىسىن قورعاعان تەننيسشىمىز گۇلناز دوكەيدىڭ جولىن قۋعان تالاي جاس تەننيسشىگە جول اشىلاتىن بولدى.
كۇمىسجان بايجان.
الماتى وبلىسى.
––––––––––
سۋرەتتە: تەننيس ورتالىعىنىڭ سىرتقى كورىنىسى.