پلەنەردىڭ ماقساتى − تاۋەلسىز ەلىمىزدىڭ سالت-ءداستۇرىن, ادەت-عۇرپىن, عاسىرلاردان سىر شەرتكەن قاسيەتتى ساۋلەتتىك ەسكەرتكىشتەرىن, تاريحي ورىندار مەن ۇلتتىق ونەردى ناسيحاتتاۋ ماقساتىندا تۇركى تىلدەس ەلدەردىڭ ەڭبەك سىڭىرگەن ونەر قايراتكەرلەرى جəنە تالانتتى قىلقالام شەبەرلەرىمەن كەسكىندەمە سالاسى بويىنشا ءوزارا تاجىريبە جانە پىكىر الماسۋدى جۇزەگە اسىرۋ. سونىمەن قاتار, وڭتۇستىك ءوڭىرىنىڭ وزىندىك تابيعي گەوگرافيالىق ەرەكشەلىكتەرى مەن كوز تارتارلىق ورىندارىن بەينەلەيتىن حالىقارالىق دەڭگەيدەگى ونەر شىعارمالارىن جاساۋ, بەينەلەۋ ونەرىندە جاڭا كوركەم باعىتتار جانە پلاستيكالىق شەشىمدەر مەن فورمالاردى ىزدەستىرۋ كوزدەلەدى.
پلەنەرگە 9 مەملەكەتتىڭ, ياعني, تۇركيا, تۇرىكمەنستان, وزبەكستان, قىرعىزستان, رەسەي فەدەراتسياسى, ۋكراينا, بولگاريا, مولداۆا ەلدەرىنەن 17 سۋرەتشى, ال ەلىمىزدىڭ استانا, الماتى, پاۆلودار, شىمكەنت قالالارىنان 13 كاسىبي سۋرەتشى ونەر پروفەسسورلارى شاقىرىلعان.
جيىندا ءسوز العان وبلىستىق مادەنيەت باسقارماسىنىڭ باسشىسى نۇربولات احمەتجانوۆ مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىندا ارنايى توقتالعان «تۋعان جەر» باعدارلاماسىن جۇزەگە اسىرۋدا بۇگىنگى وتىرىستىڭ ءمانى ەرەكشە ەكەندىگىن ايتتى. كەڭ-بايتاق قازاقستاندا قىلقالام شەبەرلەرىنىڭ شابىتىن شاقىراتىن سۇلۋ تابيعاتتان بولەك تۇركى حالقىنا ورتاق جادىگەرلەر كوپ. القاقوتان باسقوسۋدا تۇركسوي حالىقارالىق ۇيىمىنىڭ مۇشەسى سانجار مۇلازىموگلۋ وسى جاعىنا باسا توقتالدى.
وڭتۇستىكتىڭ تۋماسى, بۇل جەردىڭ بارلىق تاريحىن بەس ساۋساقتاي جاقسى بىلەتىن سۋرەتشىلەر وداعىنىڭ مۇشەسى سەيسەنحان ماحانبەتوۆ كيەلى ورىندار مەن تابيعات كوركەمدىگىن سۋرەتتەۋ تۇرعىسىنداعى ءىس-شارالاردىڭ ءوز مانىندە وتەتىندىگىنە سەنىم ءبىلدىردى.
دوڭگەلەك ۇستەل باسىندا الداعى جۇمىستاردى ءبىر پىسىقتاپ العان قىلقالام شەبەرلەرى تۇركىستان قالاسىنا جول تارتتى. ءۇش كۇندىك جۇمىس بارىسىندا وتىرار اۋدانىنداعى ارىستان باب كەسەنەسى مەن تاريحي, مادەني ەسكەرتكىشتەر جانە حان تاعى, قاراتاۋ قورىعى اۋماعى, بايدىبەك اۋدانىنىڭ اقمەشىت, قوستۇرا ايماعى مەن قازىعۇرت, سايرام-وگەم تاۋ شاتقالدارى, شىمكەنت قالاسىنىڭ كورىكتى ورىندارىندا جۇمىس ىستەمەك.
ولار مادەني شارا اياسىندا جۇمىستارىن تامامداعان سوڭ شىمكەنتكە ورالىپ, وبلىستىق بەينەلەۋ ونەرى مۋزەيىندە تاعى دا باس قوسادى. بۇل جولى پلەنەر بارىسىندا جاساعان جۇمىستار قورىتىندىلانادى.
باقتيار تايجان, «ەگەمەن قازاقستان»
وڭتۇستىك قازاقستان وبلىسى